Känändre nekänti

Känändre página mada yekänti

Indice yete känändre

Testiko Jehovakwe

ngäbere

Tärä tikwe tä blite Bibliabätä

Kukwe kira 1: Ngöbökwe jondron sribebare

Kukwe kira 1: Ngöbökwe jondron sribebare

JONDRON kwin jökrä ye Ngöbökwe biani nie. Niara käkwe Ñänä sribebare kä trä mikakrä rare nie, aune Sö bätä muke kä trä mikakrä deu. Bätä Dobro sribebare kwe nünankrä nie.

Akwa Ñänä, Sö, muke ye ñan aibe sribebare kena Ngöbökwe. ¿Dre sribebare kwe gare mäi? Nitre niara erere sribebare kwe. Ngöbö ñaka tuin nie ye erere nitre ye ñan raba tuin nie. Biblia tä nitre ye kädeke ángel. Ngöbökwe angeletre ye sribebare ne kwe nünandre kwetre kä kwinbiti ben.

Ángel sribebare kena Ngöbökwe ye namani bäri tare kwe. Ye Monso kena Ngöbökwe, aune sribibare kwe Rün yebe. Ngöbö dimikani kwe jondron jökrä mada ye sribere. Ngöbö dimikani kwe Ñänä, Sö, muke bätä Dobro ye sribere arato.

¿Dobro ye nämene ño kena? Kena ni ñaka nämene nüne jire iti Kä tibienbätä. Ñö aibe nämene kä jökräbiti tibien. Akwa Ngöbö tö namani ni tuai nüne Kä tibienbätä. Ye medenbätä, ükaninte kwe ni kräke. ¿Dre nuainbare kwe?

Kena, Kä tibienbätä käträ ñan nämene, ye medenbätä Ngöbökwe Ñänä ye trä mikani nen Kä tibienbätä. Ne kwe kä rabadre dibire aune rare. Ye bitikäre Dobro mikani nirien kwe ñö ye bitita.

Jondron ñaka nämene jire Dobro yebiti. Dobro nämene bämikata ne erere. Kriblü, kri krikri aune jondron nire ñaka nämene. Gwa ñaka nämene ñöte. Sribi namani nuaindre krubäte Ngöböi ne kwe jondron nire bätä ni nire käkwe nünandre kwin Kä tibienbätä.

Jeremías 10:12; Colosenses 1:15-17; Génesis 1:1-10.

Kä tibien tekare


kukwe ngwantarita

  • ¿Jondron kwin jökrä ye nire biani nie? ¿Mä raba bämike keteiti?
  • ¿Dre sribebare kena Ngöbökwe?
  • ¿Ñobätä ángel kena ye namani bäri tare Ngöbökwe?
  • Dobro nämene ño kena mä raba niere (bämikani ye mike ñärärä).
  • ¿Ngöbökwe Dobro ükaninte ño kena jondron nire aune ni nire kräke?

kukwe mada ngwantarita

  • Ñäkädre Jeremías 10:12 yebätä.

    Ngöbökwe jondron sribebare, ¿ye kätä dre mike gare nie niara yebätä? (Isa. 40:26; Rom. 11:33.)

  • Ñäkädre Colosenses 1:15-17 yebätä.

    Jondron sribebare ye ngwane, ¿sribi meden nuainbare Jesukwe aune kukwe ye käkwe ni töi mikadre ño niara yebätä?

  • Ñäkädre Génesis 1:1-10 yebätä.

    ¿Ñokänti Dobro ye namani bare? (Gén. 1:1.)

    Jondron sribebare köbö kena yete, ¿ye ngwane dre namani bare? (Gén. 1:3-5.)

    Jondron sribebare köbö köböbukäre yete, ¿ye ngwane dre namani bare? (Gén. 1:7, 8.)