Känändre nekänti

Indice yete känändre

 KUKWE JA TÖTIKARA 8

Josías ja ketamuko kwin känänbare

Josías ja ketamuko kwin känänbare

¿Jehová tö dre nuainmana nie ye nuäre nuaindre raba ruin mäi?... Ye ñaka nuäre nitre kwati tä nütüre. Akwa ye nuäre nuaindre drieta Bibliakwe. Tä kukwe kira mike gare nie Josías yebätä, monso yekwe ja di ngwani krubäte Jehová mikakäre täte. Ja ketamuko kwin känänbare kwe yekwe dimikani. Ani kukwe mada mike gare jai Josías aune ja ketamuko kwin namani kwe yebätä.

Josías rün kädeka nämene Amón aune nämene reire Judá. Amón nämene ja ngwen käme krubäte aune jondron ngwarbe üai sribebare ngöböre ye nämene mike täte. Amón krütani ye ngwane, Josías namani reire Judá. ¿Josías mikani reire ye ngwane kä nämene kwäbebiti gare mäi? ¡Krire kä nämene kwä kwä niarabiti! ¿Ja ngwani käme kwe, rün ye erere?... Ñakare.

Ngöbö ngwarbe mikadre täte ye käme Sofonías niebare nitre ie

Josías nämene chi ye ngwane, tö namani Jehová mikai täte. Yebätä ja ketamuko kwin känänbare kwe. Nitre nämene Ngöbö tarere ye känänbare kwe, aune niaratrekwe dimikani Jehová mike täte. ¿Nire nire nämene ja kete Josías ben?

Iti abokän Sofonías Ngöbö kukwei niekä. Niarakwe kukwe ne niedre nitre Judá ie:  “Munkwe ngöbö ngwarbe mikai täte jankunu angwane, kukwe tare rabai bare munbätä”. Josías käkwe Sofonías kukwei mikani täte yebätä käre nämene Jehová mike täte, aune ñaka nämene jondron ngwarbe üai sribebare ngöböre mike täte.

Ni mada nämene ja kete Josías ben abokän Jeremías. Kä nämene ja näre bäsi niaratre yebiti, aune niaratre nämenentre monsore ye ngwane, nämenentre nüne bäsi ja ken. Jeremías aune Josías ja dimikani kwärikwäri Jehová mikakäre täte. Niaratre nämene ja kete kwin krubäte, yebätä Josías krütani ye ngwane, Jeremías kansion tikabare kräke namani ulire krubäte ye mikakäre gare.

Jeremías aune Josías ja dimikani kwärikwäri Jehová mikakäre täte

Ni raba kukwe keta kabre mike gare jai Josías yebätä, ¿ñan ererea?... Niara nämene chi ye ngwane tö namani Jehová mikai täte. Aune yekäre, rabadre nitre Jehová tarekä ye känene ja ketamukore. Mä tö Jehová mikai täte arato, ¿ñan ererea? Yebätä mäkwe nitre Jehová tarekä ye känändre ja ketamukore ye ütiäte krubäte.

ANI ÑÄKE BIBLIABÄTÄ: