Koma ka ga abin da ke ciki

Koma secondary menu

Shaidun Jehobah

Hausa

Mene ne Ake Nufi da Kalmar Nan Sama?

Mene ne Ake Nufi da Kalmar Nan Sama?

Amsar Littafi Mai Tsarki

A cikin Littafi Mai Tsarki, an yi amfani da kalmar nan “sama” a hanyoyi uku: (1) sarari; (2) wurin da halittun ruhu suke da kuma (3) alamar matsayi mai girma. A duk lokacin da aka yi amfani da wannan kalmar, batun da ake tattaunawa ne zai taimake mu mu fahimci ainihin abin da ake nufi. *

  1. Sarari. Wannan yana nufin sararin sama inda iska ke hurawa, inda tsuntsaye suke yawo, inda ake yin hadari ko kankara da kuma inda ake ganin walkiya. (Zabura 78:26; Misalai 30:19; Ishaya 55:10; Luka 17:24) Yana kuma iya nufin inda “rana da wata da taurari” suke.—Kubawar Shari’a 4:19; Farawa 1:1.

  2. Wurin da halittun ruhu suke. “Sama” tana iya nufin wurin da halittun ruhu suke, wato, ba duniya ko sararin samaniya ba, kuma irin rayuwar da ke yi a wurin ya fi na duniya. (1 Sarakuna 8:27; Yohanna 6:38) Jehobah, wanda shi “Ruhu ne,” da kuma mala’iku ne suke zama a wannan wurin. (Yohanna 4:24; Matta 24:36) A wani lokaci ana iya amfani da kalmar nan “sammai” idan ana maganar mala’iku masu aminci wato, “taron halittu masu tsarki.”​—Zabura 89:5-7, Littafi Mai Tsarki, Juyi Mai Fitar da Ma’ana.

    Kari ga hakan, Littafi Mai Tsarki yana amfani da kalmar nan “sama” idan yana nufin ‘mazaunin’ Jehobah. (1 Sarakuna 8:43, 49; Ibraniyawa 9:24; Ru’ya ta Yohanna 13:6) Alal misali, Littafi Mai Tsarki ya annabta cewa za a jefar da Shaidan da aljannunsa daga sama, wato, ba za a sake yarda musu su je gaban Jehobah ba. Amma za su ci gaba da zama halittun ruhu.—Ru’ya ta Yohanna 12:7-9, 12.

  3. Alamar matsayi mai girma. A cikin Littafi Mai Tsarki akan yi amfani da kalmar nan “sama” idan ana maganar matsayi mai girma, musamman idan ana magana game da wadanda suke mulki. Wadanda za a iya kwatanta da wannan kalmar su ne:

    • Jehobah, wanda shi ne Madaukakin sama da kasa duka.​—2 Labarbaru 32:20; Luka 15:21.

    • Mulkin Allah, wato, gwamnatin da za ta sauya sarautar ’yan Adam. Littafi Mai Tsarki ya kira wannan Mulkin “sababbin sammai.”—Ishaya 65:17; 66:22; 2 Bitrus 3:13. *

    • Kiristocin da suke da begen zuwa sama.​—Afisawa 2:6.

    • ’Yan Adam masu mulki da suka daukaka kansu bisa talakawansu.​—Ishaya 14:12-14; Daniyel 4:20-22; 2 Bitrus 3:7.

    • Aljannun da suke iko da duniya.​—Afisawa 6:12; 1 Yohanna 5:19.

Yaya sama take?

Halittun ruhu suna aiki tukuru. Miliyoyin halittun ruhu suna “aikata nufin” Jehobah.​—Zabura 103:20, 21, Juyi Mai Fitar da Ma’ana; Daniyel 7:10.

Littafi Mai Tsarki ya ce sama yana da haske sosai. (1 Timotawus 6:15, 16) Annabi Ezekiyel ya lura cewa sama tana da ‘haske’ sosai a cikin wahayin da aka nuna masa, amma a cikin wahayin da aka nuna wa Daniyel, Daniyel ya ga “kogin wuta.” (Ezekiyel 1:26-28; Daniyel 7:9, 10, Littafi Mai Tsarki) Sama wuri ne mai tsarki, da tsabta kuma yana da kyan gani sosai.​—Zabura 96:6; Ishaya 63:15; Ru’ya ta Yohanna 4:2, 3.

Yadda Littafi Mai Tsarki ya kwatanta sama yana da ban sha’awa sosai. (Ezekiyel 43:2, 3) Duk da haka, ’yan Adam ba za su iya gane gaba daya yadda sama take ba domin bayanin ya fi karfinsu.

^ sakin layi na 3 Asalin kalmar Ibrananci da ake yin amfani da ita a matsayin “sama” tana nufin abin da ke da “tsawo” ko kuma abin da aka “daukaka.” (Misalai 25:3) Ka duba The New Brown, Driver, and Briggs Hebrew and English Lexicon of the Old Testament, shafi na 1029.

^ sakin layi na 9 McClintock and Strong’s Cyclopedia ya ce sabbabin sammai da aka ambata a Ishaya 65:17 yana nufin “sabuwar gwamnati da kuma sabon mulki.”​—Na IV, shafi na 122.