Skip to content

Skip to table of contents

Abatemwe ba Yehova

Select language Ekihavu

 ESOMO 12

Gurhe Wakayegera Mungu?

Gurhe Wakayegera Mungu?

1. Mungu ayumva ngasi sala?

Mungu ahemere abantu ba ngasi buko bamuyegere kugerera esala. (Zaburi 65:2) Aliko Mungu arhayumva cangwa ayemere ngasi sala. Omufano, esala ly’omulume otesa mukage Mungu arhakaliyunva. (1 Petro 3:7) Mira amango aba Isiraeli bagendereraga kukola ebyaha, Mungu alahire kuyunva esala zabo. Biyumvikene okw’ esala cirhali cintu c’amasharha. Aliko Mungu ankayumva esala za ngasi muntu omugalukira naciro akaba akolere ecaha cikomere.​—Soma Isaya 1:15; 55:7.

2. Gurhe rhukwanene kusalira?

Esala lili cicira ciguma c’amahuno merhu, cecirhumire rhukwanene kusalira omulemi werhu Yehova yenyine. (Matayo 4:10; 6:9) Kandi bulala rhurhali batakatifu rhukwanene kusalira kugerera ezino lya Yesu kubulala afaga enyanya z’ebyaha byerhu. (Yohana 14:6) Yehova arhasima yunva esala rhwafarhire omu rhwe cangwa ziyandikirwe. Aba alonzeze kuyunva esala zirhurhengere oku murhima.​—Soma Matayo 6:7; Wafilipi 4:6, 7.

Omulemi werhu akayunva n’esala rhuderhere omu murhima. (1 Samueli 1:12, 13) Arhuhunire kusalira ngasi mango, esezi cangwa egolo embere z’okulya n’akasanzi rhuhangayikire.​—Soma Zaburi 55:22; Matayo 15:36.

3. Bici birhumire Abakirisu bakwanene kukusanyikira haguma?

Zene birhayoroheze kuyegera Mungu bulala rhulamire n’abantu barhacizera Mungu kandi banashekera endaganyo yage y’okulerha omurhula omw’igulu. (2 Timoteyo 3:1, 4; 2 Petro 3:3, 13) Cecirhumire rhukenere kushimanana  haguma nabandi bakirisu yi rhuhebana emurhima.​—Soma Waebrania 10:24, 25.

Kucigwasanya n’abantu basima Mungu birhugwasa kumuyegera. Emikusanyiko y’Abatemwe ba Yehova erhuma rhwayigira oku kucizera kw’abandi.​—Soma Waroma 1:11, 12.

4. Oku wakayegera Mungu

Kurhola akasanzi k’okuwaza bwenene oku bintu wayigire omu mwazi gwa Mungu byakakugwasa kuyegera Yehova. Waza oku bintu akolere, empanulo zage neby’arhulaganyize. Kusalira n’okuwaza bwenene enyanya z’ebyo bintu birhuma rhwasima bwenene obuzigire bwa Mungu n’obwenge bwage.​—Soma Yosuwa 1:8; Zaburi 1:1-3.

Akaba ogwerhe obwemere n’okucizera Mungu by’okuli, wankamuyegera. Aliko omenye ok’obwemere buli nka murhi, y’omurhi gumera bwinja gukenera amenji. Okwanene kulisa obwemere bwawe ngasi mango wawaza oku cirhuma wayemera ebi wayigire.​—Soma Matayo 4:4; Waebrania 11:1, 6.

5. Gurhe kuyegera Mungu nji byakujirira akamaro?

Yehova ahangayikira boshi bamusima. Akabalanga ebintu byankabihya obwemere bwabo n’ebyankaheza obunihire bwabo bw’okulama esiku zoshi. (Zaburi 91:1, 2, 7-10) Anarhuhanula yirhucilanga ebyakabihya amagala merhu n’okuheza omwishingo gwerhu. Yehova yenarhuyigiriza kulama bwinja.​—Soma Zaburi 73:27, 28; Yakobo 4:4, 8.