¡MONSO iti tuin ulire krubäte! Kädekata José. Etebatre käkwe rürübäinbare nitre nikani Egipto ie. Kä yekänti mikai klabore kwetre. ¿Ñobätä kukwe käme nuainbare kwetre eteba rünkri yebätä? Brukwä nämene José kräke yebätä.

José etabatre tä niara rürübäine

Jacob niaratre rün nämene José tarere krubäte. Ye bämikani kwe dän nga bä nuäre sribebare kräke kwe yebiti. Jacob namani José tarere krubäte, yebätä etebatre ni jätä namani ja rüere ben aune brukwä namani kräke. Akwa kukwe madabätä brukwä namani kräke arato.

Josekwe köböbare bobu. Köböbare bobu kwe yete etebatre namani nemen ngüdokwäre niara känenkri tuani kwe. Josekwe köböbare ye niebare kwe etebatre ie angwane, bäri brukwä namani kräke.

José etebatre umbre nämene obeja rünkwe ngübarebiti angwane, Jacob käkwe José juani mike ñärärä. José jutuabare etebatre ie angwane niebare kwetre: ‘¡Ani kämike!’ Akwa eteba umbre Rubén käkwe niebare: ‘¡Mun ñaka ye nuain!’ Ñakare aune, kä mokä sribebare ñökrä nämene nötare yete José kitani kwetre. Namani täkäni tibien biti dre nuaindi kwetre eteba José yebätä ye namanintre kädriere jabe.

Ye ngwane nitre Ismael jatani. Judá käkwe niebare etebatre rünkri ie: ‘Ani rürübäine nitre Ismael ie.’ Ye erere nuainbare kwetre. ¡Ngwian 20 mününe yebätä José rürübäinbare kwetre. ¡Kukwe käme krubäte nuainbare kwetre!

¿José etebatre ye käkwe dre niedi rün ie? Kabra kämikani krati kwetre biti dän bä nuäre, ye mritaninkä bati bobu kabra däriete kwetre. Biti dän ye jänikani kwetre rün Jacob ie aune niebare kwetre: ‘Dän ne kuni nuen. Dän Josekwe kwrere ye mike ñärärä.’

Dän kwe ara gani Jacobkwe. ‘Kwra ara käkwe José kämiri,’ niebare kwe. José etebatre tö namani rün tuai töbike ye erere. Jacob namani ulire krubäte. Namani muaire köbö kwati te. Akwa José ñaka nämene ngwakare. Jänikani yekänti dre namani bare niarabätä ye ani mike gare jai.

Génesis 37:1-35.



kukwe ngwantarita

  • ¿Ñobätä José etebatre namani ja rüere ben, aune dre nuainbare kwetre?
  • ¿José etebatre tö namani dre nuaindi José yebätä, akwa Rubén käkwe dre niebare?
  • Nitre Ismael jondron kökaka nükani angwane, ¿dre namani bare?
  • José krütani nütüdre rünkwe gäre, ¿etebatre käkwe dre nuainbare?

kukwe mada ngwantarita

  • Ñäkädre Génesis 37:1-35 yebätä.

    ¿Kukwe käme nuainta konkrekasionte ye ngwane nitre kristiano käkwe dre nuaindre José erere? (Gén. 37:2; Lev. 5:1; 1 Cor. 1:11.)

    ¿Dre käkwe José etebatre töi mikani José rürübäine? (Gén. 37:11, 18; Pro. 27:4; Sant. 3:14-16.)

    ¿Ni mräkätre tä krüte ye ngwane jata nemen ruin ño nie, ye erere ja namani ruin ño Jacob ie? (Gén. 37:35.)