Accessibility setting

Magpili sing lenguahe

Magdiretso sa segundaryo nga menu

Magdiretso sa kaundan

Mga Saksi ni Jehova

Hiligaynon

HULYO 7, 2015
SOUTH KOREA

Sundon Bala sang mga Hukom sa South Korea ang Internasyonal nga mga Pagsulundan Parte sa Kinamatarong sa Pagpangindi sa Pagsoldado?

Sundon Bala sang mga Hukom sa South Korea ang Internasyonal nga mga Pagsulundan Parte sa Kinamatarong sa Pagpangindi sa Pagsoldado?

Usisaon liwat sang Constitutional Court of South Korea kon bala nahisuno sa konstitusyon ang indi pagkilala sang gobierno sa kinamatarong sang mga nagapangindi sa pagsoldado bangod sa konsiensia. * Sang nagligad lang nga apat ka tuig, sang 2011, nagdesisyon ang Korte nga base sa Military Service Act sang South Korea, indi paglapas sa konstitusyon ang pagsilot sa mga indi magsoldado bangod sa konsiensia. Amo gihapon ang desisyon sini sang 2004.

Pero karon, mahimo sing tumalagsahon nga tikang ang Korte paagi sa pagbinagbinag liwat sini nga isyu. Bistahon sini liwat sa Hulyo 9, 2015, ang kaso sang tatlo nga nangindi sa pagsoldado bangod sa ila konsiensia. May mga organisasyon nga nagpasa sa Korte sang amicus curiae, ukon mga impormasyon, nga nagasuportar sa sini nga kinamatarong. Ang pagpangindi sa pagsoldado bangod sa konsiensia ginakilala na sa internasyonal nga kasuguan, gani ang indi pagsunod sang South Korea sa sini nakakuha sing atension sang bilog nga kalibutan.

Nagadamo Pa Gid ang Nagabantay

Ang UN Human Rights Committee nagpanawagan sa South Korea nga kinahanglan nila maghimo sing pagbag-o. Halin sang 2006, ini nga komite nagpagua sang lima ka desisyon may labot sa sobra 500 ka tawo nga nangindi sa pagsoldado bangod sa konsiensia * kag nagsugo ini sa South Korea nga maghimo sing kasuguan nga nagagarantiya sa kinamatarong sang mga nagapangindi sa pagsoldado bangod sa konsiensia.

Sang International Day of Conscientious Objectors, ang Amnesty International, nga nakabase sa London nga organisasyon para sa kinamatarong sang tawo, nagsulat sang artikulo nga napetsahan Mayo 13, 2015, parte sa pagtratar sang South Korea sa mga nagapangindi nga magsoldado bangod sa konsiensia. Ang artikulo panguna nga nagapatuhoy sa pamatan-on nga mga Saksi nga ara na sa edad nga magsoldado kag kon ano ang ila naeksperiensiahan bangod sa kasuguan sang South Korea subong. Sina man nga semana, pila ka internasyonal nga media, kaangay sang CNN kag The Washington Post, ang nagpagua man sang mga artikulo parte sa mga nagapangindi nga magsoldado bangod sa konsiensia kag sa pamatan-on nga mga Saksi nga may amo man sini nga panindugan.

Ang Hangkat sa mga Hukom

Sang ang isa ka Saksi ni Jehova nangindi nga magsoldado sa South Korea, nagdesisyon ang korte nga guilty sia sang draft evasion, ukon hungod nga paglikaw sa pagsoldado. Pero, daw indi na gid ugyon ang mga hukom nga sentensiahan ang mga pamatan-on nga ang lamang “krimen” amo ang pagsunod sa ila pagtuluuhan. * Halimbawa, ang hukom sa Suwon District Court naghibi sang ginsentensiahan niya ang Saksi kay wala na sia mahimo kundi magdesisyon nga guilty ini.

Sang Mayo 12, 2015, “not guilty” ang sentensia sang isa ka hukom sang Gwangju District Court. Wala niya ginsunod ang mga desisyon sa nauna nga mga kaso bangod nagapati sia nga wala sing sala ang tatlo ka Saksi ni Jehova. Gusto niya maghimo sing pagbag-o, gani nagsiling sia sa ila: “Ang mahimo ko lang amo nga sindihan ini kag maglaum nga mapasiga ninyo ini.” Nag-apelar ang piskal sa sini nga desisyon.

