Känändre nekänti

Indice yete känändre

 KUKWE JA TÖTIKARA 60

Gobran rabai kärekäre

Gobran rabai kärekäre

Bati deu, rei Nabucodonosor ñaka köböbare erere köböbare kwe. Köböbare kwe ye namani mike töbike krubäte yebätä ñaka namani kübien. Nitre ja di käräkä choka ie ye käräbare kwe aune niebare kwe ietre: ‘Tikwe köböni ye mun raba mike gare tie’. Niaratre käkwe niebare ie: ‘Rei, mä köböni ño ye niere nunye’. Akwa Nabucodonosor niebare ietre: ‘¡Ñakare! Tikwe köböni ño ye mun raba mike gare tie. Munkwe ñaka mikai gare tie angwane tikwe mun murie ketai’. Nitre ye käkwe niebare bobukäreta ie: ‘Akwa mäkwe köböni ño ye niere nunye aune ye bitikäre mä köböni ye dre gärätä ye nunkwe mikai gare mäi’. Nabucodonosor niebare ietre: ‘Mun tönibi ti ngökai. ¡Tikwe dre turi köböre ye niere tie!’. Niaratre käkwe niebare ie: ‘Mätä kukwe ribere ye ni ñaka jire iti raba mike gare. Kukwe ye ñaka nuäre’.

Nabucodonosor namani rubun krubäte yebätä nitre jökrä töbätä juta yete ye murie keta namabare kwe. Ye abokän Daniel, Sadrac, Mesac aune Abednego ye murie ketadre arato. Akwa rei rabadre Daniel ngübare ribebare kwe ie. Angwane niara aune ja ketamuko nimä kwe yekwe orabare Jehovai ne kwe niaratre dimikadre kwe. ¿Jehová dre nuainbare?

Nabucodonosor köböbare ño ye Jehová mikani tuare Daniel ie aune ye dre gärä nämene ye mikani gare kwe ie. Jetebe se kwrere, Daniel janamene blite ni sribikä rei kräke yebe aune niebare kwe ie: ‘Mäkwe ñaka nitre töbätä ye murie keta jire. Rei köböbare ño ye ti raba mike gare ie’. Ni sribikä ye nikani Daniel ngwena Nabucodonosor ngwärekri. Daniel niebare rei ie: ‘Dre rabai bare ja känenkäre ye Ngöbökwe mikani tuare mäi. Mäkwe köböbare krörö: ni nire üai kri sribebare dokwä orore, mäträrä aune kise ngwiane, bule bätä ulie cobrere, ngüre hierrore, ngoto mritani hierro aune dobro yebe. Ye bitikäre, jä ngutuäte betaninkä aune matani ni nire üai kri sribebare ye ngotote. Ni nire üai kri sribebare ye ngidianinte aune nikwitani kä mününe, murie mata nükani yekwe kä münü ye juaninkä. Jä ye nikwitani ngutuä kri krubäte ye kwrere abokän namani kä jökräbiti tibien’.

 Ye bitikäre, Daniel niebare: ‘Mäkwe köböbare ye abokän ne gärätä: gobran mäkwe ye meden dokwä orore. Mäträrä aune kise ngwiane ye abokän gobran mada rabai mä bitikäre. Ye bitikäre gobran mada rabai ye abokän bule bätä ulie cobre kwrere ye rabai gobrane kä jökräbiti tibien. Gobran mada ye abokän rabai bäri dite krubäte hierro ye kwrere. Mrä gobran rabai ñäkäninbiti, kwärä rabai dite aune kwärä abokän rabai di ñakare dobro ye kwrere. Jä rikwitai ngutuä kri krubäte kwrere ye abokän Gobran Ngöbökwe, ye käkwe gobrantre mada ye jökrä gaite aune gobran ye aibe rabai kärekäre’.

Nabucodonosor namani ngukodokwäre ja ngwäre mikani kuintubu kwe, Daniel ngwärekri aune niebare kwe: ‘Ngöbö mäkwe käkwe köbö ye mikani gare mäi. Ngöbö mada ñaka tärä niara erere’. Nabucodonosor käkwe Daniel murie ketadre näre akwa ñaka nuainbare kwe ñakare aune mikani kwe nitre jökrä töbätä ye jie ngwanka aune mikani kwe gobrane kä keteiti Babilonia yete. ¿Daniel orabare ye Jehovakwe kukwei kani ngäbiti ño ye jutuani mäi?

“Aune niaratre ükaninkrö kä kädekata Armagedón hebreore yekänti” (Revelación 16:16TNM).