Accessibility setting

Magpili sing lenguahe

Magdiretso sa segundaryo nga menu

Magdiretso sa kaundan

Mga Saksi ni Jehova

Hiligaynon

TURKMENISTAN

Ara sa Prisuhan Bangod sa Ila Pagtuo

Ara sa Prisuhan Bangod sa Ila Pagtuo

Sang Marso 14, 2015, gin-raid sang mga pulis sa Turkmenabad ang malinong nga relihioso nga pagtilipon sa balay ni Bahram Hemdemov. Gindakop ang 38 ka Saksi kag ginkasuhan nga ilegal nga nagahimo sing mga hilikuton sang relihion. Tanan sila ginmaltrato, ang 30 sa ila ginmultahan, kag ang walo ginsentensiahan sing 15 ka adlaw nga pagkapriso. Si Mr. Hemdemov naman ginsentensiahan sang ulihi sang Lebap Regional Court sing apat ka tuig nga pagkapriso. Ginapriso sia subong sa labor camp sa Seydi. Padayon nga ginapanikasugan sang mga Saksi ni Jehova nga mahilway sia sa sining wala sing katarungan nga pagpriso.

Isyu Gihapon ang Pagrespeto sa Kahilwayan sang Konsiensia, Relihion, kag Pagpati

Sang 2015, ang United Nations Human Rights Committee (CCPR) nagdesisyon pabor sa apat ka reklamo nga ginpasaka sang Saksi nga mga lalaki nga ginpriso sa mabudlay kaayo nga mga sitwasyon kay nagpangindi sila nga magsoldado bangod sa konsiensia. Subong, wala na ginapriso sang Turkmenistan ang mga nagapangindi nga magsoldado bangod sa konsiensia.

Nagpasaka man sing reklamo sa CCPR ang duha pa ka Saksi, nga ginpriso bangod sa sayop nga panumbungon para balabagan ang mga hilikuton sang ila relihion. Ini nga komite, base sa Abril 2012 nga report sini parte sa sitwasyon sang kinamatarong sang tawo sa Turkmenistan, nagsugo sa gobierno nga “siguraduhon nga ginarespeto sang kasuguan kag sang mga pamaagi parte sa pagrehistro sang relihioso nga mga organisasyon ang kinamatarong sang mga tawo nga mangin hilway sa paghimo kag pagpahayag sang mga pagpati sang ila relihion suno sa ginasambit sa [International Covenant on Civil and Political Rights].” Gusto gid sang mga Saksi sa Turkmenistan nga maparehistro ang ila hilikuton para hilway nila nga mahimo ang ila pagsimba.

Mga Ginahulat nga Pagbag-o

Ang mga Saksi ni Jehova nagapasalamat gid sa gobierno sang Turkmenistan kay gintadlong sini ang kakulangan sang katarungan paagi sa paghilway sa mga ginpriso sadto. * Ginapaabot ang mas positibo nga pagtuman sang gobierno sa desisyon sang CCPR—mas daku nga pagrespeto sa kinamatarong sang tanan nga tawo ilabi na ang kinamatarong sa kahilwayan sang konsiensia, relihion, kag pagpati. Ang abogado nga nagarepresentar sa mga Saksi, nagsiling: “Nagalaum ang mga Saksi ni Jehova nga masolbar sang positibo nga paghambalanay ang mga ginakabalak-an sang gobierno sang Turkmenistan sa paagi nga makapabilin nga matinlo ang konsiensia sang mga Saksi samtang nagakabuhi sila sing malinong kag may diosnon nga debosyon.”

Time Line

  1. Disiembre 14, 2015

    Ang CCPR nagdesisyon pabor sa tatlo ka Saksi nga ginkasuhan kay nagpangindi sila nga magsoldado bangod sa konsiensia. Pabor man sa ila ang nauna nga desisyon sang Mayo 19, 2015.

  2. Mayo 19, 2015

    Si Bahram Hemdemov ginpamatbatan bangod sa iya paghimo sang mga hilikuton sang iya relihion kag ginsentensiahan sing apat ka tuig nga pagkapriso. Gindakop sia kag ginpriso sing duha ka bulan antes pa sia mabista.

  3. Pebrero/Marso 2015

    Ginhilway ang duha ka Saksi nga ginpriso kay nagpangindi sila nga magsoldado bangod sa konsiensia.

  4. Nobiembre 18, 2014

    Duha ka Saksi ang ginpriso kay nagpangindi sila nga magsoldado bangod sa konsiensia.

  5. Oktubre 22, 2014

    Ginhatagan sang Presidente sang Turkmenistan sing amnestiya ang walo ka Saksi nga ginpriso kag ginhilway sila.

  6. Septiembre 30, 2014

    Siam ka Saksi ang ginpriso—ang pito kay nagpangindi nga magsoldado bangod sa konsiensia kag ang duha bangod sa sayop nga panumbungon sa ila paghimo sang mga hilikuton sang ila relihion.

  7. Septiembre 2, 2014

    Ginhilway sang awtoridad sang Turkmenistan si Bibi Rahmanova kag ginhimo nga conditional ang iya sentensia nga apat ka tuig nga pagkapriso.

  8. Agosto 18, 2014

    Si Bibi Rahmanova ginsentensiahan sing apat ka tuig nga pagkapriso bangod sa sayop nga panumbungon.

  9. Hulyo 25, 2014

    Pito ka Saksi ang ara sa prisuhan—ang lima kay nagpangindi nga magsoldado bangod sa konsiensia kag ang duha bangod sa sayop nga panumbungon sa ila paghimo sang mga hilikuton sang ila relihion.

  10. Abril 6, 2014

    May 26 ka Saksi nga ara sa prisuhan, kag 13 sa sini ang gindakop nga wala sing ebidensia nga nakahimo sang bisan ano nga krimen. Sila nga 13 ginmultahan.

  11. Nobiembre 2013

    Siam ka Saksi ni Jehova ang ara sa prisuhan—ang walo kay nagpangindi nga magsoldado bangod sa konsiensia kag ang isa bangod sa sayop nga panumbungon sa iya paghimo sang mga hilikuton sang iya relihion.

  12. Agosto 29, 2013

    Tatlo ka Saksi ang nagpasaka sing reklamo sa CCPR batok sa Turkmenistan kay wala sini ginkilala ang ila kinamatarong nga magpangindi nga magsoldado bangod sa konsiensia.

  13. Mayo 1, 2013

    Duha ka Saksi ang nagpasaka sing reklamo sa CCPR batok sa Turkmenistan kay wala sini ginkilala ang ila kinamatarong nga magpangindi nga magsoldado bangod sa konsiensia.

  14. Enero 24, 2013

    Gin-raid sang 30 ka pulis ang puluy-an ni Navruz Nasyrlayev mga pila ka semana sa tapos ginpahibalo sang CCPR ang reklamo sa gobierno sang Turkmenistan. Sulitsulit nga ginkastigo sang mga pulis ang iya pamilya kag ang mga bisita nga ara sa iya balay.

  15. Septiembre 7, 2012

    Napulo ka Saksi ang nagpasaka sing reklamo sa CCPR batok sa Turkmenistan kay wala sini ginkilala ang ila kinamatarong nga magpangindi nga magsoldado bangod sa konsiensia. Si Navruz Nasyrlayev ang nanguna sa sini.

  16. Agosto 21, 2008

    Nag-aplay ang mga Saksi ni Jehova para marehistro bilang isa ka relihion sa Turkmenistan.