Imbes nga sentensiahan ang mga indi magsoldado bangod sa konsiensia, pito ka hukom sa district court ang nagpasa sang kaso sa Constitutional Court, bisan pa sa 2004 kag 2011 nga desisyon sang Korte sa sini nga isyu. Wala ginsentensiahan sini nga mga hukom nga ibilanggo ang pamatan-on bangod lamang sa simple nga rason nga ginasunod niya ang iya konsiensia. Sa isa sini nga mga kaso, si Hukom Young-hoon Kang sang Seoul North District Court nagsiling nga ang pagsentensia sa mga nagapangindi nga magsoldado bangod sa konsiensia “pareho lang sa pagdingot sa ila mga kinamatarong kag identidad. Ginalapak gid sini ang dignidad sang tawo.”

Ang mga Hukom Dapat Magdesisyon Nahisuno sa Internasyonal nga mga Pagsulundan

Sang Disiembre 2014, nagtipon ang Korean Bar Association para istoryahan ang parte sa kinamatarong sa pagpangindi nga magsoldado bangod sa konsiensia. Sa keynote address sang anay Supreme Court Justice nga si Su-an Cheon, nagsiling sia nga ang desisyon sang UN Human Rights Committee kag ang resolusyon sang UN Human Rights Council batok sa South Korea “isa ka kahuy-anan sang pungsod.” Nagsiling sia nga ang “pagbilanggo sa ginatos ka pamatan-on nga mga lalaki indi mapakamatarong” kag ginsilingan niya ang mga hukom kag mga abogado nga ara didto nga dapat ipahisuno nila sa internasyonal nga mga pagsulundan ang ila desisyon sa korte.

Sa katapusan nga bahin sang pamulongpulong ni Ms. Cheon, sia nagsiling: “Dapat may ara kita sing alternatibo nga serbisyo [sa pagsoldado]. . . . Ang pagbaton sang alternatibo nga serbisyo mangin importante gid nga bahin sang kasaysayan sang Korea, kag daku nga kadalag-an tuhoy sa pagkilala sa kinamatarong sang tawo sa idalom sang pagdumala sang una nga babayi nga presidente. Ang paghimo sini makapanas sa aton kahuy-anan nga naulihi ang aton pungsod sa sibilisasyon kon parte sa isyu sang kinamatarong sang tawo.”

Sundon Bala sang Constitutional Court ang Internasyonal nga mga Pagsulundan?

Sa sulod sang mga dekada, linibo ka mga Saksi ni Jehova ang nabilanggo sa South Korea kay indi sila magsoldado bangod sa ila konsiensia. Samtang nagahulat sa desisyon sang Korte, nagahunahuna sila: Ang mga hukom bala sang Constitutional Court handa nga magpabor sa mga indi magsoldado bangod sa konsiensia? Magadesisyon bala ang South Korea suno sa internasyonal nga mga pagsulundan parte sa kinamatarong sang tawo?

^ par. 2 Wala ginakilala sang Republic of Korea ang kinamatarong sang mga nagapangindi sa pagsoldado bangod sa ila konsiensia. Sa nagligad nga 60 ka tuig, 18,000 ka Saksi ni Jehova ang nabilanggo kay indi sila magsoldado bangod sa ila mga pagtuluuhan. Para sa pinakabag-o nga listahan sang mga Saksi nga nabilanggo sa South Korea, tan-awa ang “Imprisoned for Their Faith—South Korea.”

^ par. 5 Communications Nos. 1321/2004 kag 1322/2004, U.N. Doc. CCPR/C/88/D/1321-1322/2004, 3 November 2006; Communications Nos. 1593 to 1603/2007, U.N. Doc. CCPR/C/98/D/1593-1603/2007, 23 March 2010; Communications No. 1642-1741/2007, U.N. Doc. CCPR/C/101/D/1642-1741/2007, 24 March 2011; Communication No. 1786/2008, U.N. Doc. CCPR/C/106/D/1786/2008, 25 October 2012; Communication No. 2179/2012, U.N. Doc. CCPR/C/112/D/2179/2012, 15 October 2014.

^ par. 8 Tan-awa ang “Judges Struggle With Their Own Conscience When Required to Ignore Conscience of Others.”

 

Magtuon sing Dugang Pa

Ngaa Wala Nagaentra sa Inaway ang mga Saksi ni Jehova?

Kilala ang mga Saksi ni Jehova sa bilog nga kalibutan nga wala nagaentra sa inaway. Hibalua kon ngaa amo sini ang ila panindugan.