Accessibility setting

Magpili sing lenguahe

Magdiretso sa segundaryo nga menu

Magdiretso sa kaundan

Mga Saksi ni Jehova

Hiligaynon

HULYO 1, 2014
RUSSIA

Ginkilala sang European Court of Human Rights ang Kinamatarong sang mga Saksi ni Jehova sa Rusya nga Magtipon Para Magsimba

Ginkilala sang European Court of Human Rights ang Kinamatarong sang mga Saksi ni Jehova sa Rusya nga Magtipon Para Magsimba

Sang Hunyo 26, 2014, ang European Court of Human Rights (ECHR) nagdesisyon pabor sa mga Saksi ni Jehova kag sa ila kinamatarong nga magsimba. Indi ini puede pauntaton sang awtoridad sang Rusya kon wala sing base sa kasuguan nga rason. Sa desisyon nga gin-ugyunan sang tanan, ginkilala sang Korte nga ginsupak sang Rusya ang Artikulo 5 (kinamatarong sa kahilwayan kag seguridad) kag 9 (kahilwayan sa panghunahuna, konsiensia, kag relihion) sang European Convention on Human Rights (Convention) sang ginpalibutan kag ilegal nga gin-raid sang mga pulis ang isa ka relihioso nga pagtilipon sang gab-i sang Abril 12, 2006.

Sina nga gab-i, ang mga Saksi ni Jehova sa bilog nga kalibutan nagatipon para sa ila relihioso nga pagdumdom sang kamatayon ni Jesucristo kada tuig. Gin-arkilahan sang duha ka kongregasyon sa Moscow ang isa ka awditoryum sang eskwelahan para sa sining espesyal nga miting kag ginapaabot nga sobra 400 ang matambong. Samtang ginahiwat ini nga miting, napulo ka salakyan kag duha ka minibus sang armado nga yunit sang Special Police Force (OMON) kag madamo nga nakauniporme nga pulis ang nag-abot. Ginbutangan dayon nila sing cordon ang bilding, kag bisan wala sing dala nga warrant, ginpauntat nila ang relihioso nga pagtilipon. Ginpagua nila ang tanan nga tumalambong sa bilding, gin-search ang awditoryum, ginkumpiskar ang relihioso nga mga literatura, kag pilit nga gindala ang 14 ka lalaki nga tumalambong sa presinto kag gin-aresto sila. Ang abogado nga gintawgan para magrepresentar sa gin-aresto nga mga Saksi nag-abot sa presinto para buligan sila. Ginrekisa sia sang mga pulis, gintikwang, gintayaan sing kutsilyo sa liog, kag ginpahog nga kon magpasaka sia sing kaso, may malain nga matabo sa iya pamilya. Pagligad sang halos apat ka oras, ginbuy-an sila kag ginpapauli.

Si Nikolay Krupko nga nanguna sa pagpasaka sing panumbungon

Si Nikolay Krupko, upod sa tatlo pa ka Saksi nga gin-aresto, nagpasaka sing panumbungon batok sa awtoridad bangod sa ilegal nga paggamo sa isa ka relihioso nga miting kag pag-aresto sa ila. Pero sang wala ginbaton sang Lyublino District Court kag sang Moscow City Court ang ila reklamo, ini nga mga lalaki nagpasaka sang aplikasyon sa ECHR sang Hunyo 2007.

Sa Hunyo 26 nga desisyon sini nga natig-uluhan Krupko and Others v. Russia, ang ECHR nagsiling: “Nagapanindugan ang Korte nga bisan sa mga kaso diin wala napahibalo sa mga awtoridad nga may isa ka publiko nga pagtilipon pero ang mga tumalambong sini indi man makatalagam sa komunidad, ang pagpauntat sang mga pulis sa sining mahim-ong nga pagtilipon indi makabig nga ‘kinahanglan sa isa ka demokratiko nga katilingban.’ . . . Labi pa gid ini nga maaplikar sa sini nga kaso diin ang pagtilipon indi maggamo nga pagtilipon sa gua kundi isa ka solemne nga relihioso nga okasyon sa sulod sang isa ka tilipunan kag wala gid nagadisturbo ukon nagabutang sa publiko sa katalagman. Ang pagpasilabot sang madamo nga armado nga pulis para pauntaton ini nga okasyon bisan pa nagapati ang awtoridad nga ilegal ini kay wala sila mapahibalo sing abanse, dayon pag-aresto sa sini nga mga lalaki kag pagdala sa ila sa presinto sing tatlo ka oras, indi masiling nga pag-amlig sa komunidad.”

Amo ini ang ikap-at nga desisyon batok sa Rusya bangod sang ila pagsupak sa kinamatarong sang mga Saksi ni Jehova. Sa isa ka desisyon sini sang 2007 nga natig-uluhan Kuznetsov and Others v. Russia, nagdesisyon ang ECHR nga ginsupak sang Rusya ang Convention sang ilegal nga ginpauntat sang lokal nga mga awtoridad ang pagtilipon sang mga Saksi nga may diperensia sa pagpamati sa Chelyabinsk. Sang 2010, nagdesisyon ang ECHR batok sa Rusya sa kaso nga Jehovah’s Witnesses of Moscow v. Russia, diin ilegal nga ginpauntat kag gindumilian sang Moscow City Prosecutor’s Office ang legal nga korporasyon sang mga Saksi sa Moscow. Sang 2013, nagdesisyon ang ECHR sa kaso nga Avilkina and Others v. Russia nga ginsupak sang Rusya ang mga kinamatarong sa privacy sang nagsugo ang St. Petersburg City Prosecutor’s Office nga ipagua ang kompidensial nga medikal nga impormasyon.

Ang mga desisyon sang ECHR dugang nga pamatuod nga ang mga awtoridad sa Rusya, sa ila panikasog nga pauntaton ang pagsimba sang mga Saksi ni Jehova didto, nagsupak sa kinamatarong nga ginagarantiyahan sang Constitution of the Russian Federation kag sang Convention.