NITRE ben Jacob tä blite, ¿ye nire gare mäi? Jacob käkwe nänbare köbö kwati te angwane, nitre ye kwani ie ñö okwä ken. Niaratre nämene obeja ngübare. Jacobkwe ngwanintari ietre: ‘¿Mun nünanka medente?’

Kä Harán känti,’ niebare kwetre.

Jacobkwe ngwanintari ietre, ‘¿Labán gare muen?’

‘Jän,’ niebare kwetre. ‘Niara ngängän Raquel kite obeja kwe ngwena mike ñärärä.’ ¿Raquel kite ye tuin mäi?

Jacob ngätäni Raquel ben

Jacob ie Raquel jutuabare obeja grü Labankwe ngwen angwane, nikani jä ñö okwäbiti denkä ne kwe obeja käkwe ñö ñadre. Biti Jacob Raquel demainbare aune ja kädekani kwe ie. Kä namani juto krubäte Raquel yebätä, aune nikani ja gwirete kukwe ye niere rün Labán ie.

Jacob namani Labán gwirete ye käi namani jutobätä. Jacob tö namani ja mikai gure Raquel ben niebare kwe Labán ie, angwane kä namani jutobätä. Akwa Jacobkwe sribidre kä kwä kükü te Raquel ye ütiäre niebare kwe ie. Jacob namani Raquel tarere krubäte yebätä nuainbare kwe. Akwa kä nükani ie ja mikakäre gure angwane, ¿dre namani bare gare mäi?

Labankwe ngängän umbre Lea ye biani Jacob ie, Raquel ye täte. Jacob sribibareta kä kwä kükü te Labán kräke angwane, Labán Raquel biani ie mukore. Kä ye näire Ngöbö nämene nitre brare tuenmetre ja mike gure meri kabre ben. Akwa kä ne ngwane ja mikadre gure meri itibe ben nieta Bibliakwe.

Génesis 29:1-30.



kukwe ngwantarita

  • ¿Meri bati bämikani ye nire, aune Jacob käkwe dre nuainbare ütiäre?
  • ¿Jacobkwe ja töi mikani dre nuainne ja mikakäre gure Raquel ben?
  • Kä nükani Jacob ie ja mikakäre gure Raquel ben ye ngwane, ¿Labán käkwe dre nuainbare?
  • ¿Jacob käkwe dre nuainbare mada ja mikakäre gure Raquel ben?

kukwe mada ngwantarita

  • Ñäkädre Génesis 29:1-30 yebätä.

    Labán käkwe Jacob ngökani akwa, ¿niara ie tö ngwan raba ye bämikani ño kwe aune ye kätä dre mike gare nie? (Gén. 25:27; 29:26-28; Mat. 5:37.)

    Jacob nämene Raquel tarere metre aune ñaka nämene ja bämike jerekäbe, ¿ye bämikani ño kwe? (Gén. 29:18, 20, 30; Cant. de Cant. 8:6.)

    ¿Meri meden nibäkä namani Jacob yebe aune monsoi namani arato? (Gén. 29:23, 24, 28, 29.)