Skip to content

Shimbukira oku mukololo gw'ebili mo

 MWAZI G’OKUYIGA 29

“Amango Nzambire, m’Amango Injira Emisi”

“Amango Nzambire, m’Amango Injira Emisi”

“Inansimiswa n’obuzamba, n’ebidusi, n’ebisanzi by’okubulirwa, n’okurhindibuzwa, n’ebibazo eju ya Kristu.”​—2 KO. 12:10.

WIMBO 38 Atakupa Nguvu

OKU BUGEKE *

1. Bichi entumwa Paulo yaliyemerere bwinja?

ENTUMWA Paulo yaliyemerere bwinja oku hali amango yaliri yayunva obuzamba. Aliyemerere oku omubiri gwage gwaliri “gwashendegerera,” oku alikwanene alwise y’akola omu kunali n’oku hali amango Yehova arhaliri ashubiza oku masala mage nk’oku alilonzeze. (2 Ko. 4:16; 12:7-9; Ro. 7:21-23) Paulo alishubire kuyemera oku abapinzani bage baliri bamubona nka muzamba. * Aliko arhayemeraga amawazo mabi m’abandi changwa obuzamba bwage byarhuma achiyunva oku ntacho amalire.​—2 Ko. 10:10-12, 17, 18.

2. Nk’ok’olwadiko lwa 2 Wakorinto 12:9, 10 luyerekene, somo lihe ly’akamaro Paulo aliyigire?

2 Paulo aliyigire esomo ly’akamaro; k’okuderha ok’omuntu akagwarha emisi chiro n’amango achiyunvirhe nk’azambire. (Osome 2 Wakorinto 12:9, 10.) Yehova alibwirire Paulo oku emisi yage “enashinganana omu buzamba,” k’okuderha oku emisi ya Yehova yakarhabere obuhashe bwalibulirwe Paulo. Ech’oburhanzi, leka rhulole bulagurhe rhurhakwanene kugaya amango abapinzani berhu bamarhudukanga.

“OSIMISWE . . . N’EBIDUSI”

3. Bulagurhe rhwakasimiswa n’ebidusi?

3 Ntaye n’omuguma mu rhwewe wakasima adukangwe. Aliko, nk’abashombanyi berhu bamarhudukanga na nkarhugayisizwe bwenene n‘ebi bali baderha, rhwakaluha rhwanavunika omurhima. (Mez. 24:10) Gurhe si rhukwanene kubona ebidusi by’abashombanyi berhu? Kuguma na Paulo, “rhwasimiswa . . .  n’ebidusi.” (2 Ko. 12:10) Bulagurhe? Bulala amango abantu bamarhudukanga n’okurhushomba, ebyola binayerekana kurhuli banafunzi b’okuli ba Yesu. (1 Pe. 4:14) Yesu aliderhere oku abanafunzi bage bakalibwizwe. (Yoh 15:18-20) Byalibonekene ntyo omu mango m’Abakristu barhanzi. Mira, balala balishumikirwe n’emigenzo ya Bagiriki, bakazaga bona Abakristu nka binganyi kandi bazamba. N’omu Bayahudi, Abakristu balirholerwe nka bantu “barhasomaga kandi ba ntya-ntya,” kuguma n’entumwa Petro na Yowane. (Mdo. 4:13) Abakristu balibonekene nka bazamba; barhaliri bachihira omu by’epolitike changwa omu by’oburungu, n’abantu baliri babarhola nka b’eshishi bwenene omu bandi.

4. Gurhe Abakristu ba mira balijirire eju ya mawazo mabi abashombanyi balibaherhe ko?

4 Abakristu ba burhanzi baliyemerere amawazo mabi m’abashombanyi babo mabayimanza si? Nanga. Omufano: entumwa Petro na Yowane; balibwene nka guli mwishingo okulibuzwa eju y’okukulikira Yesu n’enyigirizo zage. (Mdo. 4:18-21; 5:27-29, 40-42) Entumwa zirhaliherhe empanvu y’okuyunva eshoni. Enyuma w’esiku, abola Bakristu barhanzi berhohye bayinja kukolera abantu ebintu binja bwenene abapinzani babo barhagalaga kukola chiro n’eliguma. Omufano, ebitabu bifuhererwe byayandikwaga na baguma mw’abola Bakristu, bigenderere kurhabala n’okuha amamiliyoni ma bantu obunihire. N’Obwami baliri bahubiri burhali omu mbingu konyine s’ahubwe bwarhegeka abantu boshi hanola hofi-hofi. (Mt. 24:14) Lero, oburhegesi bukulu bwe Roma ya mira bwaliri bwalibuza Abakristu, burhachivaga bwagenderera kurhegeka. Aliko, abola Bakristu bakola bali bami omu mbingu. Abashombanyi babo bayinjire kufa; n’eyinji bakafuka, nji baba ngabo z’Obwami bwaliri bwahubiribwa n’Abakristu baliri balibuza.​—Ufu. 5:10.

