Accessibility setting

Magpili sing lenguahe

Magdiretso sa segundaryo nga menu

Magdiretso sa kaundan

Mga Saksi ni Jehova

Hiligaynon

SOUTH KOREA

Ara sa Prisuhan Bangod sa Ila Pagtuo

Ara sa Prisuhan Bangod sa Ila Pagtuo

Ang mga Saksi ni Jehova sobra na 100 ka tuig sa South Korea kag may kahilwayan sila sa pagsimba—magluwas lang sa mga nagapangindi nga magsoldado bangod sa konsiensia. Halin sang Korean War asta subong, ang pamatan-on nga lalaki nga mga Saksi nga indi magsoldado padayon nga ginakasuhan, kag ang gobierno wala sing ginahatag nga alternatibo para masolusyunan ini nga isyu. Ano ang resulta? Kon totalon, sobra na sa 18,000 ka Saksi ang ginsentensiahan sang South Korea sing sobra 35,000 ka tuig nga pagkapriso bangod indi sila magsoldado.

Mas Maayo Na nga Sitwasyon sa Prisuhan

Sadto, ang mga Saksi nga ginapriso nag-antos sing mabudlay kaayo nga sitwasyon kag malawig nga sentensia. Pero, nag-ayoayo na ang sitwasyon kag 18 ka bulan na lang ang sentensia. Ginasugtan na sang mga opisyal sa prisuhan ang kalabanan nga Saksi nga maghiwat didto sing relihioso nga mga miting. Dugang pa, sobra 70 porsiento sang ginpriso nga mga Saksi ang ginpain sa iban nga mga priso kag ginsaylo sa mga selda upod sa pareho nila nga mga Saksi. *

Ang Pagtan-aw sang mga Pungsod sa Kinamatarong nga Magpangindi nga Magsoldado Bangod sa Konsiensia

Ang UN Human Rights Committee (CCPR), amo ang nagausisa kon bala ginapatuman ang International Covenant on Civil and Political Rights (ICCPR). Nakita sini nga ginasupak sang South Korea * ang kinamatarong sang mga nagapangindi nga magsoldado bangod sa konsiensia paagi sa pagpamatbat nga nakasala sila kag pagpriso sa ila. Sining karon lang, sang Enero 14, 2015, ginpagua sang CCPR ang ikalima nga desisyon parte sa sini nga isyu batok sa South Korea. Ini nga desisyon, nga may kaangtanan sa 50 ka Saksi nga ara sa prisuhan, nagsulit lang sang desisyon sadto nga ginsupak sang South Korea ang ila kinamatarong sa “kahilwayan sang panghunahuna, konsyensya kag relihiyon.” Nagdesisyon man ini nga ang gobierno nakasala sing “arbitrary detention” bangod sa pagpriso sa mga lalaki nga nagahimo sang ila kinamatarong nga ginakilala sang ICCPR.

Sa tapos marebyu ang rekord sang South Korea parte sa kinamatarong sang tawo, ginpabakod sang CCPR ang ila obserbasyon sang Nobiembre 3, 2015. Ginsugo sang CCPR ang gobierno nga hilwayon ang tanan nga nagapangindi nga magsoldado bangod sa konsiensia, panason ang ila rekord sa listahan sang mga kriminal kag hatagan sila sing nagakaigo nga danyos, kag maghimo sing bag-o nga kasuguan nga nagahatag sing alternatibo nga serbisyo para sa mga sibilyan. Nagsiling man ini nga ang gobierno “dapat magtuman gid sa Views nga ginpagua sang [CCPR].”

Ginbinagbinag Liwat sang Constitutional Court sang South Korea ang Isyu

Nagadugang pa gid ang pressure sa gobierno nga maghimo sing kasuguan nga nagahatag sing alternatibo nga mga programa para sa mga nagapangindi nga magsoldado bangod sa konsiensia. Ginpasa sang iban nga district court ang mga kaso sa Constitutional Court, kag sang Hulyo 9, 2015, ang Korte nagpatawag sing hearing para usisaon kon bala base sa konstitusyon ang indi pagkilala sang gobierno sa kinamatarong nga magpangindi nga magsoldado bangod sa konsiensia. Duha ka beses na nga nagdesisyon ang Korte, sang 2004 kag sang 2011, nga ang indi pagkilala sang Military Service Act sa kinamatarong nga magpangindi nga magsoldado bangod sa konsiensia base sa konstitusyon. Ginahulat pa ang bag-o nga desisyon.

