Skip to content

Shimbukira oku mukololo gw'ebili mo

 MWAZI G’OKUYIGA 25

“Nyenyine Nalonza Entama Zani”

“Nyenyine Nalonza Entama Zani”

“Nyenyine nalonza entama zani, n’okuzishishikala.”​—EZE. 34:11.

WIMBO 105 “Mungu Ni Upendo”

OKU BUGEKE *

1. Nka gurhe Yehova ali kuguma n’omukazi oli wayonsya?

“HALI omukazi wakayibagira omwana wage ochili wayonka si?” Ch’echibazo Yehova abazaga omu mango m’omulebi Isaya. “Chiro akaba oku abala bakazi bakayibagira, Nyono ntakafa nakuyibagire,” intyo ku Mungu abwirire olubaga lwage. (Isa. 49:15) Arhazigana kuchilinganya n’omukazi oli wayonsya. Aliko lero, ahala alijirire ko. Yehova alikoleseze obuguma ahakagarhi k’omukazi n’omwana wage omu kuyerekana kangana gurhe ayegerere bwenene abakozi bage. Hali bakazi banene bakashigikira ebi mwali-werhu muguma oyirikirwe Jasmin aderhere, “Amango oli wayonsya omwana wawe, onakola obuguma bukomere b’okugenderera omu kalamo koshi.”

2. Gurhe Yehova anachiyunva amango muguma omu bakiristu amachihenula kuye?

2 Amango moshi, chiro n’omuguma omu bana bage amachihenula oku chibaga che Chikristu n’oku kasi k’okuhubiri, Yehova anabona. Jaga wawaza kangana gurhe akwanene kuba ali achiyunva kubi omu kubona ebihumbi by’abakozi bage yi bazinda banahola * buli mwaka.

3. Bichi Yehova asimire bibe?

3 Banene mw’abola bene-berhu na bali-berhu bazigirwa babaga baholere, bali bagaluka omu chibaga, kandi rhunasima bwenene okubona bagaluka! Yahova asimire bagaluke, nerhu rhurhakabaga. (1 Pe. 2:25) Gurhe rhwakabarhabala bagaluke? Embere rhushubize kw’echola chibazo, bihemere rhurhange  rhumenye bichi birhuma baguma banaleka kuhika oku mbuganano n’oku mahubiri.

BICHI BIRHUMA BAGUMA BALEKA KUKOLERA YEHOVA?

4. Gurhe akasi k’omubiri kali kamira baguma?

4 Baguma bazindire eyi bamirirwe n’akasi kabo k’omubiri. Mwene-werhu Hung * olamire omu Azi, aderhere ntya: “Nalichilekerere imirwe n’akasi kani k’omubiri. Nayinja nachirhebeka oku yingala kukolera Yehova bwinja, bihemere ingwarhe birugu binene. Nantyo nalema nakola sa zinene bwenene. Nahwanza nagosa embuganano liguma-liguma, naluha nachihenula oku chibaga. Bibonekene oku egulu lili lyahenula abantu ku Mungu kubuya-buya.”

5. Gurhe mwali-werhu muguma alijirire amango abonaga ebibazo byamamuluga ko?

5 Bene-berhu na bali-berhu baguma bavunikire omurhima eju y’ebibazo bilugire. Anne w’omu Angletere, ali nyina wa bana barhano. Ashambere ntya: “Muguma omu bana bani aburhirwe n’obulema bukomere bwenene, hanagera amango muguma mu bali-bani achibwa omu chibaga na mugala wani alwalira omu rhwe.” Navunika omurhima natyo naleka okugera oku mbuganano n’oku mahubiri. Kubuya-buya, naluha nahola.” Rhulagire ku Anne bwenene n’omulala gwage, haguma n’abandi bali bahurana ebibazo bili kuguma n’ebyage!

6. Okurhakolesa olwandiko lwa Wakolosai 3:13, nka gurhe kwakarhuma omuntu achihenula oku lubaga lwa Yehova?

6 Osome Wakolosai 3:13. Baguma omu bakozi ba Yehova bavunikire omurhima eju y’ebi bene-berhu na bali-berhu b’omu chibaga baliri bajira. Entumwa Paulo yaliyerekene oku hakagera akasanzi rhwaba eyi rhuherhe “echikwanene kurhuma rhwalundumira” mwene-werhu changwa mwali-werhu. Rhwakaba rhwakolerwe oku mulyagane. Nka rhurhabere merangwe, rhwakaluha rhwanabika omujinya. Omujinya gwakaluha gwanarhuma omuntu achihenula oku lubaga lwa Yehova. Rhola omufano gwa Pablo, mwene-werhu w’omu Amerike ye Side. Alibesheerwe oku ajirire echintu chibi bwenene, n’abashamuka bayemera obola bubeshi bava bamuhana. Gurhe alijirire? Aderhere ntya: “Nagaya bwenene, nanava nachihenula oku chibaga.”