5. Nk’ok’olwadiko lwa Yohana 15:19 luyerekene, bulagurhe abantu ba Yehova babonererwe?

5 Zene, rhwewe nka bantu ba Yehova, hali amango rhunabonererwa n’okudukangwa oku rhuli binganyi n’abazamba. Bulagurhe? Bulala rhuhaherhe engeso zili nk’ezab’arhuzungulukire. Rhunachingana kuba berhohye, berhonzi na banya bukenge. Tofauti n’okola, egulu lyowe linasima omwibone, abaherhe echiburi n’ebigamba. Oku bwindi, rhurhachihira omu by’epolitike, omu by’oburungu bw’echihugo. Rhurhachihira omu by’elila gulu, che chirhumire bana rhunabona nka bantu b’eshishi bwenene.​—Osome Yohana 15:19; Ro. 12:2.

6. Kasi kachi kazibu-zibu Yehova ali arhabala abantu bage bakole?

6 Chiro akaba ebi elila gulu linawaza eju yerhu, Yehova y’arhukolesa omu kuyeneza ebintu bisomeze bwenene. Y’ayeneza akasi kazibu-zibu k’amahubiri omu ngani y’abantu. Zene, abakozi bage bali bakula ebitabu bitafsirirwe n’okuhabwa bwenene oku gulu, n’okukolesa Ebiblia omu kurhabala amamiliyoni m’abantu bahindamule akalamo. Erenge lyoshi eju y’akala kasi kakwirire ligendera Yehova, oli wakolesa echigusho ch’abantu babonekene nka bazambire bakole orhula rhwasi rhukomere. Aliko si, bichi rhwakaderha oku bilolere buli muguma werhu? Yehova akarhurhabala rhugwarhe emisi si? Akaba nechi, bichi rhwakajira yirhupata oburhabale bwage? Leka rhuje rhwalola bintu bisharhu rhwakayiga kugerera omufano gw’entumwa Paulo.

ORHACHIZERAGA EMISI YAWE WENYINE

7. Somo lihe liguma rhwakayiga kugerera omufano gwa Paulo?

7 Esomo liguma rhwakayiga kugerera omufano gwa Paulo lyelinola: Ntakuchizera emisi yawe wenyine changwa obuhashe bwawe  amango oliwakolera Yehova. Oku mawazo m’abantu, Paulo alikwanene achibone n’okuchinihira. Akuliraga omu Tarso, vile nkulu y’omu provense ye Roma. Tarso yaliherhe obukungu n’ahantu h’okusomera habonekene. Paulo aliyigirizwe bwinja​—aliyigirizwe na muguma w’omu barhegesi ba bayahudi okengerwe bwenene w’omu chihe chage oyirikirwe Gamalieli. (Mdo. 5:34; 22:3) N’omu mango maguma, Paulo aliri muntu wakamaro bwenene omu lubaga lwa Bayahudi. Aderhere ntya: “Naliri nakola amaja-mbere mazibu-zibu omu dini lya Bayahudi kulusha bantu banene b’emyaka yani omu shanja lyani.” (Gal. 1:13, 14; Mdo. 26:4) S’aliko Paulo arhachizeraga ku yenyine.

Paulo alibwene enyungu z’elila gulu nka “chilundo ch’obuchafu” omu kuzihuzanya n’olukengo l’okukulikira Kristu (Olole echifungo cha 8) *

8. Nk’ok’olwandiko lwa Wafilipi 3:8 n’amahugulo m’eshishi biyerekene, gurhe Paulo alibwene ebintu alekanaga nabyo, na bulagurhe “alisimisizwe n’obuzamba”?

