Känändre nekänti

Indice yete känändre

 KUKWE JA TÖTIKARA 85

Köbö sábado te Jesús ni iti mikaninta räre

Köbö sábado te Jesús ni iti mikaninta räre

Nitre fariseo brukwä nämene Jesús kräke aune niaratre nämene kukwe ngwarbe känene Jesús kakäre ngite. Niaratre nämene niere Jesús ñaka nitre bren mikadreta räre köbö sábado te, ñobätä ñan aune köbö ye abokän nämene ja dukakäre. Bati, köbö sábado te ni iti okwäte kä nämene drüne niara nämene jondron kärere ji ngrabare Jesukwe tuani. Aisete niebare kwe nitre ja tötikaka kwe ie: ‘Ngöbö die ye bike ni ne dimike ye mike ñärärä’. Jesús dobro mritani käli kwe yebe ne kwe rabadre ngätäre. Ye bitikäre, jüaninte kwe ni ye okwäbätä aune niebare kwe ie: ‘Nän aune mäkwe ja okwä bätäte ñö tä kä Siloam yete’. Ni ye käkwe ye erere nuainbare aune kä jutuabare kena ie.

Nitre töi namani ñan krütare aune niebare kwetre: ‘Ni ne nämene nebe täkänintubu jondron kärere, ¿ñan ererea? ¿O ni mada niara bä kwrere?’. Ni ye käkwe niebare: ‘Ti därebare ngwane kä nämene drüne ti okwäte’. Nitre ngwantaribare ie: ‘¿Aune ñokänti kä tuin mäi?’. Dre namani barebätä ye niarakwe mikani gare. Angwane, niara jänikani ne kwe blitadre kwe nitre fariseo ben.

Ni yekwe kukwe ye mikani gare nitre fariseo ie: ‘Jesús dobro jüanteba ti okwäte aune tikwe bätädrete jai nieba kwe tie. Ye erere tikwe nuainba aune kä rababa tuinta tie’. Nitre fariseo namani niere: ‘Jesús tä ni bren miketa räre sabadote angwane niara die ñaka kite Ngöbökri’. Akwa nitre mada abokän namani niere: ‘Niara die ñaka kite Ngöbökri angwane, ¿se ñokänti tä nitre bren miketa räre?’.

 Nitre fariseo käkwe ni ye rün aune meye käräbare aune niaratre ngwantaribare ietre: ‘¿Ño köböire kä niena tuin monso munkwe ie?’. Ni ye rün aune meye yebätä kä jürä namani, ñobätä ñan aune nitre fariseo niebare nire käkwe tödekai Jesús ie ye niaratre käkwe juaintari sinagoga bäre mento. Yebätä niebare kwetre: ‘Gare ñakare nunye. Mun raba ngwentari ie’. Nitre fariseo kukwe mada ngwantaribare ni yei aune ni ye käkwe niebare: ‘Dre namani bare ye ti ninina jökrä munye. ¿Ñobätä munta kukwe ngwentari jankunu tie?’. Nitre fariseo namani rubun kräke aune juanintari kwetre mento kä yekänti.

Ye bitikäre, Jesús janamene ni yekänti aune ngwantaribare kwe ie: ‘¿Mätä tödeke Mesías ie?’. Ni ye käkwe niebare: ‘Mesías ye nire rabadre gare tie akräke tikwe tödekadre ie’. Jesús niebare ie: ‘Ti ara Mesías’. Erametre Jesús ja töi mikani kwin ni ye kräke, ¿ñan ererea? Mikaninta räre kwe aune dimikani kwe tödeke.

“Ngöbö Kukwei gare ñakare munye amne Ngöbö di kri gare ñakare munye arato, aisete munta töbike ngwarbe blo kore” (Mateo 22:29).