Skip to content

Shimbukira oku mukololo gw'ebili mo

 ESURA YE 17

Esala: luhembo lurhengerere emwa Mungu

Esala: luhembo lurhengerere emwa Mungu

“Omulemi w’embingu n’egulu asimire okuyunviriza amasala merhu.—Zaburi 115:15

1, 2. a) Bulagurhe owazize oku esala luli luhembo lwinja? b) Bulagurhe bili by’akamaro okumenya ebye Biblia ederhere kuyerekera esala?

OMU kulola byoshi Mungu alemere, egulu lili ligeke bwenene. Amango Yehova ali alola egulu, anabona abantu b’amashanja moshi nka murhonyi gwa menji omu mbegeti. (Zaburi 115:15; Isaya 40:15) Chiro akaba arhubona ntyo, olwandiko lwa Zaburi 145:18, 19 luderhere oku “Yehova ali hofi na balala boshi bamuhamagala, balala bamuhamagala omu bukweri. Anayeneza enyifinjo za balala bamuyubaha, anayunva empamagalo yabo y’okuhema oburhabale, anabachungula.” Yehova Mulemi ogala byoshi, asimire abe hofi nerhu, anasimire abe Mwira werhu! Asimire ayunvirize amasala merhu! Okuderha okuli esala luli luhembo lwinja, lunali lukengo bwenene Yehova ahere nkasi yeshi.

2 S’aliko, Yehova akarhuyunviriza amango rhuli rhwaganira naye omu njira ayemerere. Rhulolage ebye Biblia ederhere kuyerekera esala.

BULAGURHE RHUKWANENE OKUSALIRA YEHOVA?

3. Bulagurhe rhukwanene okusalira Yehova?

3 Yehova asimire oganire naye omu sala. Gurhe rhumenyere ntyo? Osome Wafilipi 4:6, 7. Owaze bwenene oku bi Yehova akuhemere okole; Omulemi w’ebintu byoshi akuhangayikire bwenene, anasimire omubwire okuntu oli wachiyunva n’ebibazo byawe.

4. Bulagurhe okusalira Yehova buli mango, kwakakurhabala ogwarhe obwira bukomere haguma naye?

 4 Esala lyakurhabala okuze obwira bwawe haguma na Yehova. Amango abera bali babwirana ebibawazize, n’amango bali babwirana ebibazo byabo, n’oku balibachiyunva koshi, obwira bwabo bwanakomera bwenene. Kubinaba amango rhulirhwasalira Yehova. Omu Biblia, akubwirire eby’awaza, okuntu achiyunva, n’ebi nj’ajira omu siku zayija. Nawe wakamubwira ok’oliwachiyunva omu murhima nkasi mango. Amango oliwajira ntyo, obwira bwawe haguma naye bwanakomera bwenene.​—Yakobo 4:8.

GURHE RHWAKAJIRA YI MUNGU ARHUYUNVIRIZA?

5. Gurhe rhumenyere oku Yehova arhayunviriza amasala moshi?

5 Yehova anayunviriza amasala moshi si? Nanga. Omu mango m’omulebi Isaya, alibwirire abaizraeli ntya: “Chiro mwasalira bwenene, inta yunviriza; efune zenyu ziyunjulirene eshagama.” (Isaya 1:15) Akaba rhurhalolere bwinja, rhwakajira ebintu byarhukula haguma na Yehova. N’omu ntyo, arhakachiyunva amasala merhu.

6. a) Bulagurhe obwemere buli bw’akamaro bwenene? b) Gurhe wakayerekana ok’oherhe obwemere mu Mungu?

 6 Akaba rhusimire Yehova ayunvirize amasa merhu, rhukwanene okugwarha obwemere mu yewe. (Marko 11:24) Entumwa Paulo yaliderhere ntya: “Buzira bwemere, bikomere okusimisa Mungu, bulala olala oli wayegera Mungu, akwanene okuyemera oku abaho n’okw’anaba olala ogisha balala bamulonza n’omurhima goshi.” (Waebrania 11:6) S’aliko, okuderha konyine oku rhuherhe obwemere mu Mungu, kurhatosheze. Rhukwanene okuyerekana ntyo omu kumukenga esiku zoshi.​—Osome Yakobo 2:26.