8 Paulo oku bulonza bwage yenyine, alekana n’eby’elila gulu by’aliri byamujira mukulu. Nantyo, ayinja kubona enyungu zoshi aliherhe mira nka “buchafu bunene.” (Osome Wafilipi 3:8 n’amahugolo m’eshishi.) Paulo alihurene bibazo binene enyuma y’okuba mwanafunzi wa Kristu. Alishomberwe n’eshanja lyage. (Mdo. 23:12-14) Abantu b’elindi shanja lyage k’okuderha Abaroma, bamushurha n’okumuhira omu mpamiko. (Mdo 16:19-24, 37) Ashuba kubona oku arhaliri mushinganyanya n’oku byalimukomerere okujira ebintu binja. (Ro. 7:21-25) S’aliko ahali h’okuleka abashombanyi changwa obufe bwage bimuhoze, “asimiswa n’obuzamba.” Bulagurhe? Bulala amango aliri muzamba m’omango aliri abona emisi ya Yehova y’akola omu kalamo kage.​—2 Ko. 4:7; 12:10.

9. Nka gurhe rhukwanene kubona ebintu byakarhuma rhwabonekana babusha?

9 Akaba rhulonzeze rhuyunguke n’emisi ya Yehova, rhurhakwanene kuwaza ok’emisi y’omubiri, amasomo, emigenzo n’obuchire byayerekena echirhumalire. Arhali ebila bintu by’ebinarhujira b’akamaro embere za Yehova. Aliko, nta banene omu bantu ba Mungu “bayengehere omu njira y’omubiri, nta banene baherhe emisi, nta banene baburhirwe eyi bali omu milala eherhe echeo.” Ahali h’ebyola, Yehova achishogere kukolesa “ebintu bizambire  bye gulu.” (1 Ko. 1:26, 27) Che chirhumire, chiro akaba kuntachintu oherhe mu ebila bintu rhwamabona ahala nyanyanya, chirhakarhuma orhagenderera kukolera Yehova. Ahali h’okola, wakabibona oku bikuhere akasanzi k’okubona gurhe Yehova ali akuha emisi. Rhurhole omufano, nka wamachiyunva m’obuba amango hali abali balonza ogangane n’obwemere bwawe, osalire Yehova akuhe obushiru y’ogala kuderhera obwemere bwawe. (Efe. 6:19, 20) Akaba bikukomerere okulwisa obulema fulani, oheme Yehova akurhabale n’emisi okenere y’ogale kuyorha omukasi kage. Amango moshi wabona Yehova akurhabala, obwemere bwawe bwakomera, wagwarha n’emisi.

OYIGE ESOMO KUGERERA EMIFANO YE BIBLIA

10. Bulagurhe rhukwanene kuyiga emifano ehanirwe n’abantu bimana baganirirwe omu Biblia nk’abayerekenwe omu Waebrania 11:32-34?

10 Paulo aliri mwanafunzi w’obushiru w’amandiko. Aliyigire ngani zinene, n’echindi, ayiga esomo kugerera emifano y’abakozi ba Yehova eyandikirwe omu Chinwa chage. Amango Paulo ayandikiraga Abakristu ba Baebrania, abahema bawaze bwenene oku mifano y’abakozi bimana ba Yehova. (Osome Waebrania 11:32-34.) Rhulole muguma wa mw’abola bakozi; Omwami Daudi. Alilwisize obupinzani, arhali mpu bw’abanzi bage bonyine, si n’obwa baguma omu bachigerere kuba bera bage. Omu kubona omufano gwa Daudi, rhwabona emisi Paulo alipatire omu kuwaza bwenene oku kalamo ka Daudi, na gurhe rhwakayiga omufano gwa Paulo.

Amango Daudi ahuranaga na Goliati ahindamula ebyalibonekene nka kuhimwa, kaba kasanzi k’okuchibonera gurhe emisi ya Mungu yakola (Olole echifungo cha 11)

11. Bulagurhe Daudi alibonekene nk’azambire? (Olole efoto eli oku chiganda.)

11 Daudi alibonekene nka muzamba embere z’omurungu w’emisi oku mubiri Goliati. Amango Goliati abonaga Daudi, “amushekera n’akasuzaguro.” Omu bukweri, Goliati aliri muzibu-zibu bwenene, aliherhe byoshi bihemerwe, analiri muntu okomere kulwa evita bwenene. Aliko Daudi yewe, alichili murhabana wakabonekene nka ntacho amalire omu burungu. S’aliko Daudi ahindamula eby’alibonekene nka bizambire omu biherhe emisi. Alilangalire emisi ya Yehova, anahima omushombanyi wage.​—1 Sa. 17:41-45, 50.

