Skip to content

Shimbukira oku mukololo gw'ebili mo

 MWAZI G’OKUYIGA 16

Ogenderere Kubona oku Enchungu eli y’Akamaro Bwenene

Ogenderere Kubona oku Enchungu eli y’Akamaro Bwenene

“Mwene-omuntu ayinjaga . . . kuhaana akalamo kage nka nchungu ahali ha banene.”​—MK. 10:45.

OLWIMPO 18 Tunathamini Fidia

OKU BUGEKE *

1-2. Enchungu bili bichi na bulagurhe rhuyikenere?

AMANGO omulume mushinganyanya Adamu ajiraga echaha, aheza obuhashe b’okugwarha akalamo k’esiku n’amango, arhali ku yenyine s’aliko n’oku bana akaburhire. Echi Adamu ajiraga chaliri chibi. Achishogaga yenyine okujira echaha. Aliko si, gurhe oku bilolere abana bage? Abana bage nta chintu chibi balijirire, barhanashunikaga Adamu mpu ajire echaha. (Ro. 5:12, 14) Adamu alikwanene kufa eju y’eby’ajiraga. Aliko si, Yehova akajirire chintu chilebe y’abana ba Adamu bagala kulama esiku n’amango? Nechi! Amango Adamu ayusa kujira echaha, Yehova ayinja afunula kubuya-buya nka gurhe akayokwere amamiliyoni m’oluburho lwa Adamu kurhenga omu muvumo gw’echaha n’olufu. (Mwa. 3:15) Oku kasanzi kage kakwanene, Yehova akarhumire Omugala kurhenga embingu “ahaane akalamo kage nka nchungu ahali ha banene.”​—Mk. 10:45; Yoh. 6:51.

2 Enchungu bili bichi? Amango eshamberwe omu mandiko me Chigiriki me Chikristu, enchungu lili beyi Yesu alipiraga ebi Adamu ahezaga. (1 Ko. 15:22) Bulagurhe rhukenere enchungu? Bulala nk’oku Esheriya eyerekene, erhegeko ly’okunali lya Yehova lyaliderhere oku obuguma-guma bwalikwanene buhaanwe oku buguma-guma. (Kut. 21:23, 24) Adamu alihezeze akalamo kage kashinganene. Omu kuyeneza okunali kwa Mungu, Yesu ahaana akalamo kage ka mwene-omuntu kashinganene. (Ro. 5:17) Omu kujira ntyo aba “Eshe w’Esiku n’Amango” wa balala bayerekene obwemere omu nchungu.​—Isa. 9:6; Ro. 3:23, 24.

3. Nk’oku olwandiko lwa Yohana 14:31; 15:13 luyerekene, bulagurhe Yesu aliri tayari kuhaana akalamo kage k’omuntu kashinganene?

3 Yesu aliri tayari kuhaana akalamo kage eju ya buzigire  bunene aligwerhe kw’Eshe w’embingu na ku rhwewe. (Osome Yohana 14:31; 15:13.) Obola buzigire bwamushunika ahigirire okugendereza obushwekerezi bwage kuhika oku buzinda n’okuyeneza obulonza bw’Eshe. Yesu ajiraga ntyo omu kugenderera kubera mwimana kuhika oku lufu lwage. Echola nji charhuma omuhigo Yehova aligwerhe kurhenga oku murhondero oku bantu ba buli buko n’eju y’egulu, nji gwayenera. Mu gunola mwazi rhwabona bulagurhe Mungu ayemeraga Yesu alibuke bwenene embere afe. Rhwashuba shambala oku bugeke eju y’omufano gwa mwandisi muguma we Biblia waliyerekene oku agwerhe shukurani nene eju y’enchungu. Na buzinda, rhwayinji bona nka gurhe rhwakayerekana oku rhusimisizwe n’enchungu na nka gurhe rhwakakomeza eshukurani yerhu oku nterekero Yehova na Yesu bahaanire eju yerhu.

BULAGURHE YESU ALEKERERAGWA ALIBUKE?