7. a) Bulagurhe rhukwanene okuchiheba eshishi n’okuchikenga amango rhuli rhwasalira Yehova? b) Gurhe rhwakayerekana oku rhuli bantu b’emirhima minja amango rhuli rhwasalira?

7 Rhukwanene okuchiheba eshishi n’okuchikenga amango rhuli rhwasalira Yehova. Bulagurhe? Nka rhwaja kuganira na mwami, changwa n’omukulu w’echihugo, rhukwanene jira ntyo n’obukenge. Yehova ye Mungu Ogala Byoshi. K’okuderha oku rhukwanene kuganira naye oku bukenge bunene n’okuchiheba eshishi bwenene. (Mwanzo 17:1; Zaburi 138:6) Amango rhwamasalira, rhukwanene okubwira Yehova byoshi bili omu murhima gwerhu; n’akaba rhuli bantu b’emirhima minja, rhurhakwanene okugalukira-galukira ebyola binwa buli mango.​—Matayo 6:7, 8.

8. Gurhe rhukwanene okujira amango hali echintu rhuli rhwasalirira?

8 Kandi rhukwanene okukola kuguma n’okurhwasaliraga, amango hali echintu rhuli rhwasalirira. Omufano, nka rhuhemere Yehova arhuhe echirhukenere yi rhulama, rhurhakwanene kuba bolokazi. Rhurhakwanene kuwaza oku hali echintu arhuha, nka rhurhakolere. Rhukwanene okukola bwenene n’okuyemera buli kasi koshi rhwakagala kukola. (Matayo 6:11; 2 Watesalonike 3:10) Changwa amango rhwamasalira Yehova arhurhabale rhulekane n’echintu chibi, rhukwanene okulekana na buli njira yoshi yakarhuma  rhwakola echola chintu. (Wakolosai 3:5) Nantyo, rhushubizage ku bibazo biguma abantu banachibaza bwenene oku bilolere esala.

EBIBAZO BIGUMA ABANTU BANACHIBAZA BWENENE OKU BILOLERE ESALA

9. a) Inde rhukwanene kusalira? b) Bichi olwandiko lwa Yohana 14:6 lurhuyigirize kuyerekera esala?

9 Inde rhukwanene kusalira? Yesu alirhuyigirize kusalira “Darha oli omu mbingu.” (Matayo 6:9) Anashuba derha ntya: “Nyono ny’enjira, n’okuli, n’obuguma-guma. Nta muntu wakaja emwa Darha, buzira kugerera emunda indi.” (Yohana 14:6) K’okuderha oku rhukwanene okusalira Yehova yenyine. Rhunakwanene rhujire ntyo kugerera Yesu changwa kugerera ezino lya Yesu. Bichi ebyola bilonzeze kuderha? Rhukwanene okukenga akasi Yehova ahere Yesu, y’ayemera amasala merhu. Nk’okurhwayigire, Yesu ayinjaga oku gulu y’arhuchungula omu chaha n’olufu. (Yohana 3:16; Waroma 5:12) Kandi Yehova amujirire Mudahwa (kuhani) Mukulu na Muzuzi.​—Yohana 5:22; Waebrania 6:20.

Wakamusalira buli kasanzi

10. Hali okuntu rhwukwanene okuchifarha nka rhuli rhwasalira si?

10 Hali okuntu rhukwanene okuchifarha nka rhuli rhwasalira si? Nanga. Yehova arharhuhemere rhufukame, rhuyumange changwa rhuyikale amango rhwasalira. Ebiblia erhuyigirize oku rhwakasalira mu buli kuntu koshi rhuchifarhire, kuyerekene obukenge. (1 Mambo ya Nyakati 17:16; Nehemia 8:6; Danieli 6:10; Marko 11:25) Echintu Yehova abona oku chili ch’akamaro, arhali okuntu rhuchifarhire, s’aliko ebi rhwamubwira birhengere omu murhima gwerhu. Rhwakasalira Yehova oku mulenge changwa omu murhima; buli hantu hoshi rhwakaba rhuli, buli kasanzi, ezuba changwa n’obudufu. Rhwakayemera oku Yehova akarhuyunviriza, chiro akaba nta windi muntu oli warhuyunva.​—Nehemia 2:1-6.

