Accessibility setting

Magpili sing lenguahe

Magdiretso sa segundaryo nga menu

Magdiretso sa kaundan

Mga Saksi ni Jehova

Hiligaynon

ERITREA

Ara sa Prisuhan Bangod sa Ila Pagtuo

Ara sa Prisuhan Bangod sa Ila Pagtuo

Sa Eritrea, ang mga Saksi ni Jehova kag ang iban pa nga magagmay nga relihion ginadakop kag ginapriso bisan wala mabista ukon pormal nga mapasakaan sing kaso. Ang Saksi nga mga lalaki kag babayi, pati mga kabataan kag mga tigulang, ginapriso bangod sa paghimo sang mga hilikuton sang ila relihion ukon bangod sa wala mahibaluan nga mga rason. Ang pamatan-on nga mga lalaki ginapriso kay nagapangindi sila nga magsoldado bangod sa konsiensia.

Sang nangin independiente nga pungsod ang Eritrea sang 1993, ang mga Saksi ni Jehova nadulaan sang ila pundasyon nga kahilwayan. Ginkanselar ni Presidente Afewerki ang ila pagkabanwahanon (citizenship) paagi sa Presidential Decree nga napetsahan Oktubre 25, 1994, bangod ang mga Saksi wala nagboto sa independence referendum sang 1993 kag wala sila nagasoldado bangod sa konsiensia. Sugod sadto, ginatinguhaan gid sang awtoridad nga ipanghiwala sang mga Saksi ni Jehova ang ila pagtuo, gani ginapriso sila, ginapaantos, kag ginagamo.

Wala Mahibaluan nga Kalawigon sang mga Sentensia sa Mabudlay Kaayo nga mga Sitwasyon

Sanday Paulos Eyassu, Isaac Mogos, kag Negede Teklemariam, ginpriso halin pa sang Septiembre 24, 1994, kay nangindi sila nga magsoldado bangod sa konsiensia. Ang iban nga mga Saksi ginpriso sa mga container van, kag ang iban naman sa prisuhan nga bato ukon metal nga nalubong ang katunga sa duta. Ang 62 anyos nga si Misghina Gebretinsae napatay sang Hulyo 2011, bangod sa sobra kaayo nga init samtang ara sa prisuhan sa lugar nga para sa mga ginasilutan nga ginatawag “underground” sa Meitir Prison Camp. Napatay man ang 68 anyos nga si Yohannes Haile sang Agosto 16, 2012, pagkatapos sang halos apat ka tuig nga pagkapriso sa Meitir Camp sa pareho man nga sitwasyon. Ang pila sa mga Saksi nga napriso sa Meitir Camp ginpagua sang nagmasakit sila sing grabe.

Mga Gindakop Sining Karon Lang

Sang Oktubre 25, 2015, duha babayi nga Saksi ni Jehova ang gindakop samtang nagahimo sang hilikuton sang ila relihion. Ang isa sa ila, nga isa ka foreigner nga nagabisita sa iya mga paryente sa Eritrea, ginhilway pagkatapos sang isa ka semana nga pagkapriso. Pero ang iya upod, nga 53 anyos nga taga-Eritrea, ara gihapon sa prisuhan.

Time Line

  1. Marso 9, 2016

    May 54 na ka Saksi nga ara sa prisuhan, bisan wala mabista ukon pormal nga mapasakaan sang kaso.

  2. Disiembre 22, 2015

    May 55 na ka Saksi nga ara sa prisuhan, bisan wala mabista ukon pormal nga mapasakaan sing kaso.

  3. Septiembre 17, 2015

    May 54 na ka Saksi nga ara sa prisuhan, bisan wala mabista ukon pormal nga mapasakaan sing kaso.

  4. Enero 23, 2015

    May 58 na ka Saksi nga ara sa prisuhan, bisan wala mabista ukon pormal nga mapasakaan sing kaso.

  5. Disiembre 12, 2014

    May 64 na ka Saksi nga ara sa prisuhan, bisan wala mabista ukon pormal nga mapasakaan sing kaso.

  6. Hulyo 25, 2014

    Kalabanan sang gindakop sang Abril 14 ginpagua, pero 20 sa mga gindakop sang Abril 27 ang ara gihapon sa prisuhan; kon totalon, 73 ka Saksi ang ara sa prisuhan.

  7. Abril 27, 2014

    Gindakop ang 31 ka Saksi samtang nagatipon sila para magtuon sing Biblia.

  8. Abril 14, 2014

    Sobra 90 ka Saksi ang gindakop samtang nagatipon sila para sa tuigan nga pagsaulog sang Memoryal sang kamatayon sang Cristo.

  9. Nobiembre 2013

    May 52 na ka Saksi nga ara sa prisuhan sa mabudlay kaayo nga sitwasyon.

  10. Agosto 16, 2012

    Napatay si Yohannes Haile, 68 anyos, samtang ginapriso sa mabudlay kaayo nga sitwasyon.

  11. Hulyo 2011

    Napatay si Misghina Gebretinsae, 62 anyos, samtang ginapriso sa mabudlay kaayo nga sitwasyon.

  12. Hunyo 28, 2009

    Gin-raid sang mga awtoridad ang puluy-an sang isa ka Saksi samtang nagatipon sila para magsimba. Gindakop nila ang tanan nga 23 ka Saksi nga nagtambong, nga nagaedad sing 2 asta 80. Naglab-ot na sa 69 ang kadamuon sang mga Saksi nga ara sa prisuhan.

  13. Abril 28, 2009

    Magluwas sa isa, ang tanan nga Saksi ni Jehova nga ginpriso sa mga presinto ginsaylo sa Meitir Prison Camp.

  14. Hulyo 8, 2008

    Gin-raid sang mga awtoridad ang mga balay kag mga ulubrahan para dakpon ang 24 ka Saksi, nga ang kalabanan amo ang nagasagod sang ila mga pamilya.

  15. Mayo 2002

    Gindilian sang gobierno ang tanan nga relihion nga wala malakip sa apat ka relihion nga may pahanugot sang gobierno.

  16. Oktubre 25, 1994

    Sa isa ka Presidential Decree, ang mga Saksi ni Jehova ginkuhaan sing sibil nga kinamatarong kag sing kinamatarong bilang mga banwahanon.

  17. Septiembre 24, 1994

    Sanday Paulos Eyassu, Isaac Mogos, kag Negede Teklemariam ginpriso bisan wala mapasakaan sing kaso ukon mabista, kag ara sila gihapon sa prisuhan asta subong.

  18. Dekada 1940

    Sa una nga tion, gintukod ang organisasyon sang mga Saksi ni Jehova sa Eritrea.