Yì hosọ lẹ ji

Kunnudetọ Jehovah Tọn Lẹ

De ogbè dopo Gungbe

BIBLU NỌ DIỌ GBẸZAN MẸTỌN

N’Wá Jẹpọ hẹ Otọ́ Ṣie to Godo Mẹ

N’Wá Jẹpọ hẹ Otọ́ Ṣie to Godo Mẹ
  • OWHE HE MẸ N’YIN JIJI: 1954

  • OTÒ HE MẸ N’WÁ SỌN: Philippines

  • OTÀN ṢIE: N’họ̀njẹgbé na hùnyinylan otọ́ ṣie tọn wutu

NUHE N’YIN DAI

Saditọ susu wẹ nọ wá dla tọ̀sisa osó ji tọn he sẹpọ tòpẹvi Pagsanjan tọn he mẹsusu yọnẹn to otò Philippines tọn mẹ lọ pọ́n. Finẹ wẹ otọ́ ṣie Nardo Leron, yin pinplọn whẹ́n te to ohẹ́n mẹ. Na homẹ nọ gble e gando mẹhodu he gbayipe to tohọluduta lọ mẹ, to ponọ lẹ ṣẹnṣẹn podọ to azọ́nwatẹn etọn go wutu, e lẹzun hùnylantọ bo nọ duadi.

Mẹjitọ ṣie lẹ nọ wazọ́n sinsinyẹn nado penukundo ovi ṣinatọ̀n yetọn lẹ go. Yé nọ dọ́gbé na ojlẹ dindẹn nado wazọ́n to ogle yetọn lẹ mẹ to osó ji. Yẹn po mẹdaho ṣie Rodelio po dona nọ penukundo míde go, podọ huvẹ nọ saba hù mí. Mahopọnna dọ mí gbẹ́ yin yọpọvu, mí ma nọ mọ dotẹnmẹ sọmọ nado daihun. To whenue mí do owhe ṣinawe, dopodopo mítọn nọ wazọ́n to glemẹ bo nọ hẹn agbàn agọ̀nkẹ susu tọn do ota gbọn osó-kla lẹ ṣẹnṣẹn. Eyin mí ma gán didá agbàn de, mí nọ yin hinhẹn po huhlọn po nado dọ̀n ẹn gbọn kọmẹ.

Baba mítọn nọ hò mí taun, amọ́ nuhe nọ hẹn awufiẹsa wá na mí hugan wẹ nado mọdọ e nọ hò onọ̀ mítọn. Mí nọ tẹnpọn nado glọnalina ẹn, ṣigba e ma nọ pà mí. Yẹn po Rodelio po tlẹ magbe to nuglọ dọ mí na hù otọ́ mítọn, eyin mí whẹ́n. E nọ jlo mi taun nado tindo otọ́ de he yiwanna mí!

Na danuwadomẹgo otọ́ ṣie tọn hẹn mi jẹflumẹ bọ n’gblehomẹ wutu, n’tlọ́n whégbè whenue n’tindo owhe 14. N’dọ́ alipá na ojlẹ de bo jẹ marijuana yizan ji. To godo mẹ, n’wazọ́n taidi tọjihun-kùntọ bo nọ kùn saditọ lẹ yì tọ̀sisa osó ji tọn lẹ kọ̀n.

To owhe vude godo, n’bẹ wehọmẹ alavọ tọn to Manille. Amọ́, na n’nọ zingbejizọnlin lẹkọyi Pagsanjan nado wazọ́n to sẹfifo lẹ wutu, ma nọ mọ whenu sọmọ nado plọnnu. E wá taidi dọ n’to wezundo to jẹhọn godo, podọ marijuana masọ nọ de ayimajai ṣie lẹ pò ba. Enẹwutu, n’jẹ amasin adínọ devo lẹ zan ji taidi méthamphétamines, cocaïne po héroïne po. Amasin adínọ yiyizan dọ̀n mi biọ fẹnnuwiwa zanhẹmẹ tọn mẹ. Ohẹ́n klókló, mawadodo po yajiji po kẹdẹ wẹ lẹdo mi pé. N’gbẹwanna tohọluduta bo nọ dowhẹ aṣẹpatọ lẹ. N’nọ kanse Jiwheyẹwhe dọ, “Naegbọn ogbẹ̀ do vẹawu sọmọ?” Amọ́, depope to sinsẹ̀n voovo he mẹ n’gbọn lẹ mẹ ma na gblọndo na kanbiọ ṣie lẹ. N’nọ nù amasin adínọ susu nado whlá flumẹjijẹ ṣie.