7. Bichi byakahikira omuntu oherhe entimanya zibi eju yage?

7 Changwa entimanya zibi zakahikira omuntu walivunire amarhegeko ma Mungu mira, zanarhuma awaza oku arhachikwanene obuzigire bwage. Chiro akaba alihungamire n’okubabalirwa, akawaza oku arhachivire aba mwinja wakashuba kuba muguma w’omu lubaga lwa Mungu. Mwene-werhu oyirikirwe Francisco aliri awaza ntyo. Aderhere ntya: “Nalihanirwe eju y’okujira echijiro ch’obubaraga chirhakwanene. Oku burhanzi, naligenderere kuja oku mbuganano, nahwanza kuvunika omurhima n’okuwaza oku ntachikwanene okuba omu lubaga lwa Yehova. Entimanya yani yaliri yanduma bwenene, nanawaza oku Yehova arhalimbabalire. Kubuya-buya, naleka okuhubiri n’okuja oku mbuganano.” Gurhe onawaza eju ya bene-berhu na bali-berhu bali bahurana n’ebibazo bili nk’ebila rhwamamala kuganira ko? Obagwerhe k’olukogo si? Ech’akamaro bwenene, gurhe Yehova anachiyunva eju yabo?

YEHOVA AZIGIRA ENTAMA ZAGE

Omungeri w’omuizraeli agendaga alaga bwenene oku ntama yaherere (Olole echifungo cha 8-9) *

8. Yehova anayibagira abachigerere kumukolera si? Ofasiriye.

8 Yehova arhakayibagira abachigerere kumukolera, aliko bachihenwire oku lubaga lwage;  arhanayibagira chiro ebi bamukolere omu kasi kage. (Ebr. 6:10) Omulebi Isaya alikolese omufano guyerekene bwinja-bwinja gurhe Yehova analaga oku bantu bage. Isaya ayandikire ntya: “Kuguma n’omungeri, nji ashishikalira ebibuzi byage. Nji agusha haguma ebyana-buzi n’efune yage, nji anabiheka oku chifuba chage.” (Isa. 40:11) Gurhe Omungeri Mukulu Yehova anachiyunva amango nguma y’omu ntama zage yamaja hale n’ezindi? Yesu aliyerekene okuntu Yehova anachiyunva amango abazaga entumwa zage ntya: “Gurhe muwazize? Nk’omuntu aherhe ntama 100, inguma ekahera, k’arhaleka 99 oku musozi n’okuja kulonza eyola yaherere? Na nk’amayibona, kweri imbabwirire, anasima bwenene eju yayo kulusha zila 99 zirhaliherere.”​—Mt. 18:12, 13.

9. Gurhe abangeri benja b’omu chihe che Biblia bagendaga bashishikalira entama zabo? (Olole efoto eli oku chiganda.)

9 Bulagurhe biyunvikene bwinja okulinganisa Yehova n’omungeri? Kwabulala omungeri mwinja omu chihe che Biblia agendaga ashishikalira entama zage bwenene. Daudi kwa mufano, alilwisize nyalukala n’echishengera omu kulanga echishumba chage. (1 Sa. 17:34, 35) Omungeri mwinja akwanene kumenya bwinja-bwinja akaba hali entama yaherere. (Yoh. 10:3, 14) Omungeri oli intyo akaleka ntama 99 ahantu habegerere changwa anazilekera ababo bangeri n’okuja kulonza eyaherere. Yesu alikoleseze ogula mufano omu kurhuyigiriza obukweri bwakamaro bwenene: “Darha oli omu mbingu arhalonzeze haba n’omuguma mw’abala badorho afe.”​—Mt. 18:14.

