Skip to content

Shimbukira oku mukololo gw'ebili mo

 ESURA YE 18

Inkwanene okuchihana emwa Mungu n’okubatizwa si?

Inkwanene okuchihana emwa Mungu n’okubatizwa si?

1. Obola okola omenyere bukweri bunene bwe Biblia, nkabaga chibazo chihe oliwachibaza?

OMU kuyiga chinola chitabu, wayigire bukweri bunene bwe Biblia. Omufano, wamenyere obukweri eju y’abafire, obunihire b’obufuke n’echilagane ch’akalamo k’esiku n’amango. (Muhubiri 9:5; Luka 23:43; Yohana 5:28, 29; Ufunuo 21:3) Nkabaga oli waja oku mbuganano z’Abahamirizi ba Yehova n’okubona buzira ngangane oku bali baharamya Mungu omu njira nyinja. (Yohana 13:35) Oku bunene, bibonekene oku warhondere okukuza obwira haguma na Yehova, onasimire omukolere.  S’aliko nkabaga oliwachibaza ntya: “Bichi inkwanene kujira y’inkolera Mungu?”

2. Bulagurhe Muetiyopiya muguma alilonzeze abatizwe?

2 Muetiyopiya muguma walilamire omu mango ma Yesu, alichibazize bichi alikwanene kujira y’akolera Mungu. Siku zigeke enyuma y’obufuke bwa Yesu, muguma omu banafunzi bage w’aliyirikirwe Filipo, ahubiri oyola mulume. Filipo amuyemeza oku Yesu aliri Masiya. Oyola Muetiyopiya, asimiswa bwenene, av’aderha ntya: “Halaga amenji! Bichi bimbuzize okubatizwa?”​—Matendo 8:26-36.

3. a) Rhegeko lihe Yesu alihere abanafunzi bage? b) Bulyo bunchi rhukwanene okubatizwamo?

3 Ebiblia erhabishire, ederhere oku akaba olonzeze kukolera Yehova, okwanene obatizwe. Yesu alihere abanafunzi bage erhegeko liderhere ntya: “Mugende mujire abanafunzi kurhenga omu bantu b’amashanja moshi, munababatize.” (Matayo 28:19) Yesu alihanire olwiganyo lwinja, omu kubatizwa kwage. Ayubizwaga yeshi omu menji, s’aliko barhamushesheraga amenji okurhwe konyine. (Matayo 3:16) Amango omukristu amabatizwa, naye akwanene ayubizwe yeshi, changwa kudubikwa omu menji.

4. Bichi omuntu anayereka abandi, amango amabatizwa?

4 Amango omuntu amabatizwa, anayereka abandi oku asimire abe mwira wa Mungu, n’oku asimire kumukolera. (Zaburi 40:7, 8) Nkabaga oliwachibaza ntya: “Bichi inkwanene kujira yi mbatizwa?”

OBUMENYI N’OBWEMERE

5. a) Bichi okwanene kujira embere y’okubatizwa? b) Bulagurhe embuganano z’echikristu zili z’akamaro?

5 Okwanene oyige okumenya Yehova na Yesu, embere y’okubatizwa. Warhondere okujira ntyo, omu  kuyiga Ebiblia. (Osome Yohana 17:3.) S’aliko, okola kurhatosheze. Ebiblia ederhere oku okwanene “oyunjulirane obumenyi burhaherhe magosa” b’obulonza bwa Yehova. (Wakolosai 1:9) Embuganano z’Abahamirizi ba Yehova zakurhabala ogwarhe obwira bukomere bwenene haguma naye. Echola che chirhumire bili by’akamaro okuja kw’ezola mbuganano oku kahunda.—Waebrania 10:24, 25.

Okwanene okuyiga Ebiblia embere y’okubatizwa

6. Nyigirizo zichi okwanene omenye embere y’okubatizwa?

6 Yehova arhakusezeze omenyerere byoshi by’omu Biblia, embere y’okubatizwa. Arh’analisezeze oyola Muetiyopiya okw’amenyerere byoshi embere abatizwe. (Matendo 8:30, 31) Okuderha okuli, rhurhakamala kuyiga ebintu bihyahya byoshi eju ya Mungu. (Muhubiri 3:11) S’aliko embere y’okubatizwa, okwanene okumenya n’okuyemera enyigirizo z’omusinji z’Ebiblia.​—Waebrania 5:12.

