U Tienu tagi ki tinga bi ninsaaliba po, ke bani n yaa ye o ninni. Lanwani waa den bua Adama leni Awa n maa a bila ki yaa ye tampoli ba. O den cili ki tagi malekinba ke bi ye tampoli. (Jaka 38:4, 7) U Tienu den kaani Adama u koaŋamu nni ke bi yi o Edena koaŋamu. (Mi Cilima 2:15, 17) O yanbuama den tie ke Adama leni o bila n diedi ki tinga yogunu kuli.—Cogi mani Pieli Tilieli 3:13; Pisoma 115:16.

Mi cilima, Edena koaŋamu bebe ke U Tienu den ŋanbi. Adama leni Awa den ba maa a bila ki gbieni ŋanduna nni. Waamu waamu ki tinga kuli den ba ti tua koaŋamu bi ŋalijani. (Mi Cilima 1:28) Ki tinga kan bodi abada. Bi ninsaaliba baa kali o ninni yogunu kuli.—Cogi mani Pisoma 104:5.

Adama leni Awa yie Jeova ke o deli ba ki ñani ba u koaŋamu nni, bi luo ŋalijani yeni. Nilo bakuli naa go den fidi ki tagi laa ŋalijani buolu. Hali laa yogunu a nibiada n diedi ŋanduna.—Cogi mani Mi Cilima 3:23, 24.

Li bua yedi ke U Tienu yanbuama n tie ki tinga n tua ŋalijani yeni kan go tieni bi? Li ba tieni kelima, U Tienu tie u paaciamu kuli daano. O yanbuama kan bia ba. (Isayi 48:18) O ba cedi ki tinga n tua ŋalijani, Adama bila n baa ki yaa ye o ni nni.—Cogi mani Pieli Tilieli 3:13.

Jesu U Tienu n gandi yaa bado yeni diema yaa yogunu ke ki tinga ba ti tua ŋalijani. O ba ga malekinba liiga ki bolini a nibiada yeni kuli. Bi yi laa toabu Amagedo. Lankuli yaa  gbeni bi ba luoni Sutaani bina 1000. U Tienu niba ba ciadi a nibiada bolima yogunu, kelima Jesu ba kubi ba. Bi ba yaa ye ki tinga po ŋalijani nni yogunu kuli.—Cogi mani Mi Doagidima 20:1-3; 21:3, 4.

Be yogunu ke U Tienu ba ti gbeni ŋanduna fala yeni? Jesu den waani yaa sinankeeni n baa waani ke laa yogunu nagini. A paka yeni n pugidi maanma yeni waani ke ŋanduna juodima yogunu nagini.—Cogi mani Matiyu 24:3, 7-14, 21, 22.

Jesu ba kali tanpoli ki diedi ki tinga kuli bina 1000. Li tie laa yogunu ke o ba cedi fala yeni n gbeni. (Isayi 9:5, 6; 11:9) O go ba pa yaaba n bua U Tienu bi tuonbiadi po sugili. Lanwani leni Jesu todima, U Tienu ba cedi i yiani, mi podima leni mi kuuma n gbeni.—Cogi mani Isayi 25:8; 33:24.

Yaaba n tiendi U Tienu yanbuama ba ti kali ŋalijani nni. (Jan Tikpiali 2:17) Jesu den yedi o ŋoadikaaba ke ban lingi bi yumiindanba ki waani ba ban ba tieni maanma ki mangi U Tienu pali. Dinli-dinla Jeova bangi niba boncianla ke bani n ba ti kali ŋalijani nni. (Sofoni 2:3) I moamoani po, Jeova siedinba taani diena nni ke bi niba baadi la bangima. U diegu yaaba bangi ban ba fidi kali leni bi yaba maanma, ki yaa kubi bi bila ŋama. A bila leni bi danba taagi ki bangi Bibili yeni. Bi bangi ban ba fidi ba u labaaliŋamu ñoadi maanma.—Cogi mani Mise 4:1-4.