Bäsi kä 40 te nitre Israel nämene kä ngwarbe nötare yete. Niaratre juta keta kabre dite ye ganainbare. Niaratre nämene nünentubu kä kiare juta Moab yekänti, ñö kädrikri Jordán ye ken, aune kä namanina braibe niaratre käne rabakäre Kä Käbämikani ietre yekänti. Nane nitre Israel kä diandre jai ye jürä namani rei Balac kä Moab yebätä. Aisete ni kädeka nämene Balaam ye käräbare kwe ne kwe rikadre kä Moab yekänti aune kukwe tare niedre kwe nitre Israel rüere, ye abokän kukwe tare rabadre bare nitre Israel yebätä ye niedre kwe ja dibiti.

Akwa Jehová niebare Balaam ie: ‘Mäkwe ñaka kukwe tare nie nitre Israel rüere’. Aisete Balaam ñaka nikani Moab. Rei Balac käkwe niara nübaibareta bobukäre aune niara törbadre dre dre ie ye biain kwe ie käbämikani kwe, akwa Balaam ñaka kukwe ye kani ngäbiti. Ngöbökwe niebare ie: ‘Mä raba niken. Akwa tikwe dre niedi mäi ye erere mäkwe nie’.

Balaam nikani mula kwe yebiti Moab kä mötörikri ye kokwäre. Niara ja töi mikani kukwe tare niere nitre Israel rüere, Jehová ñaka ye nuain manabare ie akwa tö namani nuain. Ángel Jehovakwe ja mikani bämä jire jiete. Balaam ie ángel ye ñaka namani tuin, akwa mula abokän ie namani tuin. Käne, mula ye nikani ji gwäräbätä aune nikani kä dubete. Ye bitikäre, mula ye namani ja kete jä mikani kire yebätä aune namani Balaam ngoto kete dime jä yebätä. Mrä mada, mula namani kitanintubu jite. Angwane, Balaam namani nemen mula mete krimanabiti.

Ye bitikäre, Jehovakwe mula mikani blite. Mula ngwantaribare Balaam ie: ‘¿Ñobätä mätä ti mete?’. Balaam niebare: ‘Ni töi ñaka ye erere mätä ti bä mike. Ngitra tädre ti kisete akräke tikwe mä kämikadre’. Mula niebare ie: ‘Kä kwati krubäte te tita mä ngwen. ¿Ti tärä ne erere nuainne mäbätä?’.

Angwane, Jehovakwe ángel mikani tuare Balaam ie. Ángel niebare ie: ‘Mä ñaka rikadre kukwe tare niere nitre Israel ye rüere Jehová nieba mäi’. Balaam niebare: ‘Ti ja miri ngite. Tibike nikenta ja gwirete’. Akwa ángel niebare ie: ‘Mä raba niken Moab, akwa Ngöbökwe dre niedi mäi ye aibe mä raba niere’.

 ¿Kukwe ye namani ja töi kräke Balaam ie raba ruin mäi? Ñakare, ñobätä ñan aune ye bitikäre bämä jire ja töi mikani kwe kukwe tare niere nitre Israel rüere. Akwa bämä jire Jehovakwe mikani kukwe kwin niere. Mrä mada, nitre Israel rü ganinkä Moab rüere aune Balaam murie ketani. Kenanbe Balaam käkwe Jehová kukwei mikadre täte ye rabadre bäri kwin, ¿ñan ererea?