11. Rhwakasalira Yehova oku bilolere bintu bichi?

 11 Rhwakasalira oku bilolere bintu bichi? Rhwakasalira Yehova ku buli chintu choshi, amango ebirhwamuhemaga bipatene n’obulonza bwage. Ebiblia ederhere “oku chiro rhwamuhema buli chintu choshi chipatene n’obulonza bwage, arhuyunviriza.” (1 Yohana 5:14) Rhwakasalira eju y’echintu chirhulolere rhwenyine si? Nechi. Okusalira Yehova kuli kuguma n’okuganira n’omwira mwinja. Rhwakamubwira buli choshi chirhubabeze na buli koshi rhuli rhwachiyunva. (Zaburi 62:8) Rhwakamusalira arhurhabale n’eroho lyage lichesibwa yi rhukola ebikwirire. (Luka 11:13) Kandi, rhwakamuhema arhuhe obwenge b’okurhurhabala rhuchishoge bwinja eby’okujira n’emisi y’okulwisa ebibazo. (Yakobo 1:5) Rhwakanamuhema arhubabalire oku byaha byerhu. (Waefeso 1:3, 7) Rhwakanasalilira abandi; omufano: eju y’omulala gwerhu, bene berhu na bali berhu b’omu chibaga (kutaniko).​—Matendo 12:5; Wakolosai 4:12.

12. Bichi bikwanene okuba bintu by’oburhanzi omu masala merhu?

12 Bichi bikwanene okuba by’oburhanzi omu masala merhu? Yehova n’obulonza bwage. Rhwakamubwira koko n’omurhima gwerhu goshi, ku byoshi anarhukolera. (1 Mambo ya Nyakati 29:10-13) Bichi birhuyemezeze ntyo? Amango Yesu aliri kunola gulu, aliyigirize abanafunzi bage kusalira. (Osome Matayo 6:9-13.) Aliderhere oku bihemere okurhanga kusalira ezino lya Mungu licheswe (k’okuderha oku rhukwanene rhulibone oku lili lichesibwa), n’enyuma y’ahola, Obwami bwage buyinje n’obulonza bwage bujirike oku gulu. Aliderhere oku amango rhwamamala kusalira oku bilolere ebyola bintu by’akamaro, yi rhwakaja rhwasalilira ebi rhulagirire. Amango rhuhebere Yehova n’obulonza bwage embere omu masala merhu, rhwanayerekana oku bili bintu by’akamaro omu kalamo kerhu.

13. Amasala merhu makwanene kugwarha bule bungana gurhe?

 13 Amasala merhu makwanene okugwarha bule bungana gurhe? Ebiblia erhaderhere. Amasala merhu makaba mayufihire changwa makaba malehere kuyerekera nk’oku ebintu bili. Omufano, rhwakasalira amayufihire embere y’okulya. S’aliko, makaleha bwenene amango rhuli rhwasimirira Yehova changwa rhuli rhwamubwira ebibazo byerhu. (1 Samweli 1:12, 15) Rhurhakwanene kusalira amasala malehere omu kuchiyerekana oku bandi,  nk’oku bantu baguma baliri bajira omu mango ma Yesu. (Luka 20:46, 47) Yehova arhasimiswa n’amasala mali kuguma n’amola. Okuderha ebirhengerere omu murhima gwerhu, by’eby’akamaro emwage.

14. Kanga rhukwanene kusalira? Na bichi ebyola birhuyigirize eju ya Yehova?

14 Kanga rhukwanene kusalira? Yehova arhuhemere rhuganire naye buli kasanzi. Ebiblia erhubwirire oku rhukwanene “okusalira buzira kuleka,” “okurhaleka okusalira,” “n’okugenderera kusalira.” (Matayo 26:41; Waroma 12:12; 1 Watesalonike 5:17) Esiku zoshi Yehova aliho omu kurhuyunviriza. Buli lusiku rhukwanene oku musimirira eju y’obuzigire bwage n’eju ya byoshi anarhukolera. Kandi, rhwakamuhuna arhuyerekeze, arhurhulirize changwa arhuhe emisi. Nka rhurholere esala nka luhembo lwinja lurhengerere  emwa Yehova, rhwamusalira buli kasanzi amango rhwabwene okuntu rhwakajira ntyo.