Omungeri wa mira w’omu Izraeli ali ashishikalira entama yabaga yaherere (Olole echifungo cha 9)

YEHOVA ANALONZA ENTAMA ZAGE

10. Nk’oku biyerekenwe omu Ezekieli 34:11-16, bichi Yehova alaganyize okujirira entama zage zaherere?

10 Yehova anazigira buli muguma werhu, kuheba hana “balala badorho” bajire hale n’echishumba chage. Kugerera omulebi Ezekieli, Mungu alilaganyize oku akalonzeze entama zage zaherere n’okuzirhabala zigalukire obwira bukomere haguma naye. Anayerekana entambu zikwanene kurholwa omu kuzirhabala, entambu omungeri w’omuizraeli alikwanene  kurhola nk’antama nguma yaherere. (Osome Ezekieli 34:11-16.) Ech’oburhanzi, omungeri alikwanene alonze entama, n’echola chakamurholere ebisanzi n’obushiru bunene. Na nk’amabona entama yaheraga, omungeri anayigalula omu chishumba. N’akaba entama yavunikire changwa eli nzara, omungeri alikwanene kushishikalira oku buzigire eyola nyama ezambire, anayisula obuvune, anayiheka, n’okuyilisa. Abashamuka bowe nka bangeri “b’echishumba cha Mungu,” bakwanene kurhola entambu zili nk’ezola yibarhabala buli muguma wachihenwire oku chibaga. (1 Pe. 5:2, 3) Abashamuka banalonza, banabarhabala bagaluke omu chibaga, n’okubayereka obuzigire omu kubahereza oburhabale bakenere bw’ekiroho. *

11. Bichi omungeri mwinja alimenyerere?

11 Omungeri mwinja anaba eyi amenyere bwinja oku byakashobokana entama ehere. N’eju y’echola, amango entama yamaja kuzerera hale n’echishumba, omungeri arhakayilibuza. Waza oku lwinganyo Mungu anarhulekera amango amarhabala muguma omu bakozi bage wagerere ah’achihenula kuye mango maguma.

12. Gurhe Yehova alikolere Yona?

12 Omulebi Yona alilibirhire engabane yage. Chiro akaba ntyo, Yehova arhayirukiraga amulekerera. Kuguma n’omungeri mwinja, Yehova alimuyokwere n’okushuba kumurhabala n’emisi alikenere y’amaliriza engabane yage. (Yon. 2:7; 3:1, 2) Aha buzinda, Mungu akolesa omurhi gw’elyanjwa [ekondi] omu kurhabala Yona abone akachiro ka buli kalamo k’omuntu. (Yon. 4:10, 11) Bichi ebyola birhuyigirize? Abashamuka barhakwanene kuyurukira balekerera olala waholere. Ahali h’okujira ntyo, abashamuka banapima kumenyerera ebyarhumire entama yaja hale n’echishumba. N’amango eyola ntama yamagalukira Yehova, abashamuka banagenderera kumuyereka oku bamuzigire n’oku bamulagire ko.

13. Okuntu Yehova alikolere omwandisi we Zaburi ya 73, bichi kurhuyigirize?

 13 Omwandisi we Zaburi ya 73 alivunikire enzoka amango aliri abona gurhe ababi bashushire nka bali bashishagira. Abaza kamaro kachi okujira obulonza bwa Mungu kugwerhe. (Zb. 73:12, 13, 16) Gurhe Yehova alijirire? Arhakwarangaga oyola mulume. Ahubwe, Mungu ayemera ebinwa by’oyola mwandisi byayandikwa omu Biblia. Buzinda, omwandisi we Zaburi aluha amenya oku nta chindi chakaha akalamo kerhu akachiro kulusha obwira haguma na Yehova. (Zb. 73:23, 24, 26, 28) Bichi ebyola birhuyigirize? Abashamuka barhakwanene kuchira balala bali babaza akamaro k’okukolera Yehova olubanja juba-juba. Ahali h’okubakwaranga, abashamuka bakwanene kupima kuyunva ebirhumire bali baderha ntyo n’okujira ebi bali bakola. Ahola, abashamuka bakakolesa Ebiblia omu kubaheba omurhima.

14. Bulagurhe Eliya alikenere oburhabale, na gurhe Yehova alimuhere bo?

14 Omulebi Eliya aliri alibirha Omugoli Yezebeli. (1 Fa. 19:1-3) Awaza oku nta windi muntu waliri akolera Yehova nka mulebi, analema awaza oku ntacho akasi kage kamalire. Eliya aluha avunika omurhima n’echola charhuma achibaga olufu. (1 Fa. 19:4, 10) Ahali h’okukwaranga Eliya, Yehova amuyibusa oku arhali yenyine, oku akwanene kulangalira emisi ya Mungu, n’oku halichiyorhere kasi kanene alikwanene akole. Yehova aliyunvirize n’olukogo ebyalilazize Eliya anamuhereza engabane zihyahya. (1 Fa. 19:11-16, 18) Bichi ebyola birhuyigirize? Rhweshi haguma, n’ahanene  abashamuka, rhukwanene rhukolere entama za Yehova oku lukogo. Nk’omuntu ali ayunva oburhe changwa ali abona nk’arhakwanene olukogo lwa Yehova, abashamuka banamuyunviriza amango ali ababwira gurhe ali achiyunva. Ahola, banapima kuyibusa entama yaherere oku Yehova amubwene oku ali w’akamaro.

