Sang Septiembre 2025, may ginhimo nga kampanya sa bilog nga kalibutan ang mga Saksi ni Jehova gamit ang Lalantawan Num. 1 2025 nga “Mauntat ang Inaway—Paano?” Ginsugid nila sa mga tawo ang mensahe sang Biblia parte sa paghidait kag gin-agda nila ang mga tawo sa isa ka espesyal nga pamulongpulong nga ginhiwat sa katapusan sang bulan. Minilyon sa aton mga kauturan sa bilog nga kalibutan ang nagbantala parte sa sini kag madamo sila sang makapalig-on nga ginsugid. Ari ang pila sa sini.

ARMENIA

May duha ka brother nga nagpamalaybalay sa Yerevan, kag ginpamangkot nila ang isa ka babayi kon mauntat gid bala ang inaway. Nagsiling ang babayi nga gusto niya nga wala na sing inaway kag nagpangamuyo sia sa Dios nga tani madula na ang inaway. Namati man ang bana kag ginpasulod sila sa balay. Nagsiling ang mag-asawa nga naguba ang ila balay bangod sa inaway, gani nalagyo sila. Nagakabalaka man sila sa malain nga nagakatabo sa kalibutan. Ginpatan-aw sang duha ka brother sa ila ang video nga Ngaa Gintuga sang Dios ang Duta? Sang tapos nila nabinagbinag ang video, napalig-on gid sila kag nagpasugot nga magpa-Bible study.

ECUADOR

Ang isa ka sister sa Guayaquil nagpakig-istorya sa isa ka babayi parte sa artikulo nga “Kon Paano Ka Makabatyag sang Kalinungan Bisan May Inaway kag Kinagamo” nga makita sa magasin. Sang ginbasa sang sister sa iya ang promisa sang Dios sa Salmo 72:7 nga “magabugana ang paghidait” sa wala sing katapusan, nalipay gid ang babayi. Dayon ginpakita sang sister sa iya kon paano naga-Bible study, kag ginbinagbinag nila ang una nga leksion sang brosyur nga Magkabuhi sing Wala Katapusan! Sang ginbalikan sia sang sister, nalipay gid ang babayi nga padayunon ang ila pagtuon. Subong, padayon nga naga-Bible study ang babayi kag gusto niya nga mag-attend sa aton mga miting.

FINLAND

Ginbisitahan sang mga Saksi ang isa ka babayi sa iya balay sa Vihti kag ginpamangkot nila sia kon sa banta niya madula pa ang mga inaway. Nagsiling sia nga nakita niya ina nga pamangkot sa isa sa aton mga cart. Wala sia nagkadto sa cart, pero sang nakita niya ang pamangkot wala na ini nadula sa iya pensar. Ginpaathag niya sa aton mga sister nga ang iya obra nagabulig sa mga refugee, kag nakita gid niya ang epekto sang inaway sa mga bata nga refugee. Sang ginbasa sang mga sister sa iya ang promisa sa Salmo 46:9 nga ‘pauntaton sang Dios ang mga inaway,’ namangkot sia kon bala matabo ini sa langit sa tapos kita mapatay. Ginbasa dayon nila ang bersikulo 8 kag ginpakita sa iya ang mga tinaga nga “sa duta.” Bangod sini, nami ang ila pag-istoryahanay parte sa iban pa nga topiko sa Biblia kag gusto pa sang babayi nga padayunon ang pagtuon.

TANZANIA

Ginpalapitan sang isa ka pamatan-on nga estudyante ang aton cart sa Dar es Salaam kag nagkuha sang kopya sang Ang Lalantawan Num. 1 2025. Gintanyagan sia dayon sang duha ka brother sing Bible study, kag nagpasugot sia. Sang ulihi sa amo gihapon nga adlaw, nakaistoryahanay sila liwat sang pamatan-on kag ginpakita nila sa iya ang video nga Paano Ginahimo ang Pagtuon sa Biblia? Gusto gid sang pamatan-on nga magtuon, galing siling niya nga sa gab-i lang ang iya bakante nga oras. Bangod sini, nagdesisyon ang mga brother nga alas 10 sang gab-i sila mag-Bible study. Subong, maayo gid ang pag-uswag sini nga pamatan-on, kag padayon sia nga naga-Bible study gamit ang libro nga Magkabuhi sing Wala Katapusan!

THAILAND

Sa siudad sang Trat, naistorya sang isa ka sister ang isa ka negosyante nga babayi kag ginpamangkot sia kon bala mauntat pa ang mga inaway. Nagsiling ang babayi nga gusto gid niya ini nga matabo kay apektado sia sang una sang inaway. Ginbasa sa iya sang sister ang Roma 15:4, dayon ginpaathag niya ang apat ka importante nga butang nga mabenepisyo naton sa Pulong sang Dios: ang pagtudlo, paglaum, pagbatas, kag pagpabakod. Dayon gintanyag sa iya sang sister ang brosyur nga Magkabuhi sing Wala Katapusan!, kag ginbinagbinag nila ang una nga parapo sa leksion 01. Subong, regular na nga naga-Bible study ini nga babayi kag maayo gid ang iya pag-uswag.

Ginapasalamatan gid naton si Jehova kay padayon niya nga ginapakamaayo ang aton pagpanikasog nga ibantala ang iya dalayawon nga promisa nga dulaon ang inaway, kag ‘mangin malipayon gid ang mga tawo sa bugana nga paghidait.’—Salmo 37:11.

Makita sa idalom ang mga piktyur sang aton mga kauturan sa lainlain nga pungsod. Malipayon sila nga nagapakigbahin sa bilog nga kalibutan nga kampanya, kag nagapamati sa espesyal nga pamulongpulong sang Septiembre 2025.