Känändre nekänti

Indice yete känändre

 KUKWE TÄRÄ KWATABÄTÄ: ¿NIRE ABOKÄN NITRE TESTIKO JEHOVAKWE?

¿Nitre ye abokän ño?

¿Nitre ye abokän ño?

Kukwe nunkwe ye tä ükaninte keteitibe, nunta kä jökräbiti tibien aune nun ñaka tä kukwe nuainne keteitibe nitre tä kukwe mada mike täte yebe. Oficina bäri kri nunkwe ye tä Estados Unidos. Akwa, nun Testiko jökrä bäsi tä nüne juta madate. Ñodre, kä jökräbiti nunta millon ni kwä, aune juta 230 bätä kä ketare ketare känti nunta nitre tötike Bibliabätä. Ye köböire Jesukwe kukwe niebare ye erere nunta nuainne: “Gobran Ngöbökwe kukwei kwin ne driedi kä jökräbititibien kukwe mikakäre gare juta jökrä ie” (Mateo 24:14TNM).

Nunta nüne medente ye kärera, juta jene jene känti gobran tä kukwe ükete ye nunta mike ütiäte aune mike täte, akwa nun ñaka ja mike kukwe gobrankwe yete. Ye köböire Jesukwe kukwe niebare nitre ja tötikaka kwe ie ye erere nunta nuainne: “Mun ñaka ja mike nitre kä nebätä yekri”. Ye medenbätä nun ñaka ja mike kukwe gobrankwe yete aune nun ñaka rüre (Juan 15:19, TNM; 17:16). Yebätä, Rübare Kri Bobukäre ye ngwane nitre testiko Jehovakwe kwati kitani ngite, nuainbare tare aune ruäre murie ketani. Ni iti Alemania nämene käne obispore käkwe niebare: “Niaratre ye aibe raba niere kukwe metrebätä ñaka ja töi miketre kukwe ruäre nuainne Tercer Reich yete”.

“[Nitre testiko Jehovakwe] tätre ja töi mike kwatibe ja ngwankäre metre. Nitre töi kwin ye kwrere ni raba mike ütiäte gobrankäre, akwa ni ñaka raba niaratre ye töi mike jire sribi ye kain ngäbiti. [...] Tätre gobran ye mike ütiäte jai, akwa Gobran Ngöbökwe ye aibe raba kukwe jökrä kä nebätä ye ükete ni kräke ye gare ietre.” (Periódico Nová Svoboda, República Checa)

Akwa, yebätä nun ñaka ja mäke nitre madabe ye ñan ai gärätä. Jesukwe orabare nitre ja tötikaka kwe yebätä angwane niebare kwe Ngöböi: “Mäkwe niaratre diandrekä kä nebätä ye ti ñaka tä ribere mäi” (Juan 17:15TNM). Ye medenbätä, nunta sribire, nunta niken jondron kökö aune niken kwelate nitre mada ye erere.