Owaze oku malibuko mangana gurhe Yesu alemberaga, y’ahaana enchungu eju yerhu! (Olole echifungo cha 4)

4. Shambala nka gurhe Yesu afaga.

4 Waza oku byarhengereraga omu lusiku luzinda embere Yesu ayirhwe. Chiro akaba okw’akahamagere bamalaika kamama bamulange, achilekerera omu fune z’abasoda be Roma bamufarhaga n’okumushurha kubi bwenene. (Mt. 26:52-54; Yoh. 18:3; 19:1) Bamamukobolesa echiboko chili chamucha kw’ebihulu oku mubiri. Buzinda bamamuhesa omurhi bajimubambako. Yesu amahwanza zengana ogola murhi aguheka emunda bajimuyirhira, aliko harhagerere bisanzi binene abasoda be Roma bamabwira owindi muntu aguheke. (Mt. 27:32) Oku Yesu amahika ahabamuyirhira, abasoda bamashurha emisumari omu fune n’omu magulu mage oku murhi. Echilo ch’omubiri gwa Yesu yi chabera ebihulu by’emisumari. Bera bage bagayire bwenene na nyina y’alaka, aliko abakulu b’Abayahudi bowe balibashekera Yesu. (Lu. 23:32-38; Yoh. 19:25) Yesu alibukire mu sa zinene. N’okubona ok’omubiri gwage guyorhere kubi, omurhima n’amahaha mage birhachili byakola bwinja, binakola bimukomerere okuyisa. Yesu alimenyere okw’agenderere kubera mwimana, n’embere afe, asalira Yehova esala ly’obuzinda. Amaja akuba egosi n’okuhaana akalamo kage. (Mk. 15:37; Lu. 23:46; Yoh. 10:17, 18; 19:30) Kweri, lwaliri lufu lwa kubuya-buya, luli mu malumwa manene, na lwa kabonerero!

5. Bichi Yesu yewe alibwene oku kali kabonerero kulusha okw’ayirhwaga?

5 Ku Yesu yewe, okuntu afaga, arhali by’ebyalimulazize bwenene. Ebi bamushobekaga byarhumaga bamuyirha, by’ebyalimugayisize bwenene. Bamubeshera oku adukangire Mungu; k’okuderha muntu orhakenga chiro n’ehityu Mungu changwa ezino lyage. (Mt. 26:64-66) Okubona gurhe abantu bakabeshera Yesu okw’arhagwerhe obukenge chiro ku Mungu, kwalimugayisize bwenene n’echola charhuma anihira oku Eshe arhakayemerere av’abonererwa omu njira eli nk’eyola. (Mt. 26:38, 39, 42) Bulagurhe si Yehova ayemeraga Omugala muzigirwa alibuke n’okufa? Leka rhulole mpanvu esharhu.

6. Bulagurhe Yesu alikwanene abambwe oku murhi gw’amalibuko?

6 Ey’oburhanzi, Yesu abambagwa oku murhi y’akula Abayahudi k’omuvumo baligwerhe. (Gal. 3:10, 13) Bavumwaga (kukomwa) bulala bahaanaga echilagane ch’okukenga Esheriya ya Mungu, aliko bagambwa kujira ntyo. Chiro akaba oku balikwanene kufa bulala baliri bana ba Adamu, ogola muvumo nago gwayinja chiyongera oku byakarhumire bafa. (Ro. 5:12) Esheriya Mungu ahaga Abaizraeli yaliderhere ok’omuntu wakajirire echaha chikwanene olufu, alikwanene ayirhwe. Changwa kandi, bakabambire oyola muntu oku murhi. * (Kum. 21:22, 23; 27:26) Bobola, omu kubambwa oku  murhi, Yesu ahereza abantu b’elyola shanja boshi bamulahiraga obushobozi b’okuyunguka n’enterekero yage.