12. Chindi chibazo chihe Daudi alilwisize?

12 Daudi alilwisize echindi chibazo chakarhumire achiyunva muzamba na buzira misi. Daudi alikoleere oku bwimana omuntu Yehova ashimikaga mwami we Izraeli, k’okuderha Sauli. Oku burhanzi, omwami Sauli alirhangire kenga Daudi. Enyuma w’esiku, omwibone gwarhuma Sauli ahanza kuyunvira Daudi omujinya. Sauli alibuza Daudi analonza kumuyirha.​—1 Sa. 18:6-9, 29; 19:9-11.

13. Gurhe Daudi alijirire amango Mwami Sauli amukolera kubi?

13 Chiro akaba okuntu kubi alikoleerwe n’Omwami Sauli, Daudi aligenderere kukenga omwami Yehova ashimikaga. (1 Sa. 24:6) Daudi arhadukangaga Yehova eju y’ebibi Sauli amujiriraga. Ahali h’okola, Daudi achishwekera ku Yehova y’amuha emisi alikenere omu kulembera echola chibazo chikomere.​—Zb. 18:1, myandiko y’omurhondero.

14. Bibazo bihe entumwa Paulo yalilwisize bili kuguma n’ebya Daudi?

14 Entumwa Paulo yalihurene n’ebibazo bili nk’ebya Daudi. Abashombanyi ba Paulo baliherhe emisi bwenene kumulusha. Abakulu banene b’echihe chage balimushombere. Mango manene, baliri bamushurha n’okumuhira omu prizo. Kuguma na Daudi, Paulo alilibwizwe n’abantu balikwanene eyi balichigerere kuba bera bage. Na Bakristu baguma b’omu chibaga bachihenula kuye. (2 Ko. 12:11; Flp. 3:18) S’aliko Paulo ahima boshi baliri bamulwisa. Nka gurhe? Agenderera kuhubiri chiro  akaba obupinzani. Aliyorhere mwimana ku bene-babo na bali-babo chiro n’omu mango bamuvunaga omurhima. N’echakamaro, aliyorhere mwimana embere za Mungu mpaka oku buzinda bw’akalamo kage. (2 Ti. 4:8) Aligalire kuhima ebila byoshi, arhali mpu okwenge alibonekene oku aherhe emisi, si bulala alichizerere Yehova.

Ochikenge onabe muntu mwinja amango oli wapima kuganira na balala bali bakubaza oku bwemere bwawe bw’echikristu (Olole echifungo cha 15) *

15. Omuhigo gwerhu guli guhe, na gurhe rhwakaguhikira?

15 Hali ebidusi changwa ebibazo oli walwisanya byahulukira oku bantu onashiba nabo oku masomo, oku kasi changwa abantu b’omulala gwawe barhali Bahamirizi si? Wachigerere kukolerwa kubi na muguma w’omu chibaga si? Akaba ntyo kubili, oyibuke emifano ya Daudi na Paulo. Wagenderera “kuhima obubi oku bwinja.” (Ro. 12:21) Omuhigo gwawe gurhali gwa kushurha ebale omu mpanga y’omuntu nk’oku Daudi ajiraga, s’aliko g’okurhabala abantu baherhe emirhima minja bayige eju ya Yehova n’eju y’Ebiblia. Wakahikira ogola muhigo amango oli wakolesa Ebiblia omu kushubiza oku bibazo by’abantu, omu kugwarha obukenge oku bantu bali bakukolera kubi, n’omu kujira amenja oku bantu boshi, chiro n’abashombanyi bawe.​—Mt. 5:44; 1 Pe. 3:15-17.

OYEMERE OBURHABALE BW’ABANDI

16-17. Bichi Paulo arhakafire ayibagire?

