Skip to content

Shimbukira oku mukololo gw'ebili mo

 MWAZI G’OKUYIGA 41

Rhunakolera Mungu “Ochirire omu Lukogo”

Rhunakolera Mungu “Ochirire omu Lukogo”

“Yehova ali mwinja ku boshi, n’olukogo lwage lunabonekana omu makasi mage moshi.”​—ZB. 145:9.

OLWIMPO 44 Sala ya Mtu wa Hali ya Chini

OKU BUGEKE *

1. Nka gurhe rhwakafasiriya omuntu ogwerhe olukogo, na ngani ehe erhuyigirize oku bilolere omuntu ogwerhe olukogo?

AMANGO rhwamawaza oku muntu onababalira, rhwanabona omuntu mwinja, onashagaluka, w’obonjo, kandi onahaana. Rhwakashuba kuwaza oku ngani ya Yesu elolere Omusamariya mwinja. Oyola mulume w’elindi shanja “akolera n’olukogo” Omuyahudi muguma walizimbirwe anashurhwa n’ebishambo. Omusamariya “ashunikwa n’obonjo” k’oyola Muyahudi walikolerwe kubi anamushishikala oku buzigire. (Lu. 10:29-37) Ogula mufano g’Omusamariya gurhuyigirize oku bilolere olukogo, engeso nyinja Mungu agwerhe. Mungu aba wa lukogo bulala arhuzigire kandi rhunabona olukogo lwage buli lusiku mu njira zinene.

2. Yindi njira ehe rhwakayerekanamo olukogo?

2 Hala eyindi njira omuntu akayerekanamo olukogo. Omuntu w’olukogo akachishoga kuleka kuhana muntu mulebe walikwanene obuhane. Mw’eyola njira, ntyo ku Yehova anarhuyereka olukogo. Omwandisi muguma we zaburi aderhaga ntya: “Arharhukolera nk’oku amagosa merhu mahemere.” (Zb. 103:10) Aliko amandi mango, Yehova anahaana obuhane bukomere oku muntu wajirire echaha.

3. Bibazo bihe rhwaganirako?

3 Mu gunola mwazi, rhwaganira ku bibazo bisharhu: Bulagurhe Yehova anayerekana olukogo? Ka byakagalikana omuntu ahaane obuhane bukomere anagenderere kuba wa lukogo? Na bichi byakarhurhabala rhuyerekane olukogo? Leka rhulole nka gurhe Echinwa cha Mungu chishubize kw’ebyola bibazo.

BULAGURHE YEHOVA ANAYEREKANA OLUKOGO

4. Bulagurhe Yehova anayerekana olukogo?

4 Yehova anasima kuyerekana olukogo. Entumwa Paulo aliyandikire oku Mungu “achirire omu lukogo.” Paulo aliri afasiriya oku Mungu anayerekana olukogo bulala ahere abantu barhali bashinganyanya  obulangalire b’okulama omu mbingu, k’okuderha, abakozi bage bashiigwa. (Efe. 2:4-7) Aliko Yehova arhayerekaga abakozi bage bashigwa olukogo konyine. Omwandisi we zaburi Daudi, aliyandikire ntya: “Yehova ali mwinja, n’olukogo lwage lunabonekana omu by’akolere byoshi.” (Zb. 145:9) Bulala Yehova anazigira abantu, anayerekana olukogo lwage buli mango abwene empanvu y’okujira ntyo.

5. Nka gurhe Yesu ayigaga oku bilolere olukogo lwa Yehova?

5 Kulusha owindi muntu yeshi-yeshi, Yesu yemenyere kangana gurhe Yehova anasima kuyerekana olukogo. Yehova na Yesu balilamire omu mbingu haguma myaka minene bwenene embere Yesu ayinje hanola oku gulu. (Mez. 8:30, 31) Mango manene, Yesu aliri abona gurhe Eshe ali ayereka abanya-byaha olukogo. (Zb. 78:37-42) Omu nyigirizo gaze, Yesu aliri aderha bwenene kw’eyola ngeso ekwirire y’Eshe.