7. Gurhe okuyiga Ebiblia kwawe kwakurhabere?

7 Ebiblia ederhere oku buzira bwemere, birhakagalikana okusimisa Mungu. (Waebrania 11:6) K’okuderha ok’okwanene okugwarha obwemere mu Mungu embere y’okubatizwa. Bantu baguma b’omu vile ye Korinto bamalire kuyunva ebi abafunzi ba Yesu baliri bayigiriza, “bayemera, banabatizwa.” (Matendo 18:8) Konakuguma, okuyiga kwawe Ebiblia kwakurhabere wagwarha obwemere omu bilagane bya Mungu. Kwanakurhabere okugwarha obwemere omu nterekero ya Yesu, yakarhuchungula kurhenga omu chaha n’olufu.​—Yoshua 23:14; Matendo 4:12; 2 Timoteo 3:16, 17.

OBWIRE ABANDI OKULI KW’EBIBLIA

8. Bichi byakurhabala okubwira abandi oku bi oliwayiga?

8 Ok’oli wagenderera kuyiga ebintu binene omu  Ebiblia, n’ok’oli wabona oku bikuherhere akamaro, k’obwemere bwawe bwanakula. Nantyo, wasima okubwira abandi oku bi wayigire.Yeremia 20:9; 2 Wakorinto 4:13.

Obwemere bukwanene bukushunike okubwira abandi oku buyemere bwawe

9, 10. a) Bande okwanene okurhanga kubwira oku bi oli wayiga? b) Bichi okwanene okujira akaba osimire kuhubiri haguma n’echibaga?

9 Nkabaga wasima obwire abantu b’omulala gwawe, abera bawe, abaturanyi bawe n’ab’okola nabo, oku bi wayigire. Kuli kwinja, s’aliko ogenderere okujira ntyo oku bukenge n’oku bwirhonzi. Ok’oliwagenderera, wasima okuhubiri haguma n’echibaga (kutaniko). Amango wachiyunva okola oyeneze, wanabwira Omuhamirizi onakuyigiriza Ebiblia. Naye akabona ok’onayeneze, n’akaba olamire nk’oku amakanuni me Biblia mayerekene, mwembiye mwanaja bonana na bashamuka babiri b’echibaga (kutaniko).

10 Muhigo guhe eyola nshimanano eherhe? Abashamuka baganira nawe yi babona akaba wanayunvirhe enyigirizo z’omusinji ze Biblia, n’akaba oziyemerere. Kandi, banasimire okumenya akaba onakenga ebye Biblia ederhere omu kalamo kawe k’esiku zoshi, n’akaba kweri osimire obe Muhamirizi wa Yehova. Orhayubahaga okuganira n’abashamuka. Oyibuke oku, banahangayikira abantu boshi b’omu chibaga, k’okuderha oku nawe banakuhangayikira. (Matendo 20:28; 1 Petro 5:2, 3) Enyuma y’eyola nshimanano, bakubwira akaba okola wakahubiri haguma n’echibaga.

11. Nk’abashamuka bakubwirire oku hali ebi okwanene kuhindamula, bulagurhe bili by’akamaro ojire ntyo?

11 Hali oku abashamuka bakakubwira oku hali ebindi wahindamula omu kalamo kawe, embere orhondere kuhubiri haguma n’echibaga (kutaniko). Bulagurhe bili by’akamaro okujira ntyo? Bulala, amango rhuli rhwabwira  abandi eju ya Yehova, rhunaba eyi rhuli rhwaderha ahali hage. K’okuderha oku rhukwanene okulama omu njira y’okumukengesa.​—1 Wakorinto 6:9, 10; Wagalatia 5:19-21.

“OHUNGAME ONAHINDAMUKE”

12. Bulagurhe abantu boshi bakenere okuhungama?

12 Hali echindi chintu okwanene ojire embere y’okubatizwa. Entumwa Petro yaliderhere ntya: “Muhungame munahindamuke, y’ebyaha byenyu bishandwa.” (Matendo 3:19) “Okuhungama,” k’okuderha gurhe? Okola kuli kubabala bwenene eju y’obubi omuntu ajirire. Omufano, akaba wajirire ebyaha by’obubaraga, okwanene okuhungama. Chirhakanabuza orhahungama, chiro akaba wakazaga chihangana kujira ebinja; bulala rhweshi rhuli banya byaha. K’okuderha oku rhweshi rhukenere okuhema Mungu obubabale.​—Waroma 3:23; 5:12.

