Känändre nekänti

Indice yete känändre

Kukwe kira 27: Rei käme namani gobrane Egipto

Kukwe kira 27: Rei käme namani gobrane Egipto

NITRE bämikani ye tä nitre mike sribire ja dibiti. ¡Iti tuin ni sribikä kwata mete! Nitre sribikä ye Jacob mräkä, kädekani nitre Israel. Aune nitre Egipto kätä mike sribire ja dibiti. Nitre Israel ye mikani klabore kwetre. ¿Ne namani bare ño?

Nitre egipcio käkwe nitre israelita mikani ja tare nike

Kä kwati te Jacob mräkätre käkwe nünanbare jäme Egipto. Rei Faraón ye bitikäre, José mikani ütiäte kri Egipto ye nämene niaratre ngübare. Akwa José krütani. Ni mada namani reire Egipto abokän töi namani käme nitre Israel kräke.

Faraón töi käme ye käkwe nitre Israel mikani klabore. Aune nitre töi käme krubäte mikani niaratre jie ngwen kwe. Nitre ye käkwe nitre Israel mikani sribire ja dibiti juta sribekäre Faraón kräke. Akwa nitre Israel ye namani nirien bäri kwati. Nitre Israel rabadre kwati aune dite krubäte ye jürä namani nitre Egipto yebätä.

Nitre egipcio käkwe nitre israelita mikani ja tare nike

¿Faraón käkwe dre nuainbare gare mäi? Meritre Egipto nämene meritre Israel dimike ja ngübare ye ie niebare kwe: ‘Monsotre brare däredre ye jökrä munkwe mürie keta.’ Akwa meritre ye töi kwin yebätä ñaka nämene monso kia mürie kete.

Faraón käkwe kukwe ne niebare juta kwe jökrä ie: ‘Nitre Israel monsoi kia brare däredre ye jökrä munkwe mürie keta. Akwa monsotre kia merire aibe mikate nire munkwe.’ Kukwe niebare ye tare krubäte, ¿ñan ererea? Monso chi brare iti mikani kwäre ño, ye ani mike gare jai.

Éxodo 1:6-22.



kukwe ngwantarita

  • Ni kätä ni mada kwata mete bämikani ye abokän nire, aune tä nire kwata mete?
  • ¿José krütani ye bitikäre dre namani bare nitre Israel yebätä?
  • ¿Ñobätä nitre Egipto yebätä nitre Israel ye jürä namani?
  • Meritre Egipto nämene meritre Israel dimike ja ngübare, ¿ye ie Faraón käkwe dre niebare?

kukwe mada ngwantarita

  • Ñäkädre Éxodo 1:6-22 yebätä.

    ¿Jehovakwe kukwe käbämikani Abrahán ie ye mikani nemen bare ño kwe? (Éxo. 1:7; Gén. 12:2; Hech. 7:17.)

    Meritre hebreo nämene meritre mada dimike ja ngübare, ¿ye kräke ja nire ye deme bä mikani ño kwetre? (Éxo. 1:17; Gén. 9:6.)

    Meritre nämene meritre mada dimike ja ngübare käkwe Jehová mikani täte metre, ¿ye köböire dre kwin namani kwetre? (Éxo. 1:20, 21; Pro. 19:17.)

    Jehovakwe monso käbämikani Abrahán ie ye ñaka rabadre bare gäre, ¿Satana käkwe dre nuainbare? (Éxo. 1:22; Mat. 2:16.)