To 1972, wehọmẹvi Philippines tọn lẹ basi tito nado fọngu sọta aṣẹpipa. N’kọnawudopọ hẹ yé to gufinfọn de whenu bọ e wá dekọtọn do danuwiwa mẹ. Mẹsusu wẹ yin wiwle, bọ to osun delẹ godo aṣẹpipa nagbè awhànfuntọ lẹ nado dugán do otò lọ ji.

N’gọjẹ alipá dọ́ ji whladopo dogọ, amọ́ to ojlẹ ehe mẹ n’nọ to budi dọ aṣẹpatọ lẹ na wle mi na n’tindo mahẹ to atẹṣiṣi lọ mẹ wutu. Nado mọ akuẹ do họ̀ amasin adínọ he n’nọ zan lẹ n’jẹ ajojẹ ji, podọ to godo mẹ n’nọ lọga hẹ akuẹnọ lẹ po jonọ lẹ po. Ogbẹ̀ masọ yin nude to nukun ṣie mẹ ba.

To ojlẹ enẹ mẹ, onọ̀ ṣie po nọvisunnu ṣie de po jẹ Biblu plọn hẹ Kunnudetọ Jehovah tọn lẹ ji. Homẹgble otọ́ ṣie taun bọ e fiọ owe sinai do Biblu ji yetọn lẹ. Ṣigba, yé omẹ awe lẹ doakọnna bo wá yin bibaptizi taidi Kunnudetọ lẹ.

To gbèdopo, Kunnudetọ de dọhona otọ́ ṣie gando opagbe Biblu tọn he dọ dọ to sọgodo whẹdida dodo na tin lẹdo aihọn pé go. (Salmu lẹ 72:12-14) Todido ehe whàn ẹn sọmọ bọ e magbe nado dindonanu gandego na ede. E ma yin opagbe gandudu dagbe de tọn he Jiwheyẹwhe do kẹdẹ wẹ e mọ to Biblu mẹ, ṣigba e sọ mọ nuhe Jiwheyẹwhe biọ to asu lẹ po otọ́ lẹ po si. (Efesunu lẹ 5:28; 6:4) To ojlẹ kleun de godo, ewọ po nọvi ṣie he pò lẹ po lẹzun Kunnudetọ. Na n’dẹn do whé taun wutu, n’ma mọdona nuhe to jijọ.

LEHE BIBLU DIỌ GBẸZAN ṢIE DO

To 1978, n’sẹtẹn yì Australie. Amọ́, etlẹ yin to otò jijọhonọ he mẹ gbẹtọ sù te ehe mẹ, n’ma vò sọn ayiha mẹ depope. N’gbẹ́ nọ nù ahàn sinsinyẹn bo nọ yí amasin adínọ zan. Jei vivọnu owhe enẹ tọn, Kunnudetọ Jehovah tọn lẹ wá dè e. N’yiwanna nuhe yé plọn mi to Biblu mẹ gando jijọho he na wá tin to aigba ji go, amọ́ n’to budi nado kọnawudopọ hẹ yé.

Ojlẹ vude to enẹ godo, n’lẹkọyi Philippines na osẹ kleun de. Nọvi ṣie lẹ dọna mi dọ otọ́ mítọn ko dovivẹnu bo hẹn gbẹtọ-yinyin etọn pọnte, amọ́ homẹgble zọ́n bọ n’ma jlo na mọ ẹn paali.

Nọviyọnnu ṣie pẹvi do nuhewutu yajiji po mawadodo po do gọ́ gbẹ̀mẹ sọmọ hia mi to Biblu mẹ. E jiawu na mi nado mọdọ nọviyọnnu ṣie pẹvi enẹ he ma tlẹ ko yọ́n nususu to gbẹ̀mẹ penugo nado na gblọndo na kanbiọ ṣie lẹpo. Whẹpo n’do yì, baba ṣie yí owe lọ Hiẹ Sọgan Nọgbẹ̀ Kakadoi to Paladisi mẹ to Aigba Ji * na mi. E dọmọ: “Gbọ yigọyigọ do na dewe. Owe ehe na gọalọna we nado mọ nuhe dín a te.” E na mi tuli nado dín Kunnudetọ Jehovah tọn lẹ mọ eyin n’jẹ Australie.