Eshe w’omwana w’engaligali arhamukozaga eshonyi; s’aliko amuyegereza ahambuga (Olole echifungo cha 6) *

6. Mufano guhe Yesu alikoleseze gurhurhabere rhumenye bwinja olukogo lw’Eshe?

6 Yesu alikoleseze engani y’omwana w’engaligali ehumire oku murhima omu kuyerekana kangana gurhe Yehova anasima kuyerekana olukogo. Oyola mwana arhenga ahamwabo “ashandaguza ebikulo byage omu kulama akalamo k’oburara.” (Lu. 15:13) Buzinda ahungama eju y’akalamo kage k’oburara kakozeze eshonyi, achirhohya anagaluka emwabo. Eshe ajira gurhe? Oyola musole arhalegamaga kubona gurhe eshe amukoleraga. Yesu aderha ntya: “Oku [omugala] achili hale bwenene, eshe amubona n’okushunikwa n’obonjo, alibirha n’okumuhobera n’obuzigire anamuha ebize.” Eshe arhakozaga omugala eshonyi. S’ahubwe, ayereka oyola musole olukogo, amubabalira n’okumuyegereza ashube agaluke omu mulala. Omwana w’engaligali aligomeere eshe bwenene, aliko bulala alihungamire, eshe amubabalira. Oyola muzere w’obonjo oganirirwe mw’eyola ngani ashushanyize Yehova. M’obola bulyo buhumire oku murhima, Yesu ayerekana oku Eshe ali tayari kubabalira abanya-byaha bahungamire eby’okuli.​—Lu. 15:17-24.

7. Nka gurhe okuntu Yehova anayerekana olukogo kuyerekene oku ali mwengehe bwenene?

7 Yehova anarhuyereka olukogo bulala agwerhe bwengehe bunene. Buli mango ebi Yehova anahigirira kujira binalerhera ebilemwa byage enyungu. Ebiblia ederhere oku “obwengehe burhengere enyanya” buba “buyunjwire olukogo n’amalehe menja.” (Yak. 3:17) Kuguma n’omuzere ogwerhe obuzigire, Yehova amenyere oku abantu bakachiyunva bwinja amango amabayereka olukogo. (Zb. 103:13; Isa. 49:15) Bulala Yehova anayereka abantu bage olukogo, bagwerhe  obulangalire bw’amango mayinjire chiro akaba barhali bashinganyanya. Bobola, bulala Yehova ali mwengehe bwenene, buli mango anayerekana obubabale amango abwene empavu z’okujira ntyo. Aliko kandi Yehova ayinji amango birhahemere ayerekane olukogo. Aliko bulala Yehova ali mwengehe, nta lusiku ayerekana olukogo changwa obonjo amango okujira ntyo kuli kulekerera obubi.

8. Chintu chihe ch’akamaro chikwanene kujirwa, na bulagurhe?

8 Rhuderhe oku omukozi wa Mungu amachishoga kulama akalamo kakozeze eshonyi. Bichi rhukwanene kujira? Yehova ayerekeza entumwa Paulo ahaane ehano oku chibaga oku “baleke kujira obwira naye.” (1 Ko. 5:11) Abajirire ebyaha barhahungamire, banachibwa omu chibaga. Kuli kwinja okujira ntyo bulala kuli kulanga bene-berhu na bali-berhu bali bimana, n’okuyerekana enjira zichesibwa za Yehova. Byakakomerera baguma okuyemera ok’okuchibwa omu chibaga kuli kuyerekana olukogo lwa Yehova. Ka kubinali? Rhujage rhwalola.

K’OKUCHA OMUNTU OMU CHIBAGA KUYEREKENE OLUKOGO?

Entama yakahebwa eburhambi amango elwere, aliko omungeri akachigenderera kuyishishikala (Olole echifungo cha 9-11)

9-10. Nk’oku olwandiko lwa Waebrania 12:5, 6 luderhere, bulagurhe rhwakaderha ok’okucha omuntu orhahungamire omu chibaga guli mupango guyerekene olukogo? Lerha omufano.

9 Amango rhwamayunva bamenyesa oku mbuganano y’echibaga che Chikristu ku muntu mulebe rhumenyere rhunazigire “arhachili Muhamirizi wa Yehova,” rhunayunva rhugayire bwenene. Rhwakachibaza akaba kweri byalihemere omuzigirwa werhu achibwe omu chibaga. K’okucha omuntu omu chibaga kuli kumuyereka olukogo? Nechi kuli kumuyereka olukogo. Amango omuntu arhahaabirwe obuhane akwanene, burhali bwengehe, lurhali lukogo, kurhanali kumuyereka obuzigire. (Mez. 13:24) K’okucha omu chibaga omuntu wajirire echaha orhahungamire, ka kwakamurhabala ahindamuke? Nechi, kwakamurhabala. Bene-berhu na bali-berhu banene baliri bajira ebyaha bikomere baderhere ok’okuchibwa omu chibaga k’okwabarhabalaga bamenye kangana babaga bagomere, kwabarhabala bahungame, bahindamule oborhere bwabo, banagalukire Yehova.​—Osome Waebrania 12:5, 6.