16 Embere entumwa Paulo ebe mwanafunzi wa Kristu, aliri murhabana orhachikenga, kandi w’okulibuza enkulikizi za Yesu. (Mdo. 7:58; 1 Ti. 1:13) Yesu yenyine alibuzize Paulo, waliyirikirwe Sauli, aleke kurhera echibaga che Chikristu. Yesu aganira na Paulo kurhenga omu mbigu anamujira mpumi. Yi Paulo ashuba kubona, byalimuhunire aje kulonza oburhabale kubalala bantu aliri alibuza. Ayemera oku bwirhohye oburhabale bwa muguma omu banafunzi ba Yesu wali yirikirwe Anania, wanamuhumulaga.​—Mdo. 9:3-9, 17, 18.

17 Paulo ayinja kuba muguma w’omu chibaga che Chikristu omenyikene bwenene, s’aliko arhayibagiraga esomo Yesu amuyigirizaga omu barabara lye Damasko. Paulo aligenderere kuba mwirhohye, anayemera buzira ngangane oburhabale bwa bene-babo na  bali-babo. Aliyemerere bwinja-bwinja oku baliri “burhabale buhebere emisi” embere zage.​—Kol. 4:10, 11, mahugulo m’eshishi.

18. Bulagurhe bisanzi biguma rhwakagangana kuyemera oburhabale bw’abandi?

18 Bichi omufano gwa Paulo gurhuyigirize? Amango rhwahwanzaga kuchihira haguma n’olubaga lwa Yehova, nkabaga rhwaliri juba-juba okuyemera oburhabale bw’abandi, bulala rhwalimenyere oku rhuchili bana ekiroho n’oku rhuherhe binene by’okuyiga. (1 Ko. 3:1, 2) Aliko si, gurhe bikola bili zene? Akaba rhuherhe myaka minene eyi rhuli rhwakolera Yehova, n’akaba rhunakola rhuherhe bumenyi bunene, hali oku byakarhukomerera kuyemera oburhabale; ahanene b’olala muntu orhaza kulegama omu kuli kuguma nerhu. Aliko, Yehova anazigana kukolesa bene-berhu na bali-berhu omu kurhuhira emisi. (Ro. 1:11, 12) Che chirhumire, akaba rhulonzeze rhugwarhe emisi erhengerere emwa Yehova, rhukwanene kuyemera oburhabale bwa bene-berhu na bali-berhu.

19. Bichi byarhabalaga Paulo agale kukola ebintu byoshi ajiraga?

19 Paulo alijirire bintu biguma by’akamaro enyuma y’okuba Mukristu. Bulagurhe? Bulala aliyigire oku emisi y’omubiri, amasomo, obuchire changwa okuntu omuntu akulaga arhali by’eby’akamaro, s’aliko obwirhohye bwage n’okulangalira Yehova. Rhuyiganye rhweshi Paulo 1) omu kulangalira Yehova, 2) omu kuyiga esomo kugerera emifano y’Ebiblia, 3) n’omu kuyemera oburhabale bw’aberhu Bakristu. Ahola, n’eyi rhwakachiyunva nka rhuzambire bwenene, Yehova arhuhira emisi!

WIMBO 71 Sisi Nijeshi la Yehova!

^ mus. 5 Mu gonola mwazi, rhwaganira oku mufano gw’entumwa Paulo. Rhwabona oku nka rhuli berhohye, Yehova arhuha emisi rhukenere y’okulembera ebidusi n’okuhima obuzamba bwerhu.

^ mus. 1 AMAFASIRIYO M’EBINWA: Hali mpanvu zinene zakarhuma rhwachiyunva rhuzambire; omufano: rhurhashinganene, rhuli bakene, rhuherhe amalwala changwa rhurhasomaga bwenene. Kandi abashombanyi berhu banahiga kurhujira rhuchiyunve rhuzambire omu kurhurhera omu binwa changwa oku mubiri.

^ mus. 57 PICTURE DESCRIPTION: Amango Paulo ajaga hubiri eju ya Kristu, alekana n’ebintu by’akalamo kage ka mira nka mufarisayo. Ebyola byakaba bitabu by’okuzingwa birhali by’edini n’akambwene kali kw’amandiko bagendaga bashwekera oku mpanga.

^ mus. 61 PICTURE DESCRIPTION: Aba mwene-werhu muguma anakola nabo, yi bapima kumushumika aje oku fete y’okuburhwa y’owabo mukozi.