N’kẹalọyi ayinamẹ otọ́ ṣie tọn bo dín Plitẹnhọ Ahọluduta tọn Kunnudetọ Jehovah tọn lẹ tọn de mọ sẹpọ owhé ṣie gbè to Brisbane. N’kẹalọyi plọnmẹ Biblu gbesisọ tọn de. Dọdai Biblu tọn delẹ taidi dehe tin to Daniẹli weta 7 po Isaia weta 9 po mẹ dohia dọ gandudu Jiwheyẹwhe tọn, ehe mẹ mẹhodu depope ma na tin te, na dugán do mí ji to sọgodo. N’plọn dọ mí na duvivi Paladisi tọn to aigba ji. N’jlo na tindo nukundagbe Jiwheyẹwhe tọn, amọ́ n’mọdọ n’dona nọ duto numọtolanmẹ ṣie lẹ ji bo jo amasin adínọ lẹ po ahàn sinsinyẹn nùnù po do bosọ diọ aliho gbẹninọ tọn ṣie. N’klan sọn awhli he po yẹn po topọ go bo jo aṣa ylankan ṣie lẹ do. Dile jidide ṣie to Jehovah mẹ to jijideji, n’biọ alọgọ etọn to odẹ̀ mẹ nado basi diọdo devo lẹ.

Vudevude, n’mọ to gbẹzan ṣie mẹ dọ nuhe plọn n’te lẹ gán diọ mẹde nugbonugbo. Biblu dọ dọ eyin mí dovivẹnu mí gán ze “gbẹtọ-yinyin yọyọ lọ” do. (Kolosinu lẹ 3:9, 10) Dile n’to vivẹnudo nado wàmọ, n’wá mọdọ nuhe n’sè wayi gando diọdo he otọ́ ṣie basi lẹ go yin nugbo. Kakati nado to homẹgble bo to adidu, n’nọ jlo na basi jijọho po e po. To godo mẹ, n’wá jona otọ́ ṣie bo jo adi he dù n’te gandego sọn ovu whenu gbọ́n do.

ALE HE N’MỌYI LẸ

Taidi jọja de, n’nọ saba hodo apajlẹ po aṣa ylankan mẹdevo lẹ tọn po. Avase Biblu tọn yin nugbo to whẹho ṣie mẹ, na ogbẹ́ ylankan lẹ ko hẹn mi buali wutu. (1 Kọlintinu lẹ 15:33) Amọ́, n’ko wá jihọntọn nugbo lẹ to Kunnudetọ Jehovah tọn lẹ ṣẹnṣẹn bọ yé ko gọalọna mi nado diọ gbẹtọ-yinyin ṣie. Podọ ṣẹnṣẹn yetọn wẹ n’sọ mọ asi dagbe ṣie, Loretta dà te. To pọmẹ, mí nọ plọnnu mẹdevo gando lehe Biblu sọgan gọalọna yé do go.

Núdùdù dopọ hẹ asi ṣie po họntọn lẹ po

N’dopẹ́ dọ baba ṣie plọn Biblu, na e zọ́n bọ e lẹzun mẹhe n’ma lẹn gbede dọ e na wá lẹzun​—yèdọ asu de he yiwanna onọ̀ ṣie, podọ Klistiani whiwhẹnọ de he nọ dín jijọho. Gbeegbe mí mọ míde to whenue n’ko yí baptẹm taidi dopo to Kunnudetọ Jehovah tọn lẹ mẹ godo to 1987, otọ́ ṣie gbò mi fán whla tintan to gbẹzan ṣie mẹ!

Otọ́ ṣie zindonukọn nado lá owẹ̀n todido tọn he to Biblu mẹ na mẹdevo lẹ to pọmẹ hẹ onọ̀ ṣie na owhe 35 linlán. E wá lẹzun dawe azọ́n sinsinyẹn-watọ he nọ homẹtọnpọn de bo yin yinyọnẹn taidi mẹhe nọ gọalọna mẹdevo lẹ. To owhe enẹlẹ gblamẹ, n’plọn nado yiwanna ẹn bo nọ do sisi hia ẹ. E vivi na mi taun dọ n’yin visunnu etọn! E kú to 2016, amọ́ oflin dagbe wẹ n’tindo gandego to yinyọnẹn mẹ dọ mí omẹ awe lẹ basi diọdo titengbe delẹ gando gbẹtọ-yinyin mítọn go, bo yí nuplọnmẹ Biblu tọn lẹ do yizan mẹ. Wangbẹna dai tọn depope masọ pò to ahun ṣie mẹ ba. Podọ homẹ ṣie hùn taun dọ n’wá yọ́n Otọ́ olọn mẹ tọn ṣie, Jehovah Jiwheyẹwhe, mẹhe dopagbe nado doalọtena yajiji whẹndo lẹpo tọn.

^ huk. 20 Yin zinzinjẹgbonu gbọn Kunnudetọ Jehovah tọn lẹ dali ṣigba masọ tin-to-aimẹ ba.