Accessibility setting

Magpili sing lenguahe

Magdiretso sa segundaryo nga menu

Magdiretso sa kaundan

Mga Saksi ni Jehova

Hiligaynon

NAGORNO-KARABAKH

Ara sa Prisuhan Bangod sa Ila Pagtuo

Ara sa Prisuhan Bangod sa Ila Pagtuo

Sa Nagorno-Karabakh, ang mga Saksi ni Jehova nga ara na sa edad para magsoldado ginapriso kay nagapangindi sila nga magsoldado bangod sa ila konsiensia. Wala ginakilala sang gobierno ang ila kinamatarong kag wala man sing may ginahatag nga alternatibo nga serbisyo para sa mga sibilyan. Gani, ginapriso ang pamatan-on nga mga Saksi bangod sa ila relihioso nga pagpati nga indi makig-away.

Wala Ginhatag ang Pangabay nga Maghimo sing Alternatibo nga Serbisyo Para sa mga Sibilyan

Sang Enero 29, 2014, ginpatawag sang Askeran City Military Commissariat si Artur Avanesyan, nga isa sa mga Saksi ni Jehova, para magsoldado. Pagkaaga, nag-file sing aplikasyon si Mr. Avanesyan sa Nagorno-Karabakh Military Commissariat para magpangabay sing alternatibo nga serbisyo para sa mga sibilyan sa baylo nga magsoldado. Ang iya abogado gilayon nga nakig-istorya sa mga opisyal sa Nagorno-Karabakh kag Armenia kag daw pasugtan man si Mr. Avanesyan nga maghimo sing alternatibo nga serbisyo para sa mga sibilyan sa Armenia.

Sa paglaum nga pasugtan sia, si Mr. Avanesyan nagsaylo sa Armenia kag nag-file sing aplikasyon para sa alternatibo nga serbisyo para sa mga sibilyan sa Republic of Armenia Masis Military Commissariat sang Pebrero 13, 2014. Abi ni Mr. Avanesyan maatubang sia sa komite para sa alternatibo nga serbisyo sa Armenia sang Hulyo 14, 2014, pero sina mismo nga adlaw ginpatawag sia nga magreport sa central police station sa Yerevan. Pag-abot niya sa presinto, ginahulat na sia sang mga pulis nga halin pa sa Nagorno-Karabakh. Gindakop sia kag gindala sa Nagorno-Karabakh. Pagkaaga, ginpriso sia kag ginbista sa Nagorno-Karabakh First Instance Court.

Samtang ginabista sia, nabal-an niya nga apat ka bulan antes sini, nagsugo na gali ang korte nga dakpon sia kag prisuhon samtang nagahulat sang pagbista sa iya. Ginsuportahan sang korte ang desisyon sini sadto, kag gilayon nga ginpriso si Mr. Avanesyan. Ginbasura sang korte ang tanan nga pag-apelar parte sa pagpriso sa iya antes pa sia ginbista.

Sang Septiembre 30, 2014, ginpamatbatan sang korte si Mr. Avanesyan kag ginsentensiahan sing 30 ka bulan nga pagkapriso. Ginsuportahan sang Appeal Court ang desisyon. Nag-apelar si Mr. Avanesyan sa Korte Suprema sang Nagorno-Karabakh, pero sang Disiembre 25, 2014, ginsuportahan sang Korte ang sentensia sa iya.

Padayon nga ginapriso sang Nagorno-Karabakh ang mga pamatan-on nga lalaki nga nagatuman sa ila nahanas sa Biblia nga konsiensia. Sa amo, padayon nga ginasupak sini ang internasyonal nga mga pagsulundan nga nagatugot sa mga nagapangindi nga magsoldado bangod sa konsiensia nga maghimo sing alternatibo nga serbisyo para sa mga sibilyan.

Time Line

  1. Disiembre 25, 2014

    Ginsuportahan sang Korte Suprema sang Nagorno-Karabakh ang sentensia kay Artur Avanesyan.

  2. Septiembre 30, 2014

    Si Artur Avanesyan ginpamatbatan sang Martakert, Nagorno-Karabakh First Instance Court kag ginsentensiahan sing 30 ka bulan nga pagkapriso.

  3. Hulyo 14, 2014

    Si Artur Avanesyan gindakop sa Armenia kag gindala sa Nagorno-Karabakh para prisuhon bisan wala pa mabista.

  4. Disiembre 30, 2011

    Si Karen Harutyunyan, 18 anyos nga Saksi, ginsentensiahan sing 30 ka bulan nga pagkapriso kay nagpangindi sia nga magsoldado bangod sa konsiensia.

  5. Pebrero 16, 2005

    Si Areg Avanesyan, isa sa mga Saksi ni Jehova, ginsentensiahan sing 48 ka bulan nga pagkapriso kay nagpangindi sia nga magsoldado bangod sa konsiensia.

  6. Hunyo 12-13, 2001

    Tatlo ka Saksi, nga nagpangindi nga magsoldado bangod sa konsiensia, ang ginsentensiahan sing anom ka bulan asta isa ka tuig nga pagkapriso, kay indi sila mag-entra sa military training.