Känändre nekänti

Indice yete känändre

Kukwe kira 49: Ñänä namani kwekebe

Kukwe kira 49: Ñänä namani kwekebe

JOSUÉ mike ñärärä. Niarakwe niebare: ‘¡Ñänä nemen kwekebe!’ Aune ñänä namani kwekebe. Namani kwekebe ja täte kä te ruäre köböiti täte. ¡Jehová ye nuainbare! Ñobätä Josué tö namani Ñänä trä tuai jankunu ye ani mike gare jai.

Ñänä

Rei käme ni rike Canaán nikani rüre Gabaón rüere ye ngwane, nitre Gabaón käkwe ni juani iti ja di kärere Josué ie. ‘¡Jakwre jötrö ngwarbe!’ niebare kwe. ‘¡Nun mike kwäre! Rei juta kabre känti jökrä tä ja mike nun rüere.’

Jötrö ngwarbe Josué bätä nitre rükä kwe nikani. Nänbare dibire ta kwetre. Namani Gabaón angwane, nitre rükä rei ni rike kwe nikaninkä aune ngitiani. Ye ngwane Jehovakwe ñü järe krikri kä kwinbätä mikani näkäin tibien, käkwe nitre kämikani bäri kwati nitre rükä Josuekwe yekrä.

Josué

Ñänä namanina niken nekä jutuabare Josué ie. Kä jatai drüne, aune nitre rükä kwati rei käme ni rike kwe gitiai. Yebätä Josué orabare Jehová ie aune niebare kwe: ‘¡Ñänä, nemen kwekebe!’ Ñänä trä namani jankunu angwane, nitre Israel käkwe rüe ye ganainbare.

Rei töi käme mada tärä Canaán brukwä juta Ngöbökwe kräke. Kä nikani kwä ti ta Josué bätä nitre rükä yebiti angwane nitre 31 reire juta yekänti ganainbare kwetre. Ye bitikäre, Josué käkwe kä ye döräibare nitre ji ngwanka käne nämene ribere jai yebiti.

Kä nikani kabre ta, aune kä namani 110 Josué yebiti angwane krütani. Niara bätä nitre ja ketamuko kwe nämene nire angwane, nitre nämene Jehová mike täte. Akwa niaratre krütani angwane, nitre käkwe kukwe käme nuainbare aune ja mikani kukwe krite kwetre. Ye ngwane namani ja di ribere Ngöböi.

Josué 10:6-15; 12:7-24; 14:1-5; Jueces 2:8-13.



kukwe ngwantarita

  • ¿Josué bämikani yekänti tä dre niere aune ñobätä?
  • ¿Jehovakwe Josué bätä nitre rükä kwe ye dimikani ño?
  • ¿Josué käkwe rei nibe ganainbare aune kä kwäbe te?
  • ¿Ñobätä Josué kä Canaán ye döräibare?
  • ¿Kä namani kwäbe Josué yebiti angwane krütani, aune ye bitikäre nitre käkwe dre nuainbare?

kukwe mada ngwantarita

  • Ñäkädre Josué 10:6-15 yebätä.

    ¿Jehová Ñänä bätä Sö mikani nünenkä nitre Israel köböire ye tä ni töimike ño? (Jos. 10:8, 10, 12, 13; Sal. 18:3; Pro. 18:10.)

  • Ñäkädre Josué 12:7-24 yebätä.

    ¿Nirekwe nitre 31 reire kä Canaán känti ye ganainbare metrere, aune ñobätä ye ütiäte nikrä kä nengwane? (Jos. 12:7; 24:11-13; Deu. 31:8; Luc. 21:9, 25-28.)

  • Ñäkädre Josué 14:1-5 yebätä.

    ¿Nitre Israel yebiti kä ye ñäkäninbiti ño, aune ye kätä dre mike gare Kä bä nuäre käbämikata yebätä? (Jos. 14:2; Isa. 65:21; Eze. 47:21-23; 1 Cor. 14:33.)

  • Ñäkädre Jueces 2:8-13 yebätä.

    Josué nämene Israel ye erere, ¿kä nengwane nire tä ja mike kukwe ngwarbe drieta ye rüere? (Jue. 2:8, 10, 11; Mat. 24:45-47; 2 Tes. 2:3-6; Tito 1:7-9; Rev. 1:1; 2:1, 2.)