Ang katapusan nga ‘Ibantala ang Maayong Balita!’ nga Special Convention ginhiwat sa El Trébol Assembly Hall sa Santiago, Chile, halin sang Oktubre 18 asta 20, 2024. May kabilugan nga 9,140 ang nag-attend sa sini nga kombension, kag 59 ang nabawtismuhan. Amo ini ang ikaduha nga special convention nga ginhiwat sa Santiago sa sini nga tuig kag ang katapusan sa 15 ka special convention sa bilog nga kalibutan halin sang Hunyo asta Oktubre 2024.

Kon may special convention nga hiwaton sa isa ka siudad, ang paghanda ginahimo binulan antes pa mag-abot ang mga kauturan halin sa bilog nga kalibutan. Sa Chile, linibo ka volunteer ang nagapangabudlay para masigurado nga maabiabi sing maayo ang 2,397 ka delegate halin sa 16 ka pungsod. Madamo nga volunteer didto ang nag-adjust sang ila schedule sa trabaho kag personal nga hilikuton para makabulig. Gani, ang isa ka sister nagsiling: “Pamatyag ko wala ako sing may ginsakripisyo. Tuod, kapoy ko, pero indi gid ini mabayluhan sang indi malipatan nga mga eksperiensia kag sang bag-o nga mga abyan nga nakilala ko.”

Parte sa iya naeksperiensiahan sa special convention sa Santiago, ang isa ka brother nga halin sa United States nagsiling: “Pag-abot pa lang namon sa airport, nabatyagan dayon namon ang grabe nga pagpalangga sang mga kauturan. Indi ko gid mapaathag ang akon nabatyagan.” Ang isa ka sister nga halin sa Peru nagsiling: “Amo ini ang una ko nga special convention, kag sobra gid ini sa ginpaabot ko. Gingamit ini ni Jehova para pabakuron kag palig-unon ako.”

Upod sa aton mga kauturan sa bilog nga kalibutan, nagapasalamat gid kita sa pagpakamaayo ni Jehova sa 2024 ‘Ibantala ang Maayong Balita!’ nga mga Special Convention. Nagapasalamat man kita kay ginhatag niya sa aton ini nga mga kombension bilang paagi para madayaw kag mapadunggan ang iya balaan nga ngalan!—Salmo 34:3.

Makita sa photo gallery sa idalom ang gugma, kalipay, kag paghiusa nga naeksperiensiahan sang aton mga kauturan sa tanan nga 15 ka ‘Ibantala ang Maayong Balita!’ nga mga Special Convention nga ginhiwat sang 2024.