NETE Jesús tä ngutuä Olibo känti. Nitre nibokä tä niarabe ye nitre apóstol kwe. Ye nitre ja etebare, Andrés bätä Pedro, aune Santiago bätä Juan ja etebare arato. Ju kri tuin menteni ye templo Ngöbökwe Jerusalén.

Jesús nikani mula yebiti Jerusalén ye bitikäre kä nikani köböbu ta. Köbö marte, ye känenkri Jesús nämene templo yete. Kä yekänti nitre sacerdote tönamani kämikai. Akwa kä jürä namanibätä, ñobätä ñan aune Jesús ye käi namani juto nitre yebätä.

Jesús bätä nitre apóstol kwe

Nitre ji ngwanka kukwebätä ye Jesús kädekani ‘¡kulebra aune kulebra ngäbä!’ Aune nitre yekwe kukwe keta kabre käme nuainbare yebätä Ngöbökwe mikai ja ngie nuin niebare kwe ietre. Biti, Jesús nikani ngutuä Olibo yebiti, aune nitre apóstol nibokä ye namani kukwe ngwentari ie. ¿Dre ngwanintari kwetre gare mäi?

Kukwe meden rabai bare ja känenkäre ye ngwanintari kwetre. Kukwe käme nuainta Kä tibienbätä ye jökrä Jesús mikai krüte ye nämene gare ietre. Akwa ñongwane rabai bare ye tönamani mikai gare jai. ¿Ñongwane Jesús rükaita bobukäre gobrankäre Rei kwrere?

Jesús rükaita bobukäre ye ngwane nitre Kä tibienbätä nänkä niara jiebiti ye käkwe ñaka tuadi ye gare Jesús ie. Niara tädi kä kwinbiti, aune yete niaratre käkwe ñaka tuadi. Yebätä, Jesús rabai gobrane kä kwinbiti ye ngwane kukwe ruäre rabai bare Kä tibienbätä ye Jesús niebare nitre apóstol kwe ie. ¿Kukwe meden ruäre?

Rü krikri, ni kwati rabai bren, mrönika, nitre kwati rabai ja kämike bätä dobo krikri rabai bare Jesús niebare. Arato kukwe kwin gobran Ngöbökwe yebätä ye driedi Kä jökräbiti tibien niebare kwe. ¿Nita kukwe jökrä ne tuin ni näire? ¡Jän! Kä nengwane Jesús tä gobrane kä kwinbiti ye gare metre nie. Gwäune kukwe käme diainkä Kä nebätä kwe.

Mateo 21:46; 23:1-39; 24:1-14; Marcos 13:3-10.



kukwe ngwantarita

  • ¿Nitre tä bämikani ye meden abokän Jesús, aune nitre tä ben ye nire?
  • ¿Nitre sacerdote tönamani dre nuain Jesubätä templo yete, aune Jesús dre niebare ietre?
  • ¿Nitre apóstol dre ngwanintari Jesús ie?
  • ¿Jesús rabai gobrane kä kwinbiti ye ngwane kukwe ruäre rabai bare Kä tibienbätä, ye ñobätä mikani gare kwe nitre apóstol ye ie?
  • ¿Jesús jämi kukwe käme jökrä denkä Kä tibienbätä känenkri dre rabai bare niebare kwe?

kukwe mada ngwantarita

  • Ñäkädre Mateo 23:1-39 yebätä.

    Ni kädekadre ütiäte ye ruäre ñaka käme nieta Bibliakwe, akwa ¿konkrekasionte ni kädekadre bäri ütiäte yebätä dre mikani gare Jesukwe Mateo 23:8-11 yekänti? (Hech. 26:25; Rom. 13:7; 1 Ped. 2:13, 14.)

    ¿Nitre fariseo käkwe dre nuainbare ne kwe nitre ñaka ja mikadre kristiano, aune ye erere nitre ji ngwanka kukwebätä tä dre nuainne nengwane arato? (Mat. 23:13; Luc. 11:52; Juan 9:22; 12:42; 1 Tes. 2:16.)

  • Ñäkädre Mateo 24:1-14 yebätä

    Kä ngwandre nüke jai ye ütiäte krubäte mikata gare ño Mateo 24:13 yekänti?

    ¿Kukwe “kä krüte” nieta Mateo 24:13 ye dre gärätä? (Mat. 16:27; Rom. 14:10-12; 2 Cor. 5:10.)

  • Ñäkädre Marcos 13:3-10 yebätä.

    ¿Kukwe meden nieta Marcos 13:10 kätä mike gare kukwe kwin ye driedre jötrö ngwarbe, aune Jesús kukwe niebare ye käkwe ni töimikadre ño? (Rom. 13:11, 12; 1 Cor. 7:29-31; 2 Tim. 4:2.)