7. Mpanvu ehe ya kabiri yarhumaga Mungu ayemera Omugala alibuke?

7 Rhushambalage oku mpanvu ya kabiri yarhumaga Yehova ayemera Omugala alibuke. Aliriri akomeeza Yesu oku kasi akakolere omu siku zayinja; K’okuderha kuba Mudahwa Mukulu werhu. Yesu alichibwenere nka gurhe bikomere okukenga Mungu amango omuntu ali omu chigeregezo chikomeere. Ayunva alibukire bwenene kuhika ahahemeraga omu sala oburhabale “omu kuyama bwenene n’emiziga.” Bulala Yesu naye aliyunvirhe alibukire bwenene, anamenya ebi rhulagirire, “anagwerhe obuhashe b’okurhurhabala” amango “rhuli rhwageregezwa.” Rhuherhe eshukurani nene emwa Yehova okubona akarhushimikira Omudahwa Mukulu w’olukogo wakayunvira “obuzamba bwerhu akasisi”!​—Ebr. 2:17, 18; 4:14-16; 5:7-10.

8. Mpanvu ehe ya kasharhu yarhumaga Mungu ayemera Yesu alibuzwe bwenene?

8 Eya kasharhu, Yehova ayemeraga Omugala alibuke ntyo, omu kushubiza oku chibazo ch’akamaro: K’abantu bakagenderera kubera bimana embere za Yehova amango baligeregezwa bwenene? Shetani yewe aderhere oku ntaye! Anayemeza oku abantu banakolera Mungu eju y’ech’abahere. Anayemerere oku abantu barhakengere Yehova kuguma na shokuliza wabo Adamu. (Yob. 1:9-11; 2:4, 5) Bulala Yehova alinihire obwimana b’Omugala, av’ayemera Yesu ageregezwe kuchubusya okuntu omuntu akagala kulembera. Yesu agenderera kuyorha mushwekerezi, n’omu kujira ntyo, ayerekana oku Shetani ali mubeshi.

OMWANDISI WE BIBLIA WALIYEREKENE ESHUKURANI NENE OKU NCHUNGU

9. Lwiganyo luchi entumwa Yowane arhulekere?

9 Obwemere bwa Bakristu banene bwakomezwe kugerera enyigirizo zilolere enchungu. Bagenderere kukola akasi k’okuhubiri chiro akaba oku bali babapinga, banalembeere ebibazo bya ngasi lubero bilerherwe n’obushaja. Rhushambale oku mufano gw’entumwa Yowane. Aligenderere kuhubiri oku bwimana okuli eju ya Kristu n’eju y’enchungu, nkabaga mu myaka erhalukire 60 ntya. Amango aliri hofi kuyeneza myaka 100, Oburhegesi bwe Roma bwahwanza kuwaza oku aliri muntu wakahanyageze obola burhegesi, n’echola charhuma bamuheka buhungiro n’okuja kumushwekera oku chizimba che Patmose. Gosa lichi alijirire? “Kuderha eju ya Mungu n’okuhaana obuhamirizi eju ya Yesu.” (Ufu. 1:9) Kweri, ogola guli mufano gwinja g’obwemere n’okulembera!

10. Nka gurhe amandiko Yowane ayandikaga mayerekene oku alibwene okw’enchungu eli ya kamaro bwenene?

10 Yowane ayerekene obuzigire bunene aligwerhe ku Yesu n’eshukurani yage oku nchungu omu mandiko ayandikaga mayerekezwe n’eroho lya Mungu. Mw’amola mandiko, ashambere kurhaluka kali 100 eju y’enchungu changwa eju y’ebintu binja enchungu yarhumire byashobokana kupata. Omufano, Yowane ayandikire ntya: “Nka hali omuntu wajirire echaha, rhugwerhe omurhabazi oli hofi na Darha, Yesu Kristu oli w’okunali.” (1 Yo. 2:1, 2) Kandi amandiko Yowane ayandikaga, mayerekene akamaro “k’okuhamiriza eju ya Yesu.” (Ufu. 19:10) Kweri, Yowane aliyerekene eshukurani nene eju y’echungu. Nka gurhe nerhu rhwakayerekana oku rhubwene okw’enchungu eli ya kamaro bwenene?

NKA GURHE WAKAYEREKANA ESHUKURANI YAWE OKU NCHUNGU?