10 Waza k’ogula mufano. Mungeri muguma amabona oku entama yage elwere. Ayinji oku y’abuka obola bulwala entama yage egwerhe, bimuhemere arhange ayihebe eburhambi bw’ezindi. Aliko, entama bili birhungano bisima kulama haguma n’ezindi. N’entama yakachiyunva kubi, amango yamakulwa omu zindi. Bobo si, k’okuderha oku omungeri avire aba mukali bwenene bulala akulire eyola ntama omu zindi? Nanga chiro. Ayinji oku, akaleka entama elwere ebere haguma n’ezindi, echishumba choshi chayahukizwa n’obola bulwala. Omu kuheba entama elwere eburhambi, okola kwanalanga ezindi zoshi.​—Huzanya na Mambo ya Walawi 13:3, 4.

11. a) Mu njira nchi omuntu wachibirwe omu chibaga akahuzanywa n’entama elwere? b) Bichi omuntu wachibirwe omu chibaga akwanene kujira na burhabale buchi akahaabwa?

11 Rhwakahuzanya Omukristu wachibirwe omu chibaga n’entama elwere. Bulala arhagwerhe bwira haguma na Yehova, ali nka muntu olwere. (Yak. 5:14) Nka kula omuntu ogwerhe obulwala akabuyahukiza abandi, omuntu wahanyageze obwira bwage haguma na Yehova, akashumika abandi baleme bakola ebintu bibi. Bobola, mango maguma bili by’engenzi oyola muntu olwere ekiroho achibwe omu chibaga. Obola buhane buyerekene oku Yehova azigire abimana bage bali omu chibaga, bwakanarhabala owakolere echaha abone kangana gurhe agomere, kwakanarhuma ahungama. Chiro akaba oku achibirwe omu chibaga, akayinja ahika oku mbuganano y’apata enyigirizo ze Biblia zakamurhabala ashube akomeze obwemere bwage. Kandi akachigenderera kuhaabwa ebitabu by’okukolesa omu funzo lyage yenyine n’okulola eprograme za JW Télédiffusion. N’oku abashamuka bali babona okuntu ali agenderera kujira amaja-mbere, bakagenderera kumuha  amahano makamurhabala ashube akomeze obwira bwage haguma na Yehova y’agalulwa omu chibaga n’okushuba kuba Muhamirizi wa Yehova. *

12. Chintu chihe chiyerekene obuzigire n’olukogo abashamuka bakakolera omuntu wakolere echaha orhahungamire?

12 Kuli kw’akamaro rhuyibuke oku abantu bajirire ebyaha barhanahungamire bonyine babachibwa omu chibaga. Abashamuka bakwenene barhange bagerereze bwenene, embere barhole omuhigo g’okucha muntu mulebe omu chibaga. Bayinji oku Yehova “anahaana obuhane bukwanene” analonzeze nabo bajire ntyo. (Yer. 30:11) Bazigire bene-babo na bali-babo, barhalonzeze kujira echintu chiro n’echiguma chakahanyagaza obwira bwabo haguma na Yehova. Aliko mango maguma, echintu chiyerekene obuzigire, n’olukogo bakajira, kuli kurhanga kucha oyola nyankola-amaligo omu chibaga.

13. Bulagurhe Mukristu muguma omu Korinto alikwanene kuchibwa omu chibaga?

13 Waza okuntu entumwa Paulo akoleraga muntu muguma orhalihungamire omu myaka egana ya burhanzi. Mukristu muguma w’omu Korinto aliri ajira eby’obubaraga na muk’eshe. Echola chalikozeze eshonyi bwenene! Paulo alimenyere oku Yehova abaga abwirire Abaizraeli ba mira ntya: “Omulume wamalala na muk’eshe akozeze eshe eshonyi. Bombi bakwanene kuyirhwa.” (Law. 20:11) Kweri Paulo arhakabwirire echibaga oku oyola muntu akwenene ayirhwe. Aliko Paulo abwira Abanya-Korinto oku oyola muntu achibwe omu chibaga. Ebyola bijiro bikozeze eshonyi by’oyola muntu byaliri byashumika abandi omu chibaga, na baguma mubo barhaliri babona chiro oku echola chili chaha chikomere!​—1 Ko. 5:1, 2, 13.

