Accessibility setting

Magpili sing lenguahe

Magdiretso sa segundaryo nga menu

Magdiretso sa kaundan

Mga Saksi ni Jehova

Hiligaynon

SEPTIEMBRE 22, 2014
TURKMENISTAN

Ginpagua sa Prisuhan ang Isa ka Iloy sa Turkmenistan

Ginpagua sa Prisuhan ang Isa ka Iloy sa Turkmenistan

Si Bibi Rahmanova kag ang iya pamilya

Sang alas 8:00 sang gab-i, sang Septiembre 2, 2014, ginpagua sa prisuhan si Bibi Rahmanova. Hilway na sia, pero may panumbungon gihapon batok sa iya. Sina man nga adlaw nga gin-istoryahan sang mga hukom sang Dashaguz Regional Court ang iya pag-apelar. Bisan pa wala nila ginbasura ang sayop nga mga panumbungon batok kay Bibi, gin-islan nila sing conditional sentence * ang sentensia sa iya nga apat ka tuig nga pagkapriso, kag nagmando nga hilwayon sia gilayon. Suno sa desisyon sang korte, ginbinagbinag sang mga hukom ang sitwasyon ni Bibi—nga sia isa ka babayi kag isa ka iloy nga may apat ka tuig nga bata nga lalaki kag wala sia sing criminal record.

Sa tapos masentensiahan sang Agosto 18 sa sayop nga panumbungon nga “pagpanakit sa pulis” kag “hooliganism” ukon pagkabayolente, si Bibi nag-file sang cassation appeal. Sang Hulyo 5, si Bibi kag ang iya bana nga si Vepa, ginkomprontar sang mga pulis sa estasyon sang tren sa Dashoguz pagkatapos nila makuha ang ila mga bagahe nga may unod nga pila ka balasahon parte sa relihion. Ang panumbungon kay Vepa wala gindayon. Pero ginpriso si Bibi sang Agosto 8. Samtang sa prisuhan, naagyan ni Bibi ang grabe nga pagkastigo.

Pagbuyagyag sang mga Inhustisya sa Turkmenistan

Suno sa mga abogado ni Bibi nga halin sa iban nga pungsod, ang reaksion sang iban nga pungsod sa indi makatarunganon nga pagpriso sa iya, nakabulig bisan paano sa wala ginapaabot nga paghilway sa iya.

Indi na bag-o sa mga Saksi ni Jehova sa Turkmenistan ang naagyan ni Bibi. Pirme ginalapas ang panguna nga kinamatarong bilang tawo sang mga Saksi didto. Walo ka Saksi didto ang ara sa prisuhan subong bangod sa ila pagtuo—ang anom sa ila nagpangindi nga magsoldado bangod sa konsiensia kag ang duha bangod sa sayop nga panumbungon. Makaluluoy gid ang ila sitwasyon kag nagaeksperiensia sila sing sarisari nga pag-abuso.

Maayo man kay ginpamag-an sang mga hukom sa Dashoguz Regional Court ang sitwasyon ni Bibi, pero wala gihapon nila matadlong ang inhustisya nga natabo. Ang mga nagapabalor sa dignidad sang tawo nagalaum nga pasangkaron sang mga awtoridad sa Turkmenistan ang ila paghunahuna kag respetuhon ang tawhanon nga kinamatarong nga ginakilala sa bilog nga kalibutan kag hatagan sing kahilwayan sa relihion ang ila pungsod.

^ par. 2 Gin-islan sang regional court ang iya sentensia nga apat ka tuig nga pagkapriso sing apat ka tuig nga conditional sentence nga may tatlo ka tuig nga probation. Sa tion sang probation, dapat padayon niya nga ipakita ang maayo nga paggawi kag indi sia puede maghalin sa iban nga siudad ukon magsaylo sing ilistaran kon wala sing pahanugot sang mga awtoridad.