13. “Okuhindamuka” k’okuderha gurhe?

13 Okubabala konyine eju y’obubi wajirire, kutosheze si? Nanga. Petro aliderhere oku binahemere “okuhindamuka.” K’okuderha ok’okwanene okukabulira engeso zoshi zibi, n’okujira ebinja. Rhurhole omufano: Oje ahantu eyi bonaburhanzi wageraho. Ok’oli wagenda, wanamenya oku wahabukire enjira. Gurhe wakajira? Wanagenda kubuyabuya, wanayumanga, “wanahindamuka,” k’okuderha oku wanalol’enyuma, n’okuja warhola enjira yakugeza emunda oli waja. Konakuguma, amango oli wagenderera kuyiga Ebiblia, nkabaga wabona oku bikuhemere ohindamuke changwa olekane n’engeso ziguma-ziguma. Obe juba-juba “okuhindamuka,” k’okuderha ok’ohindamuke okuntu bihemere, onachihangane okujira ebinja.

 OCHIHANE EMWA YEHOVA

Walaganyize Yehova okumukolera si?

14. “Okuchihana emwa Yehova” k’okuderha gurhe?

14 Embere y’okubatizwa, hali echindi chintu ch’akamaro okwanene ojire; okuchihana emwa Yehova. Okuchihana emwa Mungu kuli kumulaganya omu sala oku nta windi nji waharamya olekere yewe, n’ok’okujira obulonza bwage che chintu chaba ch’akamaro omu kalamo kawe koshi.​—Kumbukumbu la Torati 6:15.

15, 16. Bichi binarhuma omuntu achihana emwa Yehova?

15 Okulaganya okukolera Yehova yenyine, kuli kuguma n’okulaganya okugeza akalamo kawe koshi haguma n’omuntu onasima. Rhurhole omufano g’omusole n’omunyere basimene. Oku oyola musole ali agenderera okumenya oyola munyere, kw’an’ali anagenderera okumusima bwenene; n’okulonza bashabane. Okuchishoga ntyo kuli kw’akamaro, na bulala amusimire, anayemera okumuyenezeza byoshi alagirire omu buhya.

16 Ok’oli wagenderera okumenya Yehova, kuwamusima bwenene, kuwanagenderera okujira okwawe koshi ogalire y’omukolera. Okola kwakurhabala omulaganye omu sala oku wamukolera. Ebiblia ederhere oku olala yeshi walonza okuba mwanafunzi wa Yesu akwanene “achilahire.” (Marko 8:34) Ebyola bilonzeze okuderha ok’okukenga Yehova, kukwanene kuba kw’akamaro bwenene omu kalamo kawe. Ebi Yehova asimire by’eby’akamaro bwenene kulusha eby’olonzeze n’emihigo yawe.​—Osome 1 Petro 4:2.

ORHAYUBAHAGA OK’ORHABIGALA

17. Bichi binarhuma bantu baguma barhachihana emwa Yehova?

17 Bantu baguma barhachihana emwa Yehova, bulala bayubahire oku barhagala kuyeneza echilagane chabo  ch’okumukolera. Barhalonzeze oku mugoseza, changwa banawaza oku Mungu nj’arhababaza ebi bakolere nka barhachihanire emwage.

18. Bichi byakurhabala ohime obuba oherhe b’okuwaza oku wagoseza Yehova?

18 Obuzigire oherhe ku Yehova bwakurhabala ohime obuba oherhe b’okuwaza oku wamugoseza. Bulala omuzigire, wajira ok’ogalire koshi y’oyeneza echilagane chawe. (Muhubiri 5:4; Wakolosai 1:10) Orhanachichibwira oku bikomere okujira obulonza bwa Yehova. Entumwa Yohana yaliyandikire ntya: “Okuzigira Mungu k’okuderha, oku rhukenge amarhegeko mage. N’amarhegeko mage marhalemerere.”​—1 Yohana 5:3.

