Känändre nekänti

Indice yete känändre

 KUKWE JA TÖTIKARA 83

Jesukwe nitre kwati krubäte bukani

Jesukwe nitre kwati krubäte bukani

Pascua kä 32 ye nuain jämi känenkri, nitre apóstol nämenentre kukwe driere nükaninta. Niaratre nämene nainte krubäte, aisete Jesús nikani ngwena ru mrente yebiti nemen kä Betsaida yekänti ne kwe ja dükadre kwetre. Akwa, niaratre jatanina nemen mren kräbätä ye ngwane, nitre kwati krubäte käkwe nänbare niaratre jiebiti nememe yete. Niara tö namani ja tuai kaibe yete nitre ja tötikaka kwe yebe, akwa yebiti ta nitre ye kani ngäbiti kwe töi jämebiti. Nitre bren mikaninta räre kwe aune kukwe keta kabre driebare kwe ietre. Blitabare kwe Gobran Ngöbökwe yebätä niaratre ben nememe dere. Kä jatani de ye ngwane, nitre apóstol niebare ie: ‘Nitre ie mröta raba ruin nunye. Nitre ye rikadreta niere ie ne kwe rabadre mrö känene kwetadre jai’.

Akwa Jesukwe niebare: ‘Niaratre ñaka rikadreta. Dreta munkwe nete ye mun raba bien kwetadre ietre’. Nitre apóstol ngwantaribare ie: ‘¿Nun rikadre ban kökö niaratre kräke ie mä tönibi ya?’. Apóstol Felipe käkwe niebare: ‘Ngwian tädre krubäte nikwe, akwa ni ñaka raba ban kökö nitre kwati krubäte ye jökrä kräke’.

Jesús ngwantaribare ietre: ‘¿Mröta nuäi nikwe?’. Andrés niebare ie: ‘Ban tä krärike aune gwa tä krobu nikwe. Akwa ye ñaka raba nemen täte nitre kwati krubäte yebiti’. Jesús niebare: ‘Ban aune gwa ye ngwen tie’. Ye bitikäre, ribebare kwe nitre ie niaratre rabadre nemen 50 aune 100 ketare ketare täkäni tibien. Ban aune gwa diani kwe, nikrabare kwe kä kwinbätä biti orabare kwe. Ye bitikäre, mrö ye biani kwe jene jene nitre apóstol yei ne kwe niaratre rabadre döräire nitre kwati krubäte ye  jökräbiti. Nitre brare, merire aune monsotre kia 5,000 nämene yete ye käkwe mröbare nememe trine. Mrä mada, mrö namaninte ye nitre apóstol käkwe ükaninkrö ne kwe ñaka rikadre ngwarbe. ¡Mrö ye ükaninkrö kwetre kutuä 12 te! Erametre jondron ñan tuabare namani bare, ¿ñan ererea?

Nitre jökrä töi namani ñan krütare yebätä tö namanintre Jesús tuai nemen reire ja kräke. Jesús ie nämene gare niara rabadre reire köbö ye ngwane ie Jehová ñaka tö namani. Yebätä nitre ye juaninta kwe aune niebare kwe nitre apóstol kwe yei niaratre rikadre mar Galilea ye kwäräkri. Niaratre nikani rute aune Jesús nikani kaibe kä tokwäte. ¿Ñobätä? Ñobätä ñan aune tö namani kä diainkä jai orakäre Rün kwe ie. Jondron nämene nuaindre krubäte Jesús ie, akwa käre nämene kä denkä jai orakäre.

“Akwa mrö tä niken ngwarbe jötrö [...], ye kräke munkwe ñan sribi, akwa mrö käkwe ni mikadre nüne kärekäre Ngöböbe, ye kräke munkwe sribi. [...], ye abko ti Ni Kä Nebtä Ngobo aibe käkwe biandre munye” (Juan 6:27).