Känändre nekänti

Indice yete känändre

Kukwe kira 46: Ki mikani Jericó yebiti

Kukwe kira 46: Ki mikani Jericó yebiti

¿DRETA ki Jericó ye mike niken tibien? Dobo kri raba bare kwrere. ¡Ye jondron mada ñan tuabare nuainbare Jehovakwe! Namani bare ño ani mike gare jai.

Ki Jericó tä niken tibien

Jehová kukwe ne niebare Josué ie: ‘Mä bätä nitre rükä mäkwe, munkwe nän juta ye bäreta. Munkwe nän bati bäreta köbö kwatire kwatire nemen köbö ti te. Mun rika kaja deme ye ngwena. Nitre sacerdote ni kükü rikadre kaja deme ye känenkri aune nibi krotu jükadre kwetre.

‘Köbö kükü te munkwe nän bä kükü juta ye bäreta. Biti munkwe nibi krotu ngö mika nemenkä raire, aune mun jökrä käkwe ngwänänkä rükäre kwrere. ¡Ye ngwane ki rikai tibien!’

Jehovakwe kukwe niebare ye erere Josué bätä nitre mräkä käkwe nuainbare. Nämene näin juta bäreta ye ngwane, ñaka namani blite. Nibi krotu bätä nitre ngoto ngö ye aibe namani ruin. Nitre Jericó yebätä kä jürä namani. ¿Kö tain tä ventana yebätä ye tuin mäi? ¿Ventana ye nirekwe? Nitre kä tuabitikä nibu käkwe kukwe niebare Rahab ie, ye erere nuainbare kwe. Mräkätre kwe jökrä tä ben gwi, mokre.

Josué

Mrä, köbö kükü yete, nitre käkwe nänbare bä kükü juta ye bäreta angwane, nibi krotu ye ngö mikani aune nitre rükä käkwe ngwänänkäbare, aune ki ye nikani tibien. Josuekwe niebare: ‘Nitre ye kämike aune juta bätä jondron jökrä ye kukwe. Akwa ngwian, cobre, bätä hierro ye ñaka kukwa, ye mikadre tabernáculo yete, jondron ütiäte mikata yekänti.’

Nitre kä tuabitikä nibu ye ie Josué niebare: ‘Rahab bätä mräkätre ye jökrä denkä jubäre.’ Nitre kä tuabitikä käkwe niebare ye erere, nitre ye namani kwäre.

Josué 6:1-25.



kukwe ngwantarita

  • ¿Nitre rükä bätä sacerdote käkwe dre nuaindre köbö ti yete Jehová niebare ie?
  • ¿Nitre käkwe dre nuainbare köbö kükü te?
  • Bämikani ye erere, ¿dre namani bare ki Jericó yebätä?
  • ¿Ñobätä kö tain tä mäkäni ventana yebätä?
  • ¿Nitre rükä ye käkwe dre nuaindre nitre bätä juta yebätä Josué niebare, aune ngwian, oro, cobre bätä hierro ye nuaindre kwetre?
  • ¿Nitre kä tuabitikä nibu ye käkwe dre nuaindre niebare ietre?

kukwe mada ngwantarita

  • Ñäkädre Josué 6:1-25 yebätä.

    ¿Köbö kükükäre te nitre Israel käkwe nänbare Jericó bäreta, ye ñobätä bä ja erebe nitre testiko Jehovakwe tä kukwe driere kä krüte te yebe? (Jos. 6:15, 16; Isa. 60:22; Mat. 24:14; 1 Cor. 9:16.)

    ¿Ngöbökwe kukwe niebare Josué 6:26 ye namani bare ño kä nikani 500 ta ye bitikäre, aune ye tä dre mike gare nie Jehová kukwei yebätä? (1 Rey. 16:34; Isa. 55:11.)