Akaba kweri rhugwerhe eshukurani nene oku nchungu, rhwahima amashumi m’okujira echaha (Olole echifungo che 11) *

11. Bichi byakarhurhabala rhuhime amashumi?

11 Ohime amashumi m’okujira echaha. Akaba kweri rhugwerhe eshukurani oku nchungu, rhurhayinja rhwawaza mpu: ‘Birhahemere mpu nyinje nachihangana bwenene ntajiraga  echaha amango ndi nashumikwa. Nakajira echaha, nanaja nahema obubabale.’ Ahali h’okuwaza ntyo, amango rhwamashumikwa kujira echintu chibi, rhwayinja rhwaderha mpu: ‘Nanga! Okubona byoshi Yehova na Yesu banjirire, ntakafa najirire echintu chili nk’echola.’ Mw’akola kasanzi, rhwakahema Yehova emisi n’okumulakirira ntya: ‘Orhayemeraga echigeregezo champima.’​—Mt. 6:13.

12. Nka gurhe rhwakakolesa ehano lili omu 1 Yohana 3:16-18?

12 Ozigire bene-benyu na bali-benyu. Amango rhwamayerekana obola buzigire, eyi rhwamayerekana oku enchungu eli ya kamaro. Bulagurhe? Bulala Yesu ahaanaga akalamo kage, arhali mpu eju yerhu rhwenyine, si n’eju ya bene-berhu na bali-berhu. Bulala aliri tayari kufa eju yabo, k’okuderha oku bali b’akamaro bwenene embere zage. (Osome 1 Yohana 3:16-18.) Rhunayereka bene-berhu na bali-berhu oku rhubanihire kugerera okuntu rhuli rhwabakolera. (Efe. 4:29, 31–5:2) Omufano, rhunabarhabala amango balwere changwa amango bali balembera ebibazo bikomeere bwenene, kuheba han’ebinjira. Aliko si, gurhe rhwakajira nka mwene-werhu changwa mwali-werhu amajira changwa amaderha chintu chilebe chirhugayisize?

13. Bulagurhe rhukwanene kuyinja rhwababalira abandi?

13 Ka hanagera ebisanzi byakukomerera okubabalira mwene-werhu changwa mwali-werhu? (Law. 19:18) Akaba ntyo ku bili, okolese linola hano: “Mugenderere kulemberana n’okubabalirana oku bulonza chiro akaba omuntu agwerhe empavu y’okulaka-laka eju y’owindi. Nka kulala Yehova anabababalira oku bulonza, nenyu mukwanene mujire ntyo.” (Kol. 3:13) Buli mango rhwamababalira mwene-werhu changwa mwali-werhu, rhunayereka Darha w’embingu oku kweri rhubwene okw’enchungu eli y’akamaro bwenene. Nka gurhe rhwakagenderera kukomeza eshukurani yerhu k’olola luhembo lurhengere emwa Mungu?

NKA GURHE WAKAKOMEZA ESHUKURANI YAWE OKU NCHUNGU?

14. Njira nguma ehe rhwakayerekanamo oku rhugwerhe eshukurani nene oku nchungu?

14 Obwire Yehova koko oku nchungu. Mwali-werhu muguma oyirikirwe Joanna ogwerhe myaka 83 olamire omu Inde aderhere ntya: “Imbwene oku kuli kw’akamaro okuderha ebilolere enchungu omu masala mani buli lusiku n’okubwira Yehova koko kuyo. Omu masala mawe wenyine, owaze eju y’amagosa wakaba wajirire olola lusiku loshi, onabwire Yehova akubabalire kumo. Aliko, akaba wajirire echaha  chikomere, waba ey’onakenere oburhabale bw’abashamuka. Bakuyunviriza n’okukuha ehano ly’obuzigire lirhengere omu Chinwa cha Mungu. Basalira haguma nawe n’okubwira Yehova akubabalire, na ntyo, washuba kugenderera kugwarha obwira bukomeere haguma na Yehova.”​—Yak. 5:14-16.

