Känändre nekänti

Känändre página mada yekänti

Indice yete känändre

Testiko Jehovakwe

ngäbere

Tärä tikwe tä blite Bibliabätä

Kukwe kira 110: Timoteo Pablo dimikaka

Kukwe kira 110: Timoteo Pablo dimikaka

MONSO bati tuin nete mäi Pablo ben ye Timoteo. Timoteo nämene nüne Listra mräkätre ben. Meye kä Eunice aune mölöi kwe Loida.

Nete bämäkäre Pablo nikaninta Listra. Kä nikani bäsi kwati ta aune Pablo bätä Bernabé namani kena yete, kukwe driere. Biti Pablo nikaninta bobukäre yete ja ketamuko kwe Silas yebe.

Pablo bätä Timoteo

¿Pablo käkwe dre niebare Timoteo ie gare mäi? ‘¿Mä törba näin tibe bätä Silas ben?’ ngwanintari kwe ie. ‘Mä raba nun dimike kukwe driere nitre kä mente känti ye ie.’

‘Jän, ti törba näin’, Timoteo niebare. Yebätä, kä nikani braibe ta angwane Timoteo käkwe mräkätre tuanimetre aune nikani Pablo bätä Silas ben. Akwa nikani medente ni jämi mike gare jai ye känenkri, dre nämene nemen bare Pablo yebätä ye ani mike gare jai. Pablo nikani Damasco aune Jesukwe ja mikani tuare ji ngrabare ie, ye bitikäre kä nikani 17 ta.

¡Ngwen törö jai, Pablo nikani Damasco kukwe tare nuainkäre nitre ja tötikaka Jesukwe yebätä, akwa biti niara ja mikani ja tötikaka Jesukwe! Ye bitikäre, nitre Pablo rüere tö namani kämikai akwa nitre ja tötikaka käkwe dimikani ngitie. Kutia kri te, ribianinkä kibätä timon kwetre juta ye bäre.

Biti, Pablo nikani Antioquía kukwe driekäre. Kä nekänti kena nitre ja tötikaka ye kädekani kristiano. Pablo bätä Bernabé nämene Antioquía angwane, juani mada kä keta kabre mente känti kukwe driekäre. Niaratre nikani juta Listra yekänti, yete Timoteo nämene nüne.

Biti, kä nikani bäsi kwati ta aune, Pablo nikaninta bobukäre Listra. Timoteo nikani Pablo bätä Silas ben ye ngwane, ¿nikanintre medente gare mäi? Mapa ye mike ñärärä, aune ani mike gare jai.

Käne, nikani Iconio, ye nämene känime, biti juta ketebukäre Antioquía känti nikani. Ye bitikäre nikanintre Troas, biti nikani Filipos, Tesalónica bätä Berea. ¿Atenas ye tuin mäi mapa yebätä? Pablo kukwe driebare yete. Biti, kä kwati biti ötare te kukwe driebare kwetre Corinto. Mrä mada, kä braibe te namanintre Éfeso. Biti, nikaninta ja jiebiti rute Cesarea, aune nikani Antioquía, känti Pablo nämene nünentubu.

Aisete Timoteo käkwe nänbare mente krubäte Pablo ben dimikakäre “kukwe Ngöbökwe” driere aune konkrekasion kabre kömikani kwetre. Mä rabai kri aune, ¿mä sribidi täte metre Ngöbökrä Timoteo erere?

Hechos 9:19-30; 11:19-26; kapitulo 13-17; 18:1-22.

Mapa

1. Roma; 2. Malta; 3. Berea; 4. Tesalónica; 5. Corinto; 6. Filipos; 7. Atenas; 8. Creta; 9. Troas; 10. Éfeso; 11. Mileto; 12. Colosas; 13. Antioquía; 14. Iconio; 15. Listra; 16. Chipre; 17. Antioquía; 18. Cesarea; 19. Jope; 20. Damasco; 21. Jerusalén; 22. El Mar Grande (Mediterráneo)



kukwe ngwantarita

  • ¿Monso bati bämikani ye nire, nüne medente, aune meye bätä mölöi kä ño?
  • ¿Pablo käkwe Timoteo nübaibare kukwe driere nitre kä mente känti ie niarabe bätä Silas ben ye ngwane, dre niebare kwe?
  • ¿Medente nitre nänkä Jesube ye kädekani kena kristiano?
  • Pablo, Silas bätä Timoteo nämene Listra biti nikani mento, ye bitikäre, ¿juta meden meden tuaninbiti kwetre?
  • ¿Timoteo käkwe Pablo dimikani ño, aune monsotre bati käkwe kukwe meden ngwandretari jai kä nengwane?

kukwe mada ngwantarita

  • Ñäkädre Hechos 9:19-30 yebätä.

    Pablo nämene kukwe driere yebätä nitre ja mikani rüere, ¿ye ngwane ja ngwani ño töbätä kwe? (Hech. 9:22-25, 29, 30; Mat. 10:16.)

  • Ñäkädre Hechos 11:19-26 yebätä.

    Kukwe drieta ye Jehová tä jie ngwen üai kwe yebiti, ¿kukwe kädrieta Hechos 11:19-21, 26 känti ye tä mike gare ño?

  • Ñäkädre Hechos 13:13-16, 42-52 yebätä.

    Nitre ja tötikaka Jesukwe ye rüe namani akwa ñaka ja di ngwani nekä kwetre, ¿Hechos 13:51, 52 ye tä mike gare ño? (Mat. 10:14; Hech. 18:6; 1 Ped. 4:14.)

  • Ñäkädre Hechos 14:1-6, 19-28 yebätä.

    ¿Kukwe “mikani Jehová kisete” nieta ye tä ni dimike ño ne kwe nikwe ñaka töbikadre krubäte nitre mrä kukwebätä dimikata ye ngwane? (Hech. 14:21-23; 20:32; Juan 6:44.)

  • Ñäkädre Hechos 16:1-5 yebätä.

    Nikwe “jondron jökrä nuaindre kukwe Ngöbökwe ye köböire” ye ütiäte krubäte, ¿jondron ni brarekwe kwata tikaka nämene erere Timoteo ja töimikani nuainne ye tä mike gare ño? (Hech. 16:3; 1 Cor. 9:23; 1 Tes. 2:8.)

  • Ñäkädre Hechos 18:1-11, 18-2 2. yebätä

    ¿Kukwe drieta ye Jesús tä jie ngwen akwle ye Hechos 18:9, 10 tä mike gare ño, aune ye tä ni töimike ño jäme kä nengwane? (Mat. 28:20.)