Accessibility setting

Magpili sing lenguahe

Magdiretso sa segundaryo nga menu

Magdiretso sa kaundan

Mga Saksi ni Jehova

Hiligaynon

HULYO 27, 2015
RUSSIA

Gindumilian sang Russia ang Opisyal nga Website sang mga Saksi ni Jehova

Gindumilian sang Russia ang Opisyal nga Website sang mga Saksi ni Jehova

Pito ka bulan pagkatapos gindeklarar sang Supreme Court of the Russian Federation nga ekstremista ang www.jw.org, gindumilian sang mga awtoridad sa Russia ang opisyal nga website sang mga Saksi ni Jehova. Ginpatuman ini nga pagdumili sang Hulyo 21, 2015, sang gindugang sang Russian Federation Ministry of Justice ang jw.org sa Federal List of Extremist Materials. Gin-block sang mga Internet provider sa bilog nga Russia ang website, kag isa na subong ka krimen ang pagpakilala sini sa sulod sang pungsod. Sa bilog nga kalibutan, ang Russia lamang ang nagdumili sa jw.org.

Mga Hitabo nga Nagdul-ong sa Pagdumili sa JW.ORG

Wala nakahibalo ang mga Saksi ni Jehova sa Russia nga sang 2013 ang mga awtoridad sa siudad sang Tver naghimo sing legal nga proseso para dumilian ang website. Ang Tver City Prosecutor nagpasaka sing panumbungon sa Tsentralniy District Court para dumilian ang jw.org kay nagaunod ini sing pila ka relihioso nga publikasyon sang mga Saksi ni Jehova nga gindeklarar na nga ekstremista sang korte sa Russia. * Sang Agosto 7, 2013, ginbista sang district court ang panumbungon sang mga piskal nga wala napahibalo ang mga Saksi ni Jehova kag gindeklarar nila nga ekstremista ang jw.org.

Sang nabalitaan sang mga Saksi ang desisyon paagi sa lokal nga media pagligad sang isa ka bulan, nag-apelar sila kag boluntaryo nga ginkuha ang mga publikasyon nga ginakuwestyon sa Russia. Sang Enero 22, 2014, ginbaliskad sang Tver Regional Court ang desisyon sang korte, kay wala sing legal nga basihan ang korte sa pagdumili sa jw.org kag dapat ginpatawag nila ang copyright holder sang website sang ginbista ang kaso.

Ang Deputy Prosecutor General nga si S. G. Kekhlerov wala nag-ugyon sa desisyon sang regional court, gani nag-apelar sia sa Supreme Court of the Russian Federation. Wala ginpahibalo sa eksakto nga paagi ang mga Saksi sang ginbista ang kaso. Pero sang Disiembre 2, 2014, ginbista sang Korte Suprema ang apelar (cassation appeal) sang piskal nga wala ang depensa.

Ginkompirmar sang Korte Suprema nga ginkuha sang mga Saksi ang mga publikasyon wala madugay pagkatapos sang desisyon sang trial court sang Agosto 2013, pero sa wala ginpaathag nga mga rason, nagsiling sila nga ini nga mga publikasyon posible nga makita liwat sa site. Gani nagdesisyon ang Korte nga baliskaron ang desisyon sang regional court kag ibalik ang desisyon sang trial court nga nagadeklarar sa jw.org nga ekstremista. * Nag-apelar (supervisory appeal) ang mga Saksi ni Jehova sa Korte Suprema nga ginakuwestyon ang desisyon, pero ginbasura ini sang Korte. Nag-apelar man sila sa Tsirman sang Korte Suprema, pero sang Hulyo 8, 2015, ginbasura man ini.

Nabutang sa Katalagman ang Kahilwayan sa Relihion

Ginapakigbato sang mga Saksi ni Jehova nga ang desisyon sang Korte Suprema indi patas kag wala sing basihan bangod ang relihioso nga mga publikasyon nga gindeklarar nga ekstremista indi na matigayon sa jw.org sa Russia halin sang tigragas sang 2013. Bilang resulta sini nga desisyon, ginpatuman sang mga awtoridad sa Russia sa mga Internet provider nga i-block ang jw.org sa bilog nga Russia. Bangod sini, indi na matigayon sang mga bumalasa ang Biblia sa sobra 130 ka lenguahe kag ang base sa Biblia nga mga publikasyon sa sobra 700 ka lenguahe, pati ang Russian kag Russian Sign Language. Ang bisan sin-o sa Russia nga nagaganyat sa iban nga buksan ini nga website pasakaan sing kaso administratibo ukon kriminal bangod sa ginaalegar nga ekstremista nga hilikuton. Bangod sini nga pagdumili, sobra 170,000 ka Saksi ni Jehova ang indi na makakuha sing impormasyon nga importante sa pagpabakod sang ila espirituwalidad kag sa ila pagsimba kada adlaw.

Ang desisyon sang Korte Suprema mangin basihan man sang pila ka opisyal sang Russia nga dumilian ang relihioso nga mga hilikuton sang mga Saksi ni Jehova. Mientras indi eksakto ang pagpatuman sang pila ka opisyal sang Russia’s Law on Counteracting Extremist Activity, ang kahilwayan sa relihion sa Russia malimitahan kag mabutang pa gid sa katalagman. Nagalaum gid ang mga Saksi ni Jehova nga depensahan sang wala sing pinasulabi nga mga opisyal ang kinamatarong sang tawo nga kahilwayan sa pagsimba kag patas nga pagbista, nga ginasakdag sang internasyonal nga mga kasugtanan sang Russia kag sang konstitusyon sini.

^ par. 4 Sang Hunyo 1, 2015, gindeklarar sang mga korte sang Russia nga ekstremista ang 78 ka publikasyon sang mga Saksi ni Jehova. Nag-apelar ang mga Saksi sa sini nga mga desisyon sa mga korte sa Russia kag sa European Court of Human Rights.

^ par. 7 Sing espisipiko, ang deputy prosecutor ang nag-apelar (cassation appeal), kag ang Judicial Chamber for Civil Cases sang Korte Suprema ang nagdesisyon sa kaso.