Angolan Sign Language

Sang Hunyo 13, 2025, gin-release ni Brother Taylor Bornschein nga miembro sang Branch Committee sa Angola, ang Bag-ong Kalibutan nga Badbad Sang Cristianong Griegong Kasulatan sa Angolan Sign Language. Ginpahibalo ini sa 2025 nga “Putli nga Pagsimba” nga Rehiyonal nga Kombension nga may 1,540 nga nagtambong sa Luanda, Angola. Ang Cristianong Griegong Kasulatan puede na dayon ma-download sa jw.org, JW Library kag sa JW Library Sign Language nga mga app.

Amo ini ang una nga kompleto nga translation sang Cristianong Griegong Kasulatan sa Angolan Sign Language. Halin sang 2013, ginsugdan sang mga Saksi ni Jehova ang paghimo sang base sa Biblia nga mga publikasyon sa Angolan Sign Language. Subong, halos 1,100 ka kauturan sa Angola ang nagaalagad sa 37 ka kongregasyon kag 11 ka group nga nagagamit sang sign language.

Venezuelan Sign Language

Sang Hunyo 14, 2025, gin-release ni Brother Edgardo López nga miembro sang Branch Committee sa Venezuela, ang Bag-ong Kalibutan nga Badbad Sang Cristianong Griegong Kasulatan sa Venezuelan Sign Language. Ginpahibalo ini sa special meeting nga may 309 nga nagtambong kag ginhiwat sa branch office sang Venezuela sa La Victoria. May 1,215 nga nag-tie in sa programa paagi sa videoconference kag may 918 pa gid nga nagtan-aw sang narekord nga programa sang Sabado kag Domingo sa sina man nga semana. Puede na dayon ini ma-download sa jw.org, JW Library kag JW Library Sign Language nga mga app.

Subong, sobra 100,000 ka tawo ang nagagamit sang Venezuelan Sign Language. Sobra 1,300 ka kauturan ang nagaalagad sa 33 ka kongregasyon kag 34 ka group nga nagagamit sang sign-language sa bilog nga pungsod.

Kituba

Sang Hunyo 20, 2025, gin-release ni Brother Mbete François nga miembro sang Branch Committee sa Congo (Kinshasa), ang Bag-ong Kalibutan nga Badbad Sang Cristianong Griegong Kasulatan kag ang mga libro sa Biblia nga Genesis kag Exodo sa Kituba. Ginpahibalo ini sa 2025 nga “Putli nga Pagsimba” nga Rehiyonal nga Kombension nga may 1,276 nga nagtambong sa Assembly Hall sa Pointe-Noire, Republic of the Congo. Puede na dayon ini ma-download sa jw.org kag sa JW Library nga app. Dugang pa, may ginpanagtag man nga naimprinta nga kopya sang Cristianong Griegong Kasulatan pero limitado lang ini sa mga nagtambong sa kombension. Sa ulihi, makabaton man sang naimprinta nga mga kopya ang mga kongregasyon.

Sobra 12 ka milyon ka tawo nga nagahambal sang Kituba ang nagaistar sa Angola, Gabon, kag Republic of the Congo. Lakip sa ila ang sobra 2,500 ka kauturan nga nagaalagad sa 35 ka kongregasyon nga nagahambal sang Kituba.

Colombian Sign Language

Sang Hunyo 21, 2025, gin-release ni Brother Andrés Mejía nga miembro sang Branch Committee sa Colombia, ang bilog nga Bag-ong Kalibutan nga Badbad sang Balaan nga Kasulatan sa Colombian Sign Language. Ginpahibalo ini sa isa ka espesyal nga programa nga ginhiwat sa Assembly Hall sa siudad sang Cota, Colombia. May 1,980 nga nagtambong sang face-to-face kag may ginatos pa nga nag-tie in paagi sa videoconference halin sa 47 ka lugar sa bilog nga pungsod. Puede na dayon ma-download ang Bag-ong Kalibutan nga Badbad sa jw.org, JW Library kag JW Library Sign Language nga mga app.

Amo ini ang una nga kompleto nga translation sang Biblia sa Colombian Sign Language. Subong, ginabulubanta nga sobra 500,000 ka tawo ang nagagamit sang Colombian Sign Language. Sobra na 25 ka tuig nga nagabalhag sang nabase sa Biblia nga mga publikasyon ang mga Saksi ni Jehova sa Colombian Sign Language. Sobra 1,400 ka kauturan ang nagaalagad subong sa 35 ka kongregasyon kag 11 ka group nga nagagamit sang sign language sa bilog nga Colombia kag nalipay gid sila nga magamit na nila ang kompleto nga Bag-ong Kalibutan nga Badbad sa ila pagministeryo, personal nga pagtuon, kag sa mga miting.