JESÚS kä mikaninkä kwarto yekänti, biti nikani kä Getsemaní känti nitre apóstol kwe yebe. Ye känenkri niaratre nämene nemen bä kabre kä yekänti. Niaratre orasion nuaindre aune ja ngwandre ngwäte Jesús niebare ietre, biti nikani kä kaibe känti aune ngwäre mikani kuintubu kwe biti namani orare.

Biti Jesús nükaninta nitre apostól kwe yekänti. ¿Nämene dre nuainne gare mäi? ¡Nämene kübani! Niaratre ja ngwandre ngwäte Jesús niebare bämä ietre, akwa nämene nüketa känti aune nämene kwen kübani ie. Jesús nükaninta mrä känti aune niebare kwe ietre: ‘¿Kä ne kwrere te munta küben?’ ‘Ti biain ti rüe kisete ye käi nüra.’

Bengwaire nitre kwati kukwe namani. ¡Mike ñärärä! ¡Nitre kite ngitra bätä krimana ben kisete! Aune tädre ñötra ngwen käträ mikara. Namani ja ken ye ngwane nitre kwati ye ngätäite ni iti nikani Jesús kokwäre. Demainbare kwe tuin nete ye erere. ¡Ni ye Judas Iscariote! ¿Ñobätä Jesús demainbare kwe?

Judás käkwe Jesús kitani ngise

Jesús ngwanintari: ‘Judas, ¿mä ti demaini yebiti mätä ti kite ngise?’ Jän, Jesús demainbare yebiti kukwe mikani gare. Ye köböire Jesús nükani gare nitre nämene näin Judas ben ie. Yebätä, nitre Jesús rüe yekwe nänbare ja käne niara kakäre ngite. Akwa Pedro ñaka tönamani Jesús tuainmetre ngwandre. Ngitra jänikani kwe ye dianinte kwe biti ni iti nämene ken ye tikaninkä kwe. Olo kise ruinkri ye tikaninkä kwe ie. Akwa Jesús kisemikani ni ye olobätä aune mikaninta kwin kwe.

Jesús niebare Pedro ie: ‘Ngitra ye miketa ngwäte. ¿Ti ñaka raba ángel kwati kärere ti Rün ie ti mikakäre kwäre raba ruin mäi?’ ¡Raba nuainne! Akwa Jesús ñaka ángel käräbare Ngöböi, ñobätä ñan aune nitre rüe näin ngwena ngite ye käi nükanina namani gare ie. Niarakwe tuanimetre ye nuainne. Biti dre namani bare Jesús yebätä ani mike gare jai.

Mateo 26:36-56; Lucas 22:39-53; Juan 18:1-12.



kukwe ngwantarita

  • ¿Jesús bätä nitre apóstol kwe nikani mento kwarto yekänti, ye bitikäre nikani medente aune dre nuaindre kwetre niebare kwe ie?
  • ¿Jesús nükaninta nitre apóstol känti ye ngwane kwani ño ie, aune bäbe ye namani bare?
  • Tä bämikani ye erere, ¿nire nire nikani kä Getsemaní yekänti, aune Judas Iscariote dre nuainbare?
  • ¿Ñobätä Judas käkwe Jesús demainbare, aune Pedro dre nuainbare?
  • ¿Jesús dre niebare Pedro ie, aune ñobätä Jesús ñaka ángel käräbare Ngöbö ie?

kukwe mada ngwantarita

  • Ñäkädre Mateo 26:36-56 yebätä.

    ¿Jesús mäträbare ño nitre ja tötikaka kwe yebätä, aune ñobätä kukwe kwin bämikani kwe nitre umbre konkrekasionte yekrä? (Mat. 20:25-28; 26:40, 41; Gál. 5:17; Efe. 4:29, 31, 32.)

    Ngitra diandre ni mräkä rüere ye nämene tuin ño Jesús ie? (Mat. 26:52; Luc. 6:27, 28; Juan 18:36.)

  • Ñäkädre Lucas 22:39-53 yebätä.

    ¿Tödeka Jesukwe ye ñaka nämene dite aibätä ángel iti namani känti dimikakäre kä Getsemaní yekänti? Mikadre gare (Luc. 22:41-43; Isa. 49:8; Mat. 4:10, 11; Heb. 5:7).

  • Ñäkädre Juan 18:1-12 yebätä.

    ¿Jesús nitre ja tötikaka kwe ye kriemikani ño rüe ye kisete, aune kukwe bämikani kwe ye tä dre driere nie? (Juan 10:11, 12; 18:1, 6-9; Heb. 13:6; Sant. 2:25.)