Time Line

  1. Enero 31, 2016

    May 537 na ka Saksi ni Jehova nga napriso kay nagpangindi nga magsoldado bangod sa konsiensia.

  2. Nobiembre 3, 2015

    Ginpabakod sang CCPR ang obserbasyon sini nga nagasugo sa South Korea nga maghatag sing alternatibo nga mga programa para sa mga sibilyan.

  3. Oktubre 31, 2015

    May 590 na ka Saksi ni Jehova nga napriso kay nagpangindi nga magsoldado bangod sa konsiensia.

  4. Hulyo 31, 2015

    May 555 na ka Saksi ni Jehova nga napriso kay nagpangindi nga magsoldado bangod sa konsiensia.

  5. Hulyo 9, 2015

    Ginbinagbinag sang Constitutional Court kon bala base sa konstitusyon ang pila sa mga ginapatuman sang Military Service Act.

  6. Abril 30, 2015

    May 653 na ka Saksi ni Jehova nga napriso kay nagpangindi nga magsoldado bangod sa konsiensia.

  7. Marso 3, 2015

    May 613 na ka Saksi ni Jehova nga napriso kay nagpangindi nga magsoldado bangod sa konsiensia.

  8. Enero 14, 2015

    Ginpagua sang CCPR ang Views sini nga nagasiling nga ginsupak sang South Korea ang Artikulo 18 (kinamatarong sa kahilwayan sang panghunahuna, konsiensia, kag relihion) kag ang Artikulo 9 (wala ginatugutan ang arbitrary detention) sang ICCPR sang wala sini ginkilala ang kinamatarong sang 50 ka Saksi nga magpangindi nga magsoldado bangod sa konsiensia kag pagpriso sa ila.

  9. Oktubre 31, 2014

    May 597 na ka Saksi ni Jehova nga napriso kay nagpangindi nga magsoldado bangod sa konsiensia.

  10. Agosto 31, 2014

    May 562 na ka Saksi nga lalaki nga napriso kay nagpangindi nga magsoldado bangod sa konsiensia.

  11. Hunyo 30, 2014

    Gin-pending sa Constitutional Court ang 28 ka kaso nga pagpangindi nga magsoldado bangod sa konsiensia; 618 ka lalaki ang ara sa prisuhan.

  12. Enero 28, 2014

    Ang presidente naghatag sing espesyal nga amnestiya kag parol nga nagbuhin sing isa ukon duha ka bulan sa sentensia sang halos 100 ka Saksi nga lalaki nga ginpriso kay nagpangindi sila nga magsoldado bangod sa konsiensia; 513 ang ara sa prisuhan suno sa report sang Enero 31.

  13. Nobiembre 2013

    May 599 na ka Saksi ni Jehova nga napriso kay nagpangindi nga magsoldado bangod sa konsiensia.

  14. Abril 2013

    Ginpain ang 70 porsiento sang mga Saksi sa iban nga mga priso kag ginsaylo sa mga selda upod sa pareho nila nga mga Saksi.

  15. Oktubre 25, 2012

    Ginpagua sang CCPR ang Views sini nga ginsupak sang South Korea ang Artikulo 18 (kinamatarong sa kahilwayan sang panghunahuna, konsiensia, kag relihion) sang ICCPR sang wala sini ginkilala ang kinamatarong sang 388 ka Saksi nga magpangindi nga magsoldado bangod sa konsiensia.

  16. Agosto 30, 2011

    Sa desisyon sang Constitutional Court, ang pagsilot sa mga nagapangindi nga magsoldado bangod sa konsiensia wala nagasupak sa Konstitusyon sang Korea.

  17. Marso 24, 2011

    Ginpagua sang CCPR ang Views sini nga ginsupak sang South Korea ang Artikulo 18 sang ICCPR sang wala sini ginkilala ang kinamatarong sang 100 ka Saksi nga magpangindi nga magsoldado bangod sa konsiensia.

