Accessibility setting

Magpili sing lenguahe

Magdiretso sa segundaryo nga menu

Magdiretso sa kaundan

Mga Saksi ni Jehova

Hiligaynon

SEPTIEMBRE 24, 2014
ERITREA

Beinte ka Tuig nga Pagkapriso sa Eritrea—Matapos Pa Ayhan?

Beinte ka Tuig nga Pagkapriso sa Eritrea—Matapos Pa Ayhan?

Sang nagligad nga 20 ka tuig, may tatlo ka pamatan-on nga lalaki nga gin-aresto sang mga awtoridad sa Eritrea kag ginpriso sila sa Sawa, diin makaluluoy gid ang sitwasyon kag wala gihapon sila makagua asta subong. Wala sila ginkasuhan sang bisan ano nga krimen, ukon ginhatagan sing kahigayunan nga pangapinan ang ila kaugalingon sa korte. Pero ngaa ginpriso sila bisan wala sila sing sala?

Sanday Paulos Eyassu, Negede Teklemariam, kag Isaac Mogos mga Saksi ni Jehova, kag nangindi sila nga magsoldado bangod sang ila malig-on nga relihioso nga panindugan. Kon ginkasuhan sila sang “krimen” tungod sang ila pagpangindi nga magsoldado, kuntani maathag ang kalawigon sang pagkapriso nga ginsentensia sa ila. Subong, si Paulos nga 41 anyos na kag sanday Negede kag Isaac nga pareho nga 38 anyos na ara gihapon sa prisuhan. Gin-agaw sa ila ang kahigayunan nga mangasawa kag magpamilya, masuportahan ang ila nagatigulang nga mga ginikanan, ukon magkabuhi sing hilway. Gin-agaw man sa ila ang kahigayunan nga magsimba upod sa ila mga masigkatumuluo.

Pagkatapos nga gin-aresto sila sang Septiembre 24, 1994, sanday Paulos, Negede, kag Isaac ginpintasan kag gin-torture pa gani sang mga awtoridad sa prisuhan sa Sawa. Pero sining nagligad nga tinuig, nag-untat na ang pagpamintas sa ila, kag bangod sang ila malig-on nga panindugan sa ila relihioso nga mga pagpati, ginarespeto na sila sang mga guardia.

Makaluluoy nga sitwasyon sang iban pa nga Saksi sa prisuhan

Sa Eritrea naagyan sang mga Saksi ni Jehova ang pinakamapintas nga paghingabot. Samtang ginasulat ini nga artikulo, 73 ka Saksi ang ara sa prisuhan, pati ang mga babayi, bata, kag mga tigulang. Madamo ang nagbatas sa pagpaantos sa desyerto, kakulang sing pagkaon kag tubig, kag pagmaltratar sang mga opisyal sa prisuhan. May tatlo pa ka Saksi nga lalaki nga sobra na pulo ka tuig nga napriso sa Sawa, pero sanday Paulos, Negede, kag Isaac ang mga Saksi nga pinakamadugay na nga ginapriso sa Eritrea.

Nagapanawagan ang bilog nga kalibutan nga untaton na ang paghingabot bangod sa relihion sa Eritrea

Nahibaluan gid sang bilog nga kalibutan nga ginapintasan sang Eritrea ang mga Saksi ni Jehova didto kag ang iban pa nga grupo sang mga relihion.

  • Kada tuig sugod sang 2004, ginakabig sang U.S. Department of State ang Eritrea nga “pungsod nga balantayan,” nga nagapatuhoy sa “bisan ano nga pungsod nga ang gobierno nagapakigbahin ukon nagabalewala sang naplano, wala untat kag maathag nga pagsupak sa kahilwayan sa relihion.”

  • Ginpahayag sang United Nations Human Rights Council ang ila kabalaka sa “grabe nga pagtapak sang awtoridad sang Eritrea sa tawhanon nga kinamatarong sang ila mismo pumuluyo kag masigkabanwahanon.” Nagapanawagan ini sa gobierno sang Eritrea “nga tahuron ang kinamatarong sang kada isa nga mangin hilway . . . sa panghunahuna, konsiensia kag relihion ukon pagpati.”

  • Nagsiling ang U.S. Commission on International Religious Freedom sa Tuigan nga Report sini para sa 2014: “Ang apektado gid sang kahilwayan sa relihion amo ang . . . mga Saksi ni Jehova.”

  • Nagsiling ang Human Rights Watch sa ila World Report sang 2013 nga padayon nga ginaaresto, ginapriso, kag gina-torture ang mga miembro sang “indi kilala” nga mga relihion kag nga “ang mga Saksi ni Jehova ang pirme ginabiktima.”

  • Sang Disiembre 2005 nag-ugyon ang African Commission on Human and Peoples’ Rights sa Resolution on the Human Rights Situation in Eritrea, nga nagapanawagan sa Eritrea nga “garantiyahan, sa tanan nga tion, ang kinamatarong sa patas nga pagbista, kahilwayan sa opinyon kag pagpahayag subong man ang kinamatarong sa malinong nga pagtilipon.”

Si Philip Brumley, ang general counsel sang mga Saksi ni Jehova, naghambal para sa mga Saksi sa bilog nga kalibutan: “Nagalaum gid kami nga hilwayon sang gobierno sang Eritrea ang tanan nga ginpriso nga Saksi, lakip ang tatlo ka lalaki nga ara sa prisuhan sa sulod na sang 20 ka tuig, kag untatan na ang paghingabot sa amon mga masigkatumuluo.”