14. Nka gurhe Paulo aliyerekene olukogo lwage oku mulume wachibwaga omu chibaga omu Korinto, na bulagurhe? (2 Ko. 2:5-8, 11)

14 Hagerere esiku, Paulo ayinjimenya oku oyola muntu ahindamukire bwenene. Oyola muntu wakolaga echaha alihungamire by’okuli! Chiro akaba k’oyola mulume alikozeze echibaga eshonyi, Paulo abwira abashamuka oku arhalilonzeze “kuba mukali kulusha.” Ababwira oku: “Bamubabalire oku bulonza banamurhulirize.” Hala echarhugama Paulo aderha oku bakwanene bajire ntyo: “Yarhayirhwa n’akahinda kanene agwerhe.” Paulo aliyunvirhire obonjo oyola mulume wahungamaga. Entumwa Paulo arhalilonzeze kubona oyola muntu ahikire kuyirhwa n’akahinda eju y’ebibi akolaga n’okuhikira amango  aleka kushonda obubabale.​—Osome 2 Wakorinto 2:5-8, 11.

15. Nka gurhe abashamuka bakahaana obuhane bukomere banayerekane olukogo han’aho?

15 Kuguma na Yehova, abashamuka basima kuyerekana obubabale. Banahaana obuhane bukomere oku muntu wajirire echaha amango bihemere okujira ntyo, aliko kandi banayerekana obubabale amango bigalikene. Nk’abashamuka barhahanire omuntu wajirire echaha, eyi barhayerekene olukogo, s’aliko okujira ntyo kuli kulekerera obubi. Aliko si, k’abashamuka bonyine babakwanene kuyerekana olukogo?

BICHI BYAKARHURHABALA RHWESHI RHUYEREKANE OLUKOGO?

16. Nk’oku olwandiko lwa Mezali 21:13 luyerekene, nka gurhe Yehova akolera balala barhayerekana lukogo?

16 Abakristu boshi banachihangana kuyiganya Yehova omu kuyerekana olukogo. Bulagurhe? Mpanvu nguma eli oku, Yehova arhayunviriza balala bagambwa kuyerekana olukogo. (Osome Mezali 21:13.) Nta muguma mu rhwewe wakasima mpu Yehova alahire kuyunviriza amasala mage, che chirhumire rhukwanene rhuchilange yi rhurhabala abantu bagwerhe omurhima gubi barhanababalira abandi. Hali h’okuchijira nka bihuli amango owerhu Mukristu ali omu malumwa, rhukwanene kuba tayari kuyunviriza “amalira m’omuntu w’eshishi.” Konako, rhunajira okwerhu koshi yi rhukolesa elila hano lili m’olula lwandiko lwe Biblia: “Omuntu orhayerekana lukogo, naye nj’achirwa olubanja buzira lukogo.” (Yak. 2:13) Rhukayibuka kangana gurhe rhuba rhukenere abandi barhuyereke olukogo, nerhu rhwayunva rhushunikirwe kuyereka abandi olukogo. Ahanene, rhulonzeze kuyerekana olukogo amango omunya-byaha wahungamire amagaluka omu chibaga.

17. Nka gurhe Mwami Daudi aliyerekene olukogo lurhengere oku murhima?

17 Emifano eli omu Biblia yakarhurhabala rhuyerekane olukogo n’okulekana n’omurhima gubi. Omufano, waza oku Mwami Daudi. Daudi akazaga zigana kuyerekana olukogo lurhengere oku murhima. Chiro akaba oku Sauli aliri alonza kumuyirha, Daudi aliyerekere omushiigwa wa Mungu olukogo arhanalonzaga kuchiholera chiro nakatyu.​—1 Sa. 24:9-12, 18, 19.

18-19. Mango mabiri mahe Daudi afundaga kuyerekana olukogo?

18 Aliko, Daudi arhaliri ayerekana olukogo buli mango. Omufano, amango Nabali waligwerhe omurhima gubi adukanga Daudi n’okulahira kumuha ebilyo yewe n’abantu bage, Daudi agwarha oburhe bwenene n’okuhigirira kuyirha Nabali n’abantu boshi b’omu mulala gwage. Aliko Abigaili muka Nabali, aliri mukazi mwinja onalembera, anajira juba-juba kuha Daudi ebilyo, echola charhuma Daudi arhayirha Nabali n’abalume bage.​—1 Sa. 25:9-22, 32-35.

