“Mäkwe ja ketai Ngöböbe yekwe mä töi mikai jäme aune ja rabai ruin kwin mäi. Käre töita mäbätä aune tö jondron kwin ie mä kräke rabai ruin mäi.” (CHRISTOPHER, MONSO NÜNANKA GHANA)

“Mätä nemen ulire ye ngwane mä tuin Ngöböi, bätä töita nemen bäri mäbätä aune tä nemen bäri mä tarere.” (HANNAH, MERI CHI KÄ 13 BITI NÜNANKA ESTADOS UNIDOS)

“Ngöböta ti mike tuin jai ja ketamuko kwe erere gare tie ye tä ti töi mike jäme. Tä ja kete tibe ye ütiäte krubäte ti kräke.” (GINA, MERI NÜNANKA JAMAICA KÄ 45 NÄREBITI)

Christopher, Hannah aune Gina ye ñan aibe tä töbike ye erere. Nitre kwati kä jökräbiti tibien yei gare kwin Ngöböta niaratre mike tuin jai ja ketamuko erere. ¿Aune mä? ¿Ja ruin Ngöbö ken mäi? ¿Mä törba ja ketai kwin ben o ja ketai bäri ben? Akwa nane mä raba ngwentari jai: “¿Ti ni ngwarbe kä tibienbätä ne raba nemen ño ja ketamuko Ngöbö bäri dite yebe?”.

NI RABA NEMEN JA KETAMUKO NGÖBÖKWE

Ni raba ja kete kwin Ngöbö ni Sribekä yebe nieta Bibliakwe. Ñodre, Ngöbökwe Abrahán ni hebreo ye kädekani “ja ketamuko tikwe” nieta Isaías 41:8 yekänti. Arato Santiago 4:8 yekänti ni nübaita kukwe ne nuainne ye mike ñärärä: “Krötö känime Ngöbö ken munkwe amne Ngöbökwe krötadi känime mun ken”. Kukwe ye jökrä tä mike gare, ni raba nemen ja ketamuko Ngöbökwe. Akwa, ¿niara ñaka tuin nie se ño ni raba nökrö ken?

Ño nitre tä nemen ja kete yebätä ani töbike kukwe ye mikakäre gare jai. Nitre nibu ie jata nemen gare kena ye ngwane tätre ja kädeke jai kwärikwäri. Tätre kite blite jankunu jabe ye ngwane, töita ño aune jata nemen ruin ño ietre ye tätre kite niere jai kwärikwäri, aune tätre kite ja kete bäri. Tätre jondron nuainne ja kräke kwärikwäri ye ngwane tätre kite ja kete bäri kwin. Ye erere nita kite ja kete Ngöböbe. Ani kukwe ye mike gare bäri kwin jai.