Känändre nekänti

Indice yete känändre

 KUKWE 3

Rubun ja dokwäre: “Kukwe tärä ja rüere kwärikwäri” nikwe

Rubun ja dokwäre: “Kukwe tärä ja rüere kwärikwäri” nikwe

“Eteba konkrekasionte niebare tikwe ngwian goibare kän. Ja mräkätre ruäre ie kukwe ye rababa gare angwane ruäre rababa nekete tikri, mada abokän rababa ja mike niarakri. Kä rikaba ta angwane eteba kukwe niebare ti rüere yei rababa gare, ti ñan ngwian goibare kän. Tikwe ngite juandre tabiti ribeba kwe tie, akwa ti nämä rubun ja dokwäre, yebätä ti ñaka ngite juain jire tabiti rababa ruin tie.” (Linda)

¿LINDA ye kwrere ja ruin mäi? Kukwe nuainbarebätä ye namani tare krubäte ie. Nitre kristiano ruäre tä kukwe nuainne ja mräkätrebätä ye köböite ja mräkätre tä kite kukwe ja üaire tuenmetre ye tare krubäte. ¿Kukwe ye erere namani bare mäbätä?

“Ngöböta ni tarere” ye ni kä nebätä ñaka raba ketebätä

Ja mräkä tä kukwe nuainne nibätä angwane, ñaka tä nemen nuäre ni kräke ngite juandre ta biti, ñobätä ñan aune niara kristiano aisete rabadre bämike tä ni tarere ye nita ngübarebätä (Juan 13:34, 35). Yebätä ja mräkä konkrekasionte kukwe ñaka kwin nuaindre nibätä angwane ja ñaka tä nemen ruin kwin nie, aune nita nemen rubun ja dokwäre (Salmo 55:12).

Biblia tä niere, ruäre ngwane ni kristiano tä kukwe nuainne abokänbätä ja mräkä mada raba nemen rubun kräke (Colosenses 3:13). Akwa, kukwe ye kwrere rakadrekä nibätä angwane ñaka raba nemen nuäre ükadrete. ¿Dre käkwe ni dimikai? Nikwe töbikadretari kukwe nieta Bibliabätä ja jie ngwankäre yebätä. Ani mike gare ketamä jai.

Dre dre tä nakainkä ye tuin Ni Rün kä kwinbiti ie. Kukwe meden nuainta ye tuin jökrä Jehovai, kukwe käme nuainta nibätä köböite nita ja tare nike ye tuin ie arato (Hebreos 4:13). Ne madakäre, nita ja tare nike ye tä mate tare niarabätä (Isaías 63:9). Kukwe kri, jondron mada o ni mada niara mikaka täte ye niara ñaka tuenmetre ni denkä mento niarabätä, ñakare aune tä ‘ni tarere jankunu’ (Romanos 8:35, 38, 39). Jehová erere, ni ñaka rabadre ni mada o kukwe ruäre tuenmetre ja töi mike niara tuanmetrebätä, ñakare aune nikwe niara taredre jankunu.

Ngite juanta ta ye ñan tä mike gare kukwe blo ka ngäbitita. Ni mada kukwe ñaka kwin nuaindre nibätä yebiti nikwe ngite juandre ta, akwa ni ye ñaka kukwe kri nuainbare, o nita kukwe mada känene o kukwe mike ni yebiti ye ñan aibätä nita nuainne. Ja mikata ngite nierare ye Jehová ñaka kain ngäbiti jire chi, akwa kukweta kwen ie ngite juankäre ta angwane tä nuainne (Salmo 103:12, 13; Habacuc 1:13). Jehová ñaka nemen “rubun käre”, aune nikwe ngite juandre ta ni madabiti niara erere ie tö (Salmo 103:9; Mateo 6:14).

Ni ñaka rabadre rubun jankunu ye kwin ni kräke. ¿Ñobätä? Töbike kukwe nebätä: Mäkwe jä däbäte diandre kwati kisete aune mäkwe kadrekä kwekebe kwin. Kenanbe ñaka mä mikai nainte. Akwa, ¿mäkwe nuadi raire angwane ja rabai ruin ño mäi? Mäkwe jä ye kaikä minuto braibe te, ora krati o bäri ye ngwane mä küde jatai nainte. Jä ye däbä täi ja erebe, akwa mäkwe ketaite raire kwin angwane jatai bäri doboko mä kisete rabai ruin mäi. Mätä nemen rubun jankunu ja dokwäre angwane ye erere tä nemen bare, kukwe chi nuaindre nibätä aune tädre kwekebe ni töite  angwane bäri nita kukwe mike ja kisete. Ye medenbätä, Jehová tä niere nie ni ñaka rabadre rubun jankunu, ñobätä ñan aune gare ie ye kwin ni kräke (Proverbios 11:17).

Ni ñaka rabadre rubun jankunu ye kwin ni kräke

“Jehová nämä blite ngwärere tibe rababa ruin tie”

Ni kukwebätä kukwe nuainbare Linda yebätä, ¿akwa dre käkwe dimikani ñaka nemen rubun jankunu ja dokwäre? Kukwe keta kabrebätä ni rabadre ngite juen ta ni madabiti nieta Bibliabätä, yebätä töbikataribare kwe (Salmo 130:3, 4). Nita ngite juen ta ni madabiti angwane Jehovata ngite juen ta nibiti arato, ye ngwaninta törö kwe jai ye matani kwin niarabätä (Efesios 4:32–5:2). Texto keta kabre ye namani tuin kwin ie ye käkwe töi mikani kukwe ne niere: “Jehová nämä blite ngwärere tibe rababa ruin tie”.

Kä nikani ta angwane Linda ñaka namanina rubun ja dokwäre. Ni iti kukwe nuainbarebätä yebiti ngite juani bökän ta kwe aune nengwane tätre ja kete kwin jabe. Linda tä Jehová mike täte. Ye erere arato Jehová tö mä tuai ja mike täte kärekäre.