Känändre nekänti

Indice yete känändre

 KUKWE JA TÖTIKARA 46

Niaratre töi gani ngutuä Carmelo yekänti

Niaratre töi gani ngutuä Carmelo yekänti

Gobran juta keta jätä nitre Israelkwe yete rei töi käme namani kwati krubäte, akwa Acab ja ngwani bäri käme. Meri töi käme nämene ngöbö ngwarbe Baal mike täte yebe niara ja mäkäninte. Meri ye kädeka nämene Jezabel. Acab aune Jezabel käkwe nitre kwati krubäte töi mikani Baal mike täte. Arato nitre Jehová kukwei niekä ye kwati krubäte murie ketani kwetre. ¿Jehovakwe dre nuainbare? Ni niara kukwei niekä Elías ye juani kwe kukwe mike gare Acab ie.

Ñü ñaka räkäin tibien kä Israel nete Elías niebare Acab ie, ñobätä ñan aune niara rei käme krubäte. Kä komäbiti bäri yete, nüra ngwä ñaka ririabare jire aune nitre namani mrö nike krubäte. Ye bitikäre, Jehovakwe Elías juani bliteta bobukäreta Acab ben. Rei Acab niebare Elías ie: ‘Mätä jerekäbe kukwe kri mike nemen bare. Kukwe jökrä tä nemen bare mä köböite’. Elías niebare ie: ‘Ñü ñaka räkäin tibien yebätä ti ñaka ngite. Ñü ñaka näkäin tibien ñobätä ñan aune mätä Baal mike täte. Nitre mada mada aune nitre Baal kukwei niekä ye ükökrö ngutuä Carmelo yekänti. Dre rabai bare ye ani mike ñärärä’.

Nitre ye ja ükaninkrö ngutuäbiti aune Elías niebare ietre: ‘Munkwe kukwe meden diain nuaindre jai. Jehová ye Ngöbö metre angwane, mun rika jiebiti, akwa Baal ye ngöbö metre angwane, mun rika jiebiti. Dre rabai bare ye ani mike ñärärä. Nitre 450 Baal kukwei niekä ye käkwe jondron mikadre kukwadre aune rabadre ngöbö kwetre ye kärere. Ti arato bike jondron mike kukwadre aune tikwe Jehová kärädi. Ngöbö meden käkwe ñukwä kä kwinbätä juandi ye Ngöbö metre’. Ye nakaninbiti nitre ie.

Angwane, nitre Baal kukwei niekä yekwe jondron mikani kukwadre. Namanintre ngöbö kwetre ye kärere dekä nememe dere: ‘¡Baal, nun kukwe nuin!’. Akwa Baal ñaka namani niaratre kukwei kain ngäbiti yebätä Elías namani niaratre kötaire aune kukwe ne niebare kwe ietre: ‘Mun raba kärere ja dibiti. Niara tä kübiani raba ruin tie aune gadrekrö’. Bäsi kä jatanina deu aune nitre Baal kukwei niekä ye namani jankunu kärere, akwa ñaka niaratre kukwei kani ngäbiti.

Elías jondron ükaninte kä jondron kukwakäre yebiti aune ñö kekabare ere kwebiti. Ye bitikäre orabare kwe: ‘Jehová mä abokän Ngöbö metre ye rabadre gare nitre ie’. Ye bätäräbe, Jehovakwe ñukwä kä kwinbätä mikani näkäin tibien jondron mikani kukwadre ye nukwani. Nitre ye niebare ja dibiti: ‘¡Jehová  ye Ngöbö erametre!’. Angwane Elías niebare: ‘Munkwe ñaka nitre Baal kukwei niekä ye tuanmetre ngitie jire iti’. Köbö yete nitre Baal kukwei niekä 450 ye murie ketani.

Ye bitikäre muta chi namani mrenbiti ta, aune Elías niebare Acab ie: ‘Murie dite krubäte ñübe minimini kite. Karo mäkwe mike juto aune nänta ja gwirete’. Kä namani iko kwinta, murie mata nükani aune ñü namani näkäin jobe krubäte tibien. Mrä mada ñü namani näkäinta tibien. Jötrö ngwarbe Acab nikani karo kwe yete mento. Jehovakwe Elías dimikani ne kwe niadre bäri jötrö kwe karo ye kräke. Akwa, ¿kukwe nämene Elías kisete ye nikani jökrä ta? Ani mike gare jai.

“Ne kwe rabadre gare nitre jökrä ie mä kä Jehová, mä aibe Kri kä tibien ye jökräbiti ta” (Salmo 83:18).