  18. Enero 15, 2009

    Nagpagua sing report ang Presidential Commission on Suspicious Deaths in the Military nga nagapamatuod nga ang gobierno sang South Korea may salabton sa kamatayon sang lima ka pamatan-on nga Saksi halin sang 1975 asta 1985 nga napriso kay nagpangindi nga magsoldado bangod sa konsiensia.

  19. Disiembre 2008

    Ginkanselar sang South Korea ang plano nga maghatag sing alternatibo nga serbisyo para sa mga nagapangindi nga magsoldado bangod sa konsiensia.

  20. Septiembre 18, 2007

    Ginpahibalo sang Ministry of Defense sang South Korea ang plano nga maghatag sing alternatibo nga serbisyo para sa mga nagapangindi nga magsoldado bangod sa relihioso nga mga pagpati, kag nagsaad nga bag-uhon ang kasuguan parte sa pagsoldado kag sa reserba nga mga soldado.

  21. Nobiembre 3, 2006

    Ginpagua sang CCPR ang Views sini nga ginsupak sang South Korea ang Artikulo 18 sang ICCPR sang wala sini ginkilala ang kinamatarong sang duha ka Saksi nga magpangindi nga magsoldado bangod sa konsiensia.

  22. Agosto 26, 2004

    Ginpabakod sang Constitutional Court nga suno sa konstitusyon ang kasuguan nga nagasilot sa mga nagapangindi nga magsoldado bangod sa konsiensia.

  23. 2001

    Ginpauntat sang departamento sang Military Manpower Administration ang pilit nga pagpalista, kag ang sentensia sadto nga tatlo ka tuig ginhimo na lang nga isa ka tuig kag tunga.

  24. Disiembre 1, 1985

    Napatay si Kim, Young-geun bangod sa mapintas kag brutal nga pagtratar sang militar samtang ginapriso sia bangod sa pagpangindi nga magsoldado bangod sa konsiensia.

  25. Agosto 17, 1981

    Napatay si Kim, Sun-tae bangod sa mapintas kag brutal nga pagtratar sang militar samtang ginapriso sia bangod sa pagpangindi nga magsoldado bangod sa konsiensia.

  26. Marso 28, 1976

    Napatay si Jeong, Sang-bok pagkatapos sang grabe nga pagkastigo kag mapintas nga pagtratar sang militar kay nangindi sia nga magsoldado bangod sa konsiensia.

  27. Marso 19, 1976

    Napatay si Lee, Choon-gil sang naglupok ang iya spleen bangod sa grabe nga pagkastigo sang mga pulis samtang ginapriso sia kay nangindi sia nga magsoldado bangod sa konsiensia.

  28. Nobiembre 14, 1975

    Napatay si Kim, Jong-sik pagkatapos sang grabe nga pagkastigo kag pagpaantos sang mga opisyal sang militar kay nangindi sia nga magsoldado bangod sa konsiensia.

  29. 1975

    Ginsugo ni Presidente Park Jeong-hee ang pilit nga paglista para magsoldado, kag dapat magsoldado ang tanan. Ang Saksi nga mga lalaki ginpuersa kag gindala sa mga recruitment center.

  30. Enero 30, 1973

    Ginpatuman ang Special Act on Criminal Punishment for Violation of Military Service Act, diin ang tatlo ka tuig nga sentensia para sa mga nagapangindi nga magsoldado bangod sa konsiensia ginhimo nga 10 ka tuig. Ang iban sulitsulit nga ginapilit nga magpalista para magsoldado.

  31. 1953

    Nagsugod sa South Korea ang pagpriso sa mga nagapangindi nga magsoldado bangod sa konsiensia.

^ par. 4 Para sa dugang nga impormasyon, tan-awa ang artikulo nga Ginatos nga Ginpriso Bangod sa Ila Konsiensia Ginpain sang South Korea sa mga Kriminal

^ par. 6 Ang South Korea miembro sang International Covenant on Civil and Political Rights (ICCPR) kag sang first optional protocol sa ICCPR, nga nagatugot sa mga indibiduwal sa South Korea nga magsulat sa CCPR kon may nabal-an sila nga nagasupak sa ICCPR.