Känändre nekänti

Indice yete känändre

 KUKWE JA TÖTIKARA 90

Jesús murie ketani kä Gólgota yekänti

Jesús murie ketani kä Gólgota yekänti

Nitre sacerdote däkientre ye nikani Jesús ngwena ju gobrankäre yete. Aune kä yekänti Pilato ngwantaribare ietre: ‘¿Ño köböire munta ni ne kite ngise?’. Niaratre käkwe niebare: ‘¡Niara abokän rei tä niere!’. Pilato ngwantaribare Jesús ie: ‘¿Se erere mä rei nitre judío yekwe?’. Jesús niebare ie: ‘Gobran tikwe ñaka kä nebätä’.

Ye bitikäre, Pilato, Jesús juani Herodes känti, ne kwe Jesús ye ngite o ñakare ye Herodes mikadre gare, Herodes nämene gobrane kä Galilea yete. Jesús ñaka kukwe blo nuainne namani tuin Herodes ie aune Jesús juaninta kwe Pilato känti. Angwane Pilato niebare nitre ie: ‘Ni ne ñaka ja mike ngite tuin Herodes ie aune tie arato. Tibike niara tuenmetre kwäre’. Akwa nitre namani ñäke ja dibiti: ‘¡Niara murie kete! ¡Niara murie kete!’. Nitre rükä käkwe Jesús kwata metani köbiti, käli kitanibätä aune nuainbare tare krubäte. Korona kri tukwäre mikani niara dokwäbiti aune namanintre niara kötaire kukwe ne niere: ‘¡Köbö kwin dekä, rei nitre judiokwe!’. Pilato niebare bobukäreta nitre ie: ‘Ni ne ñaka kukwe blo nuainne tuin tie’. Akwa niaratre ñäkäbare ja dibiti: ‘¡Niara mete kribätä!’. Aisete Pilato Jesús biani ne kwe murie ketadre.

Angwane niaratre nikani Jesús ngwena kä kädeka nämene Gólgota yekänti. Niara metani kribätä aune tuanimetre yete. Jesús orabare Jehovai: ‘Ti Rün, mäkwe ngite juan ta niaratrebiti ñobätä ñan aune tätre dre nuainne ye ñaka gare ietre’. Nitre namani Jesús kötaire aune namanintre kukwe ne niere ie: ‘¡Mä Ngöbö Monsoi angwane, näin timo aune ja mike kwäre!’.

Ni iti ni mada murie ketaka nämene metani kribätä Jesús ken käkwe niebare ie: ‘Mä raba Gobrane ye ngwane mäkwe ti ngwan törö jai’. Jesukwe käbämikani ie: ‘Mä täi tibe Kä Bä Nuäre yete’. Derekri, kä namani drüne ora krämä. Nitre ja tötikaka ye ruäre namani yete nünaninkä Jesús nämene metani kribätä ye ken, María, Jesús meye ye nämene yete arato. Juan rabadre María ngübare meye kwe ye kwrere Jesús ribebare ie.

Mrä mada Jesús niebare: ‘¡Nibira bare!’. Ja dokwä mikani kuintubu kwe aune mrä murie jäkäbare kwe. Angwane, dobo kri krubäte nakaninkä. Kä Deme aune Kä Bäri Deme templote ye nämene ñäkänintubu cortina  kribiti ye nötaninte ötareta. Angwane, ni nitre rükä jie ngwanka ye iti käkwe niebare: ‘Ni ne abokän Ngöbö Monsoi erametre’.

“Ngöbökwe ja kukwei biani kabre kukwe nuenkäre ni kräke abko mikani bare täte jökrä Kristo köböire kwe” (2 Corintios 1:20).