19 Omu mandi mango, omulebi Natani, ashambalira Daudi engani ya mulume muguma w’omuchire, wayibaga entama nguma muturanyi wage analiherhe eyi ayisima bwenene. N’obukali boshi, Daudi aderha ntya: “Kweri nk’oku Yehova analamire, oyola mulume wajiraga ntyo, akwanene ayirhwe!” (2 Sa. 12:1-6) Daudi aliyinji Esheriya ya Musa. Amango omwizi akayibire entama, byalihemere ahonge zindi ntama ene kw’eyola nguma ayibaga. (Kut. 22:1) Aliko si ahabwe obuhane b’okuyirhwa? Okuderha oku oyola mwizi  ayirhwe, bwaliri kuhane bukomere obola. Kweri, Natani aliri akolesa eyola ngani omu kurhabala Daudi amenye oku alijirire amaligo makomere bwenene! Aliko Yehova aliyerekene oku aherhe olukogo bwenene kulusha olu Daudi yewe aliri ayereka olala muntu wayibaga entama oshamberwe omu ngani ya Natani!​—2 Sa. 12:7-13.

Daudi arhayerekaga olukogo omulume oganirirwe omu ngani ya Natani (Olole echifungo che 19-20) *

20. Bichi omufano gwa Daudi gwakarhuyigiriza?

20 Amango Daudi aligwerhe oburhe bunene, arhola omuhigo oku Nabali n’abantu bage boshi bakwanene bayirhwe. Na buzinda Daudi aderha oku omulume w’omu ngani ya Natani akwanene kuyirhwa, eju y’ebyajiraga. Daudi aliri mulume mwinja; lero si, charhumaga aja aderha ok’oyola mwizi ahabwe obuhane bukalihire ntyo? Rhang’owaze oku byabaga byamarhengerera omu kalamo ka Daudi n’okuntu aliri achiyunva. Mw’agola mango, Daudi arhaligwerhe ezamiri zichere. Amango muntu mulebe ali achira abandi olubanja n’obukali, echola chiyerekene oku obwira bwage haguma na Yehova burhakomere. Yesu alikengusize bwenene abanafunzi bage ntya: “Muleke okuchira abandi olubanja yi nenyu murhachirwa olubanja; bulala okuntu muli mwachira abandi olubanja, intyo ku nenyu nji babachira lo.” (Mt. 7:1, 2) Rhujage rhwachihangana yi rhurhaba bantu b’omurhima gubi, rhunaje rhwachihangana kuba “bachire omu lukogo,” kuguma na Mungu werhu.

21-22. Njira zihe ziguma rhwayerekanamo olukogo?

21 Olukogo luheberwe mu binene olekere okuyunvira abandi obonjo konyine. Kweri, abantu bagwerhe olukogo banakolera abandi ebintu binja.” Bobola, rhweshi rhukwanene kulonza abakenere oburhabale bwerhu omu mulala, omu chibaga cherhu n’aharhulamire. Kweri hali njira zinene rhwakayerekanamo olukogo! Ka muntu mulebe akenere echirhulirizo? Ka rhwakamurhabala nkabaga omu kumuhereza akalyo changwa rhumujirire echindi chakajira echichakamuyigiriza? Omukristu wagalukire omu chibaga akenere echirhulizo changwa omwira mwinja wakamuheba omurhima si? Ka rhwakaganira n’abandi oburhumwa b’Obwami b’okurhuliriza? Eyola eli njira nguma omu njira zinja rhwakayerekanamo olukogo ku buli muntu rhwabuganene naye.​—Yob. 29:12, 13; Ro. 10:14, 15; Yak. 1:27.

22 Amango rhwamarhegera oku bantu baguma bakenere oburhabale buli nk’obola, rhwanabona oku rhugwerhe njira zinene rhwakabayerekamo olukogo. Amango rhwamayereka abandi olukogo, rhwanasimisa Darha w’embingu, Mungu oli “muchire omu lukogo”!

OLWIMPO 43 Sala ya Shukrani

^ mus. 5 Olukogo luli omu ngeso zinja za Yehova, enali ngeso buli muguma werhu akwanene kukuza. Mu gunola mwazi, rhwabona bulagurhe Yehova anayerekana olukogo, na nka gurhe rhwakayerekana eyola ngeso nyinja.

^ mus. 11 Y’omenya okuntu abagalukiire Yehova bakashuba kukomeza obwira bwabo haguma na Mungu na nka gurhe abashamuka bakabarhabala, olole mw’enola gazeti omwazi “Okuntu Wakashuba Kukomeza Obwira Bwawe Haguma na Yehova.”

^ mus. 60 AMAFASIRIYO M’EFOTO: Oku ali oku etaje y’enju yage, eshe w’omwana w’engaligali amabona omugala ali agaluka eka n’okulibirhira embuga y’amuhobera.

^ mus. 64 AMAFASIRIYO M’EFOTO: Bulala Mwami Daudi arhaligwerhe ezamiri zichere, aligwerhe omugayo, n’echola charhuma agwarha burhe bunene amango ayunva engani ya Natani, anaderha oku oyola mulume w’omuchire akwanene kuyirhwa.