Nitre ja tötikaka mukebätä

¿NITRE tä kisekite muke trä ngitiekä yebätä tuin mäi? Niaratre nikani mento Jerusalén ye ngwane, muke jutuabare ietre. Nitre ye nünanka Kädrikri jatani aune niaratre ye ja tötikaka mukebätä. Muke mrä ye näin ngwena ni ütiäte känti ruin ietre.

Nitre ye nükani Jerusalén angwane, ngwanintari kwetre: ‘¿Monso rabai reire nitre judío kräke ye tä medente?’ Nitre Israel ye arabe kädekata “Judío” arato. ‘Muke kwe ye nunkwe turi Kädrikri aune nunki mike täte,’ niebare kwetre.

Herodes rei Jerusalén ie kukwe ye namani gare angwane, namani töbike kri. Niara ñan tö namani ni mada tuai reire ja täte. Nitre sacerdote dänkientre ye ie ngwanintari kwe: ‘¿Rei käbämikani ye däredi medente?’ Niaratre niebare: ‘Kä Belén känti nieta Bibliakwe.’

Yebätä Herodes niebare nitre Kädrikri ie: ‘Monso chi ye känene. Kwan muen aune mun mika gare tie. Ti tö näin mike täte arato.’ ¡Akwa metrere Herodes tönamani monso chi ye kämikai!

Muke ye nikani nitre käne nemen Belén, aune monso chi nämene yekänti namani nünaninkä. Nitre ye nikani gwä angwane María bätä monso chi Jesús ye kwani ietre. Niaratre käkwe jondron biani Jesús ie. Akwa ye bitikäre köböre Jehová niebare ietre ñaka rikadre Herodes känti. Yebätä niaratre nikani ji madabiti juta kwetre ye känti.

Nitre ye nikani namani gare Herodes ie angwane, namani rubun krubäte. Monsotre biti kä nämene kubu o bäri chi ye jökrä kämikadre niebare kwe. Akwa Jehová kukwe ye niebare köböre José ie, aune José nikani mräkätre yebe Egipto. Ye bitikäre Herodes ye krütani namani gare José ie angwane, nikani María bätä Jesús ngwenanta Nazaret. Nazaret yekänti Jesús ririabare.

¿Nirekwe muke mrä ye mikani trä ngitiekä gare mäi? Ngwen törö jai, nitre nikani käne muke ye mike ñärärä Jerusalén. Satana Diablu tö namani Ngöbö Monsoi ye kämikai, aune Herodes gobranka Jerusalén tö rabai kämike ye namani gare ie arato. Yebätä Satana ara käkwe muke ye mikani trä ngitiekä.

Mateo 2:1-23; Miqueas 5:2.



kukwe ngwantarita

  • ¿Nitre bämikani ye nire, aune ñobätä iti tä kisekite muke trä ngitiekä yebätä?
  • ¿Ñobätä rei Herodes namani töbike kri, aune dre nuainbare kwe?
  • ¿Muke trä ngitiekä ye nikani nitre ngwena kä meden känti, akwa ñobätä niaratre nikani ja käite ji mada yebiti?
  • ¿Herodes käkwe dre niebare, aune ñobätä?
  • ¿Jehovakwe dre niebare José ie?
  • ¿Nirekwe muke mrä ye mikani trä ngitiekä, aune ñobätä?

kukwe mada ngwantarita

  • Ñäkädre Mateo 2:1-23 yebätä.

    ¿Kä nämene nuäi Jesús yebiti, bätä nitre ja tötikaka mukebätä nükani tuinbiti ye ngwane nämene nüne medente? (Mat. 2:1, 11, 16.)