Känändre nekänti

Indice yete känändre

 KUKWE TÄRÄ KWATABÄTÄ: ¿ÑOBÄTÄ JA TARE NIKATA KRUBÄTE? ¿ÑONGWANE RIAIKÄ?

¡Nitre ñaka ngite murie ketanina kwati krubäte!

¡Nitre ñaka ngite murie ketanina kwati krubäte!

Noelle meri chi nämene ni mada tarere krubäte yebätä kä nämene nemen juto jondron bä sribekäre. Bati kä moren dere ye ngwane nikani ju trökri, ngoto ritaninkä aune betaninkä piscinante. Bämän namanina krobu käne kä rabadre kobokäbiti angwane ngatani ñöte (o murie nötaninkä ñöte).

Köbö 14 diciembre 2012 yete monsotre kia ni gre murie ketani kwela Connecticut (Estados Unidos) yekänti, ye ngätäite, Charlotte, Daniel, Olivia aune Josephine nämene. Köbö ye näire, nitre grebiti ni ti murie ketani. Doboi metani ye näire, gobran Barack Obama käkwe nitre kia ye kädekaninte aune nitre nämene ulire yei niebare kwe: “Kukwe tare namani bare ne ñaka raba nementa bare mada”.

Bano, meri bati kä 18 biti nünanka Irak, nikani nüne mräkätre ben Noruega kä 1996 yete. Nitre ja ketamuko kwe nämene kädeke: Sol. Tare krubäte akwa, köbö 22 julio 2011 yete ni töi käme krubäte käkwe nitre 77 murie ketani, ye ngätäite Bano nämene siba, ni bikaka kri yekwe kukwe ne niebare: “Ti törba niei munye, bäri kwin [...] tikwe ni mada murie ketadre bäri näre akwa ñaka nibi bare tie”.

Kä jökräbiti kukwe tare ye erere tä nemen bare abokän kukwe nuata. Nitre tä juruainne tare, kukwe tare nuainta ni madabätä, rü, nitre kwati murie ketata kä jürä ngwankäre ni madabätä, kukwe tare tä nakainkä aune kukwe mada tä nemen bare ye tä nemen tare nie aune tä ni mike ja tare nike yebätä töbike. ¡Nitre ñaka ngite murie ketanina kwati krubäte! ¡Ja tare nikata krubäte! Aune ñobätä kukwe ye jökrä tä nemen bare ye ñaka nüke gare.

Nitre ruäre tä ngite kite Ngöböbiti aune Ngöbö töi ñaka nibätä tätre nütüre. Nitre mada abokän tä niere nita ja tare nike tuin ie akwa ñaka tä ni dimike. Aune kukwe tare ye rabadre bare nierare nitre ruäre tä niere. Kukwe yebätä kukwe keta kabre jene jene nieta. ¿Ñokänti raba nemen gare nie? Kukwe mada ja känenkäre yekänti nikwe ja tötikai Ngöbö Kukwei Biblia yebätä, ne kwe ñobätä ja tare nikata aune dre ie tö ngwan raba ye mikakäre gare jai.