15. Bulagurhe rhukwanene okuderha “ame” oku buzinda bw’amasala merhu?

15 Bulagurhe rhukwanene okuderha “ame” oku buzinda bw’amasala merhu? “Ame” kuli kuderha “kubinali” changwa “bibe ntyo.” Okuderha “ame,” eli njira y’okuyerekana oku ebi rhwaderhaga birhengerere omu murhima gwerhu n’oku rhuyemerere ebi rhwaderhere omu sala lyerhu. (Zaburi 41:13) Ebiblia eshubire kurhuyigiriza oku byakaba binja okuderha “ame” (oku mulenge changwa omu murhima gwerhu) oku buzinda bw’esala ly’abantu banene yi rhuyerekana oku rhuyemerere ebyaderherwe.​—1 Mambo ya Nyakati 16:36; 1 Wakorinto 14:16.

GURHE MUNGU ANASHUBIZA OKU MASALA MERHU?

16. Yehova anashubiza oku masala merhu si?

16 Yehova anashubiza oku masala merhu si? Nechi. Ebiblia ederhere okw’ali olala “oyunviriza amasala.” (Zaburi 65:2) Yehova ayunviriza amasala marhengerere omu mirhima y’amamiliyoni m’abantu, anamashubizako omu njira zinene.

17. Gurhe Yehova anakolesa bamalayika n’abakozi bage bali oku gulu omu kushubiza oku masala merhu?

17 Yehova anakolesa bamalayika, n’abakozi bage bali oku gulu, y’ashubiza oku masala merhu. (Waebrania 1:13, 14) Omufano, bantu banene balisalirire Mungu abarhabale bamenyerere Ebiblia, n’enyuma ya siku zigeke, Omuhamirizi wa Yehova abalambagirira. Ebiblia eyerekene oku bamalayika banakola kasi kanene omu kuhubiri “emyazi minja.” (Osome Ufunuo 14:6.) N’oku bwindi, banene mu rhwewe balisalirire oku bilolere echibazo, changwa echi bakaba balagirire, n’enyuma y’ahola, mwene werhu changwa mwali werhu abarhabala n’echi balilagirire.​—Mezali 12:25; Yakobo 2:16.

Yehova akashubiza oku masala merhu omu kukolesa abakristu barhurhabale

18. Gurhe Yehova anakolesa eroho lyage lichesibwa ne Biblia omu kushubiza oku masala merhu?

 18 Kandi Yehova anakolesa eroho lyage lichesibwa omu kushubiza oku masala merhu. Amango rhwamuhemaga arhurhabale rhugale kulwisa echibazo rhwakaba rhuherhe, anakolesa eroho lyage lichesibwa omu kurhuyerekeza n’okurhuha emisi. (2 Wakorinto 4:7) Kandi, anakolesa Ebiblia omu kushubiza oku masala merhu, n’omu kurhurhabala rhuchishoge bwinja eby’okukola. Amango rhuli rhwayisoma, rhwakabona amandiko makarhurhabala. N’oku bunene, Yehova akakolesa omuntu ahane echishubizo oku mbuganano, aderhe echintu rhwalikenere okuyunva. Changwa akakolesa omushamuka w’echibaga arhubwire amawazo maguma me Biblia makarhubera m’akamaro.​—Wagalatia 6:1.

19. Bulagurhe rhwakagera amango rhwawaza oku Yehova arhashubiza oku masala merhu?

19 S’aliko, hali amango rhwakachibaza ntya: “Bulagurhe Yehova arhaza kushubiza oku masala mani?” Yehova amenyere mango machi na gurhe akashubiza oku masala merhu. Anamenyere bichi rhukenere. Omu bindi bintu biguma, rhukwanene okugenderera kumusalira n’omurhima gwerhu goshi, yi rhumuyereka oku kweri rhuherhe obwemere muyewe. (Luka 11:5-10) Ebindi bisanzi, anashubiza oku masala merhu omu njira rhurhaliwazize. Omufano, nka rhuli rhwasalira eju y’echibazo chikomere, ahali h’okuchimala, akarhuha emisi y’okuchilembera.​—Osome Wafilipi 4:13.

20. Bulagurhe rhukwanene okusalira Yehova buli mango?

20 Okuganira na Yehova omu sala luli lukengo lunene wah! Rhukwanene okuyemera oku anarhuyunviriza. (Zaburi 145:18) Oku rhwagenderera kumusalira n’omurhima gwerhu goshi, ku n’obwira bwerhu haguma naye bwakomera.