15. Bulagurhe rhukwanene kurhola akasanzi k’okusoma eju y’enchungu n’okukengeera eju ya yo?

15 Okengeere oku bilolere enchungu. Mwali-werhu muguma oyirikirwe Rajamani ogwerhe myaka 73 aderhere ntya: “Amango namasoma eju y’amalibuko Yesu ageragamo, amasu mani manayunjula miziga.” Nawe wakayunva bikulumire oku murhima amango wamawaza malibuko mangana gurhe Mugala wa Mungu ageragamo. Aliko, ok’oli wagenderera kukengeera eju y’enterekero Yesu ahaanaga, ku n’obuzigire bwawe kuye n’Eshe bwagenderera kukomera. Orhabwene oku nawe byakahema opange okukengeera eju y’enchungu omu programe yawe y’okuyiga Ebiblia?

Kugerera ebilyo birhahemere bintu binene, Yesu ayereka abanafunzi bage okuntu k’okuyibuka enterekero yage (Olole echifungo che 16)

16. Nka gurhe rhwakayigiriza abandi oku bilolere akamaro enchungu erhuherhere? (Olole efoto eli oku chiganda.)

16 Oyigirize abandi oku bilolere enchungu. Buli mango rhuli rhwabwira abandi oku bilolere enchungu, ku n’eshukurani yerhu kuyo yagenderera kuluga. Rhugwerhe ebitabu n’evideo zinja byakarhurhabala kufasiriya abandi bulagurhe Yesu afaga eju yerhu. Omufano, rhwakakolesa esomo lya 4 ly’akatabu Emyazi Minja Erhengere Emwa Mungu! Elyola somo ligwerhe erhwe liderhere “Yesu Kristo Ali Inde” Changwa rhwakakolesa esura ya 5 y’echitabu Bichi Ebiblia Erhuyigirize? Eyola sura egwerhe erhwe liderhere “Enchungu: Luhembo Lwinja Lurhengerere Emwa Mungu.” Na buli mwaka rhunayerekana oku rhugwerhe eshukurani nene oku nchungu, omu kuhika oku Lwibuko l’Olufu lwa Yesu n’omu kuhamagala abandi n’obushiru nabo bayinjeko. Yehova arhuhere lukengo lunene l’okuyigiriza abandi eju y’Omugala!

17. Bulagurhe enchungu luli luhembo lwinja Mungu ahere abantu?

17 Nta ngangane, rhuherhe empanvu nyinja y’okukomeza n’okugenderera kuyerekana oku rhugwerhe eshukurani nene oku nchungu. Kugerera enchungu, rhwakagwarha obwira bukomeere haguma na Yehova chiro akaba oku rhurhashinganene. Kugerera enchungu, amakasi moshi ma Ibilisi nji mafa busha loshi. (1 Yo. 3:8) Kugerera enchungu, omuhigo Yehova aligwerhe kurhenga mira eju y’egulu, nji gwayenera. Egulu lyoshi nji lyaba paradizo. Buli muntu nji wabuganamo, nj’ab’azigiire Yehova n’okumukolera. Buli lusiku, rhujage rhwalonza okuntu rhwakayerekana oku rhugwerhe eshukurani nene oku nchungu; k’okuderha oluhembo lwinja bwenene lwa Mungu oku bantu!

OLWIMPO 20 Ulimtoa Mwana Wako Mpendwa

^ mus. 5 Bichi byarhumaga Yesu alibuzwa n’okuyirhwa? Gunola mwazi gwashubiza kw’echola chibazo. Gwashuba kurhurhabala rhukomeze eshukurani yerhu eju y’enchungu

^ mus. 6 Abaroma baligwerhe omugenzo g’okushurha banyankola-maligo boshi mw’emisumari changwa kubabamba oku murhi eyi banazene, na Yehova ayemera Omugala ayirhwa omu njira eli nk’eyola.

^ mus. 55 AMAFASIRIYO M’EFOTO: Mwene-werhu muguma ali ahima amashumi m’okulola efoto zibi, owindi ali ahima amashumi m’okunywa erhabi, n’owindi ali ahima amashumi m’okuyemera ebituliyo.