Känändre nekänti

Känändre página mada yekänti

Indice yete känändre

Testiko Jehovakwe

ngäbere

Mäkwe monsotre mäkwe tötika

 KUKWE JA TÖTIKARA 4

Käi namani juto rün aune Jehová yebätä

Käi namani juto rün aune Jehová yebätä

¿Jefté tä kukwe meden käbämike Jehovai?

Ñaka namani nuäre Jefté ngängän kräke, akwa rünkwe kukwe käbämikani ye mikani nemen bare kwe

¿Monso chi merire tä bämikani ye nire gare mäi?... Biblia ñaka niara ye kä niere, akwa rün kädeka nämene Jefté mikata gare kwe nie. Niarakwe kukwe keteiti nuainbare ye käi namani juto Jehová aune Jefté yebätä. ¿Mä törba kukwe mada mikai gare jai Jefté aune ngängän kwe yebätä?

Jefté töi nämene kwin krubäte. Ne madakäre, käre nämene kä denkä krubäte jai ngängän kwe tötikakäre Jehová yebätä. Arato niara ye dite aune juta ye jie ngwan gare kwin ie. Yebätä nitre Israel niebare ie: “¿Mä raba nun jie ngwen rü yebätä?”.

Jehovakwe Jefté dimikadre rü ganainne käräbare kwe ie. Ganain kwe angwane, kukwe ne nuaindi kwe käbämikani kwe ie: niara näinta ja gwirete ye ngwane, nire jatai käne niara kain ngäbiti ye biain kwe Jehovai. ¿Dre gäräbare kwe? Ni yekwe nünandre  aune sribidre kärekäre tabernáculo Ngöbökwe yete. Tabernáculo yete nitre nämene niken Jehová mike täte. ¿Jefté käkwe rü ye ganainbare? Jän. Aune nikaninta ja gwirete ye ngwane, ¿nire jatani käne ngäbiti raba ruin mäi?...

¡Ngängän kwe ara! Niara ye ngängän itibe kwe, aune Jefté rabadre juen nüne mada tabernáculo yete. Ye käkwe Jefté mikani ulire krubäte, akwa niarakwe kukwe käbämikani Jehovai, ¿ye törö mäi? Yebätä ngängän niebare ie: “Tata mäkwe kukwe käbämikani Jehovai aune ye erere mäkwe mika nemen bare”.

Ja ketamuko Jefté ngängän yekwe ye nämene niken kä kwatire kwatire känti

Kenanbe niara namani ulire arato. ¿Ñobätä? Ñobätä ñan aune niara rikadre nüne tabernáculo yete angwane, ñaka raba ja mäkete aune monso ngübare. Akwa rünkwe kukwe käbämikani ye niara tö namani mikai nemen bare. Aune niara käi rabadre juto Jehovabätä ie tö namani arato. Ye namani bäri ütiäte kräke, ja mäkädrete kwe aune monso ngübadre kwe ye kräke. Yebätä nikani tabernáculo aune nünanbare kärekäre kwe yete.

¿Jehová aune Jefté yebätä niara käi namani juto raba ruin mäi?... ¡Jän ye erere! Mä raba ja ngwen Jefté ngängän ye erere arato. Mäkwe Jehová kukwei mikai täte aune mäkwe taredi krubäte angwane, mä käi rabai juto krubäte niarabätä. Tata aune mama yebätä mä käi rabai juto krubäte arato.

ANI ÑÄKE BIBLIABÄTÄ:

  • Deuteronomio 6:4-6

  • Jueces 11:30-40

  • 1 Corintios 7:32-34