Herero

Sang Disiembre 6, 2025, gin-release ni Brother Alfred Phatswana, miembro sang Branch Committee sa South Africa, ang The Bible―The Good News According to Matthew kag ang libro sang Marcos sa Herero. Ginpahibalo ini sa 300 nga nagtambong sa isa ka espesyal nga miting nga ginhiwat sa Gobabis, Namibia. May 872 pa nga nag-tie in sa programa paagi sa videoconference. Ang tanan nga nagtambong sa miting nakabaton sang naimprinta nga kopya sang The Bible―The Good News According to Matthew. Puede na dayon ma-download ang audio kag ang digital nga pormat sining duha ka libro sa jw.org kag sa JW Library nga app.

Mga 376,000 ka tawo nga nagaistar sa Angola, Botswana, kag Namibia ang nagahambal sang Herero nga lenguahe. Subong, may ara 111 ka kauturan nga nagaalagad sa duha ka kongregasyon kag sa isa ka grupo sa Namibia nga nagagamit sang Herero. Nalipay gid sila nga may ara na sila sing bag-o nga translation sang sini nga mga libro sa Biblia nga magamit nila sa ila ministeryo kag sa mga miting sa kongregasyon.

Nigerian Sign Language

Sang Disiembre 13, 2025, gin-release ni Brother Mark Sanderson, miembro sang Nagadumala nga Hubon, ang libro sa Biblia nga Mateo sa Nigerian Sign Language. Ginpahibalo ini sa 642 nga nagtambong sa isa ka espesyal nga miting nga ginhiwat sa branch office sa Igieduma, Nigeria. Ginpatan-aw man ini nga programa sa 6,270 ka kongregasyon sa bilog nga pungsod. Puede na dayon ma-download ini nga libro sa jw.org kag sa JW Library Sign Language nga app.

Amo ini ang pinakauna nga kompleto nga translation sang libro sang Mateo sa Nigerian Sign Language. Mga walo ka milyon nga apa kag may diperensia sa palamatin-an ang nagaistar sa bilog nga pungsod. Subong, halos 2,000 ka kauturan ang nagaalagad sa 55 ka kongregasyon nga nagagamit sang sign language kag sa 38 ka grupo sa bilog nga Nigeria.