GURHE RHUKWANENE KUWAZA EJU Y’ENTAMA ZA MUNGU ZAHERERE?

15. Nk’oku olwandiko lwa Yohana 6:39 luderhere, gurhe Yesu aliri abona entama z’Eshe?

15 Gurhe Yehova asimire rhuwazage eju y’ebibuzi byage byaherere? Yesu alirhulekere olwiganyo lwinja. Alimenyere oku ebibuzi bya Yehova byoshi biherhe akachiro omu mesho mage, na ntyo Yesu alijirire oku agalire koshi omu kurhabala “entama z’eshanja lye Izraeli” zigalukire Yehova. (Mt. 15:24; Lu. 19:9, 10) Yewe nka mungeri mwinja, Yesu alilwisize okwage koshi y’arhaheza chiro n’enguma omu ntama za Yehova.​—Osome Yohana 6:39.

16-17. Gurhe abashamuka bakwanene bachiyunve oku bilolere okurhabala balala bachihenwire? (Olole echisanduku “ Okuntu Entama Yaherere Yakachiyunva.”)

16 Entumwa Paulo yalihanwire abashamuka b’omu chibaga che Efeso bayige olwiganyo lwa Yesu amango aderhaga ntya: “Mukwanene murhabale abazamba n’okuyibuka ebinwa bya n’Ahamwerhu Yesu, amango aderhaga ntya: ‘Hali busime bunene omu kahana kulusha obuli omu kuhabwa.’” (Mdo. 20:17, 35) Kweri, zene abashamuka baherhe kasi kanene k’okulwa oku bantu ba Yehova. Salvador, mushamuka muguma w’omu Espanye, aderhere ntya: “Eyi nawaza kangana gurhe Yehova analaga oku ntama zage zaherere, inanyunva bimpirire emisi injire okwani koshi y’imbarhabala. Nyono nka mungeri w’ekiroho, inchizerere oku Yehova alonzeze imbalwe ko.”

17 Boshi baganirirwe mu gunola mwazi bali bachihenwire, barhaberwe bagalukire Yehova. Kanola k’akasanzi kenja, bandi banene bali bachihenwire balonzeze bajire oko kon’okola. Omwazi gukulikire ho nji gwaganirira oku bunene ebi rhwakajira yi rhubarhabala bagalukire Yehova.

WIMBO 139 Wazia Wakati Vitu Vyote Vitakuwa Vipya

^ mus. 5 Bichi birhuma omuntu waliri akolera Yehova oku bwimana mu myaka minene anahika amango achihenula oku chibaga? Gurhe Mungu anachiyunva eju yabo? Gunola mwazi gwahana ebishubizo kw’ebyola bibazo. Gwashuba kuganirira somo lichi rhwakapata omu kulola okuntu Yehova alirhabere bantu baguma mira balihikire akasanzi bachihenula kuye.

^ mus. 2 AMAHUGULO M’EBINWA: Omuhubiri waholere, ali olala wamageza myezi ndarhu changwa kurhalusa buzira kahana eraporo yage y’akasi k’okuhubiri n’okujira abanafunzi. Chiro akaba ntyo, abaholere nabo bachili bene-berhu na bali-berhu, rhunabazigire.

^ mus. 4 Mazino maguma mahindamwirwe.

^ mus. 10 Omwazi gukulikire ho, nji gwaganirira enjira abashamuka bakakulikira mw’ezola ntambu.

^ mus. 60 AMAFASIRIYO M’EFOTO: Omungeri w’omuizraeli oshishikere entama yaherere, agendaga aja kuyilonza n’okuyirhabala egaluke omu chishumba. Zene, abangeri b’ekiroho bali bajira oko kon’okola.

^ mus. 64 AMAFASIRIYO M’EFOTO: Amango mwali-werhu waholere ali alinga ebisi omu kulonza abalame, ali alola Bahamirizi babiri bali bahubiri n’obushagaluke oku mahubiri g’oku mugaro-garo.