Känändre nekänti

Indice yete känändre

 KUKWE JA TÖTIKARA 5

Samuel nämene käre kukwe kwin nuainne

Samuel nämene käre kukwe kwin nuainne

Samuel nämene chi ye ngwane, nünanbare kwe aune sribibare kwe tabernáculo yete. Tabernáculo yete nitre nämene niken Jehová mike täte. ¿Ñobätä Samuel nämene nüne yete ye mä törba gai? Kukwe ne mikakäre gare jai, kukwe mikata gare meyebätä ye ani mike gare käne jai. Niara kädeka nämene Ana.

Käre Ana tö nämene monso tuai jakwe, akwa monsoi ñaka nämene nemen. Yebätä orabare kwe Jehovai aune ribebare kwe ie: “Jehová, ti dimike, tita kärere mäi”. Aune käbämikani kwe ie: “Monso rabai iti tikwe angwane tikwe juain nüne aune sribire tabernáculo yete”. Jehovakwe orasion kwe kukwe nuani, aune mrä mada Ana monsoi namani. Monso chi ye kädekani kwe Samuel. Kä namanina komä o kobokä niarabiti angwane, Ana käbämikani ye erere nuainbare kwe aune nikani ngwena tabernáculo yete sribire Ngöbö kräke.

Elí nämene sribire sacerdote bäri kri ye erere tabernáculo yete. Monso nibu kwe namanina umbre, ye nämene sribire yete arato. Tabernáculo yete Jehová mika nämene täte, ye medenbätä nitre nämene yete ye rabadre ja ngwen kwin. Akwa Elí monsoitre nämene kukwe käme krubäte nuainne Samuel okwäbiti. ¿Samuel kukwe käme nuainbare niaratre ye erere? ¿Mä raba dre niere?... Ñakare, Jehová nämene dre ribere ye erere Samuel nämene nuainne, rün aune meye käkwe driebare ie ye erere.

¿Elí käkwe dre nuaindre? Rabadre monsotre kwe ye töi ükete, ¿ñan ererea?... ¡Jän ye erere! Elí ñaka rabadre tuenmetre sribire tabernáculo yete. Akwa niarakwe ñaka ye erere nuainbare. Ye medenbätä Jehová namani rubun krubäte niara aune monso nibu kwe ye kräke, aune mikani kwe ja ngie nuin.

Jehovakwe kukwe niebare ye Samuel tä mike gare Elí ie

Bati deu, Samuel nämene kübien aune ñäkä nämene ie. “¡Samuel!”, nie namani ie. Niara nikani betekä Elí känti, akwa Elí niebare ie: “Ti ñaka mä kärere”. Ye erere namaninta bare bobu niarabätä. Akwa bämäkäre, Elí niebare Samuel ie: “Ñäkäta mäi angwane, mäkwe nie: ‘Blite, Jehová.  Tita mä kukwe nuin’”. Samuel ye nuainbare angwane, Jehovakwe niebare ie: “Mäkwe nie Elí ie tibike mräkätre kwe mike ja ngie nuin kukwe käme krubäte nuainbare kwetre yebätä”. ¿Namani nuäre Samuel kräke kukwe ne mikakäre gare Elí ie? ¿Mä raba dre niere?... Ñan namani nuäre kräke raba ruin nie. Erametre kä jürä namani Samuelbätä kukwe ye mikakäre gare ie. Akwa, Jehová mikani täte kwe aune kukwe ye mikani gare kwe Elí ie. Ngöbökwe kukwe niebare ye namani bare: ye bitikäre, Elí aune ngobo nibu ngatani.

Ni raba ja tötike krubäte Samuel yebätä. Nitre mada nämene kukwe käme nuainne niara okwäbiti, akwa Jehová tö nämene dre dre ie ye erere niarakwe nuainbare käre. ¿Mäkwe ye erere nuaindi? ¿Mäkwe ja ngwain Samuel erere aune mäkwe Jehová mikai täte jankunu? Mäkwe ye nuaindi angwane mä käi rabai juto Jehovabätä aune tata bätä mama yebätä.

ANI ÑÄKE BIBLIABÄTÄ: