1. Mi biadima cili lede?

U Tienu ŋa bi niba ke bi diedi bi yula hali laa yogunu ki ba waani ba, ke bi kan fidi gbeni ŋanduna yeni paka

Mi biadima cili ki tinga po yaa yogunu ke Sutaani cili ki pua mi faama. O den tie maleki yua n ŋani cain, ama waa bua i moamoani ba. (Jan 8:44) O den bua ti kpiagidi, ki nan soa ke U Tienu bebe n pundi ki yaa baadi ti kpiagidi. O den boandi Awa ke o yie U Tienu ki tuo wani Sutaani maama. Adama moko den taani leni o pua ki yie U Tienu. Lankuli n cuani fala leni mi kuuma.—Cogi mani Mi Cilima 3:1-6, 19.

Sutaani n den yedi Awa ke wan yie U Tienu yeni, li soa ke wan oba den cili ki yie ke U Tienu i pundi ki tua tanpoli leni ki tinga bado. Bi nisaaliba yaaba n cie kuli tuo Sutaani, baa bua U Tienu n tua bi bado. Li tie yene ke Sutaani tua ŋanduna bado.—Cogi mani Jan 14:30; Jan Tikpiali 5:19.

2. Malekinba leni bi nisaaliba tagima n kaa den ŋani bi?

U Tienu n tagi yaala kuli ŋani cain. Malekinba leni bi nisaaliba den ba fidi ki tuo o cain. (Mi Tiadima 32:4, 5) U Tienu tagi-ti, ke ti ba fidi ki taa li jagili ki tieni yaala n ŋani, bi yaala n bia. Lani n cedi ke ti ba fidi ki waani U Tienu ke ti bua o.—Cogi mani Jaka 1:13-15; Jan Tikpiali 5:3.

3. Be po ke U Tienu ŋa ke fala yeni waagi ki pundi one yogunu?

Jeova tuo ke bi yie o baliciamu keli waagi ki pundi dinla. Be yaa po? O bua waani bi niba ke li yaa tie wani bebe yaa bali, bali bakuli kan fidi ki diedi-ba bi ŋamu po ba. (O Yanfodaano 7:28; 8:9) Bi  nisaaliba n ye ki tinga po li cie bina 6000 moala. A paka yeni n yabidi maanma yeni waani lani. Bi nisaaliba balitieba naa fidi gbeni fala, bu toabu, li nikpali, i yiani leni i janbi yeni ba.—Cogi mani Mi Kpanjanma 20:24; Loma Yaaba 9:17.

U Tienu bali naa ta leni bi nisaaliba bali ba. O puuni yaaba n tuo o yeni ti ñoadi. (Isayi 48:17) Ne leni waamu Jeova ba bolini a diekpiama kuli. Yaaba n tuo ke U Tienu tie bi bado yeni bebe n ba ti kali ki tinga po. Isayi 11:9.—Cogi mani Danieli 2:44.

4. U Tienu juunli cedi ke ti ba fidi tieni be?

Sutaani yedi ke nilo kan fidi tuo U Tienu ke ñoadi ki ye. Yi moko ki bua waani ke o maama tie faama? Yi ba fidi tieni la. U Tienu juunli cedi ke bi nisaaliba ba fidi ki gandi, bi yaa bua U Tienu bali, bi, bi nisaaliba yaa bali. Ti yema ba waani tin bua yaala.—Cogi mani Joba 1:8-12; Mi Kpanjama 27:11.

5. Lede ke ti ba waani ke ti bua U Tienu n tua ti bado?

Ti jaga wangi ti yaa bua U Tienu n tua ti bado

Ti yaa bua U tienu n tua ti bado, li tie tiladi tin cogi Bibili yeni ki bandi wan bua tin tuo o maanma, ki yaa ŋoa yeni. (Jan 4:23) Nani Jesu, ti yaa kuani ti yula politiki leni bu toabu nni, ti waani ke ti naa bua Sutaani n tua ti bado.—Cogi mani Jan 17:14.

Sutaani tudi bi niba ke bi tiendi mi biadima, ke bi tua ke laa pia tagili. Yi yaa yie ke yi kan tieni nani bani, yi danlinba leni yi buolu niba ba fidi ki maadi ki biidi yi pali, bi ki tieni yi yaala n bia. (Pieli Tikpiali 4:3, 4) Yi ba tieni lede? Yi ba tuo ki taani leni yaaba n bua U Tienu bi? Yi yaa tieni lani, yi ba waani ke Sutaani n yedi ke nilo kan fidi tuo U Tienu fala nni tie faama.—Cogi mani Kolinta Yaaba Tikpiali 6:9, 10; 15:33.

U Tienu n bua Adama bila maanma yeni waani ke mi biadima leni fala yeni ba-ti gbeni. Yaaba n waani ke bi daani laa maama ba ti ba yaa miali n kan gbeni ki tinga po.—Cogi mani Jan 3:16.