19. Bulagurhe orhakwanene kuyubaha okuchihana emwa Yehova?

19 Birhahemere ok’oshinganane y’ochihana emwa Yehova. Arharhuhemere rhukole ebintu rhurhakagala kukola. (Zaburi 103:14) Akurhabala y’ojira ebikwirire. (Isaya 41:10) Okamunihira bwenene, “anyorosa enjira zawe zoshi.”​—Mezali 3:5, 6.

“OKUCHIGASHA EMBERE Z’ABANTU EJU Y’OBUCHUNGUKE”

20. Bichi okwanene okujira enyuma y’okuchihana emwa Yehova?

20 Okola wakachihana emwa Yehova si? Enyuma y’okuchihana emwa Yehova, echikulikireho, okwanene kubatizwa.

21, 22. Gurhe “wakachigasha embere z’abantu” eju y’obwemere bwawe?

21 Obwire omwimangizi w’echigusho ch’abashamuka b’echibaga chenyu oku wachihanire emwa Yehova, n’ok’osimire obatizwe; naye abwira abashamuka baganire haguma nawe oku bilolere enyigirizo z’omusinji ze Biblia. Bakabona ok’okwanene, banakubwira oku  wakabatizwa oku mbuganano nkulu y’Abahamirizi ba Yehova yayinja. Kw’eyola mbuganano nkulu, kwagera ejambo (nyigirizo) lyaganirira obubatizo che chichi. Enyuma y’ahola, omwigiriza anabaza balala babatizwa bibazo bibiri (2) birhanakomere okubishubizako. Omu kushubiza kw’ebyola bibazo, wanayerekana oku “wamachigasha  (kuchirhongera) embere z’abantu” eju y’obwemere bwawe.​—Waroma 10:10.

22 Oku buzinda, wanabatizwa. Wanayubizwa weshi omu menji. Obubatizo bwawe, bwayereka abantu boshi oku wachihanire emwa Yehova n’ok’okola oli Muhamirizi wa Yehova.

 ECH’OBUBATIZO BWAWE BUYEREKENE

23. “Okubatizwa omu zino lya Darha, ely’Omugala, n’ely’eroho lichesibwa” k’okuderha gurhe?

23 Yesu aliderhere oku abanafunzi bage bakabatizwe “omu zino lya Darha, ely’Omugala, n’ely’eroho lichesibwa.” (Osome Matayo 28:19.) Okola kuli kuderha oku bihemere oyemere obukulu bwa Mungu, n’okuyemera akasi ka Yesu omu muhigo gwa Mungu. Kandi, bihemere okuyemera enjira Mungu anakolesa mw’Eroho lyage lichesibwa omu kuyeneza obulonza bwage.​—Zaburi 83:18; Matayo 28:18; Wagalatia 5:22, 23; 2 Petro 1:21.

Amango wamabatizwa, wanayerekana ok’olonzeze okole obulonza bwa Mungu

24, 25. a) Bichi obubatizo bunayerekana? b) Chibazo chihe esura y’obuzinda yashubizako?

24 Obubatizo bunayerekana echintu ch’akamaro bwenene. Amango wamayubizwa omu menji, kuli nka kufa k’omufano changwa okulekana n’okuntu walilamire embere. N’amango wamayubululwa kurhenga omu menji, okola kuli kuderha oku wamarhondera akalamo kahyahya k’okukolera Mungu. Kandi, kuyerekene oku wakolera Yehova kurhengerera akola kasansi. Oyibuke ok’orhahanire akalamo kawe emw’omuntu, oku chama, changwa omu kasi; s’aliko emwa Yehova!

25 Echilagane wahanire emwa Yehova, chakurhabala okuze obwira bukomere haguma naye. (Zaburi 25:14) Okola kurhali kuderha ok’okwanene nj’ochungulwe bulala wabatizizwe. Entumwa Paulo yaliderhere ntya: “Mugenderere okukolera akasi obuchunguke bwenyu mwenyine omu kuyubaha n’omu kudirhimana.” (Wafilipi 2:12) Okuderha okuli, obubatizo guli murhondero. Aliko si, gurhe wakabera mwira wa Yehova? Esura y’obuzinda nji yashubiza kw’echola chibazo.