Accessibility setting

De ogbè dopo

Yì hosọ flinflin lẹ ji

Yì hosọ lẹ ji

Kunnudetọ Jehovah Tọn Lẹ

Gungbe

Video He Nọ Hẹnmẹ Jaya Lẹ

Video He Nọ Hẹnmẹ Jaya Lẹ

“E taidi dọ Jehovah mọ nuhe to ahunmẹduna mẹjitọ lẹ wẹ nkọ.” Nuhe otọ́ de he nọ nọ̀ Malaisie dọ gando video ṣiṣavi tọn debọdo-dego he hosọ etọn yin Lẹzun Họntọn Jehovah Tọn go niyẹn.

Sọn whenue video tintan lọ yin didetọn, Kunnudetọ Jehovah tọn lẹ ko wleawuna video ṣiṣavi tọn devo lẹ he gando Kalẹb po whẹndo etọn po go. Video lọ lẹ tin to jw.org ji todin, bo nọ plọnnu ovi lẹ taun gando walọyizan po gbigbọnọ-yinyin yetọn po go, taidi nuhewutu yé ma dona nọ jẹajo kavi lehe yé sọgan nọ hodẹ̀ hlan Jiwheyẹwhe do.

Video tintan lọ ko yin lilẹdo ogbè 131 mẹ, bọ ovi lẹ to alemọyi sọn e mẹ lẹdo aihọn pé.

E Whànmẹ Taun

Onọ̀ de he tindo ovi atọ́n dọmọ: “Sọn osẹ dopo die he mí ko yí DVD lọ Dotoai, Setonu, bo Mọ Dona Yí, diblayi whla 50 wẹ mí ko pọ́n ẹn.”

Millie he tindo owhe 12 bo nọ nọ̀ Angleterre, tindo mẹdaho sunnu owhe 15 mẹvi de he nọ yin Thomas bo to azọ̀n trisomie 21 tọn jẹ. Millie wlan dọmọ: “Thomas tindo video Kalẹb tọn lẹ to alokan apòmẹ tọn etọn ji, enẹwutu e nọ hò na họntọn etọn lẹ to wehọmẹ. E yiwanna ohàn lọ lẹ bo tlẹ ji yé po numọtolanmẹ po sọmọ bọ mẹmẹyọnnu de bẹ avi. E jiawu taun.”

Ava he dọ dọ emi tindo owhe 8, osun 9, e lán azán 25, wlan dọmọ: “Kalẹb po mẹdaho etọn yọnnu po nọ plọnnu ovi lẹ taun.”

Mikaylah wlan dọmọ: “Owhe ṣidopo wẹ n’do. N’jlo na dọnudo mì na DVD lọ Dotoai, Setonu, bo Mọ Dona Yí. E plọn mi nado nọ dotoaina mẹjitọ ṣie lẹ na ehe nọ hẹn homẹ Jehovah tọn hùn wutu.”

E Bẹ Nuplọnmẹ Dagbe lẹ Hẹn

Dẹpẹ de he nọ wleawuna video ṣiṣavi tọn lẹ bo ma yin Kunnudetọ Jehovah tọn, pọ́n video lọ C’est mal de voler. E paṣa ẹ taun, titengbe to whenue e sè dọ omẹ vude poun wẹ wazọ́n bọ video lọ do yin didetọn. E dọmọ: “N’yọ́n mẹdelẹ he nọ wazọ́n na azọ́nwhé voovo he nọ de video ṣiṣavi tọn lẹ tọ́n, bọ to ojlẹ de mẹ n’nọ kanse dee lehe azọ́nwiwa to ofi mọnkọtọn lẹ na ko vẹawu sọ. Podọ to vivọnu azán lọ tọn, nuhe yé jẹtukla bo wazọ́n sinsinyẹn nado detọ́n lẹ nọ hẹn gbẹtọ lẹ nado konu poun na gànhiho kleun de, bọ e fó do finẹ. Amọ́, video ṣiṣavi tọn mìtọn lẹ nọ diọ gbẹzan yọpọ lẹ tọn, nọ plọn yé nado yọ́n nudagbe dovo na nuylankan, bosọ nọ gọalọna yé nado basi nudide dagbe lẹ. Nuhe wà mì te yọ́n taun, e nọ gọalọna gbẹtọ lẹ.”

Mẹjitọ lẹpo lẹdo aihọn pé wẹ na dọ nudopolọ. Onọ̀ de wlan dọmọ: “Visunnu ṣie Quinn he tindo owhe atọ̀n to video lọ Hiẹ Sọgan Lẹzun Họntọn Jehovah Tọn pọ́n. To whenue ohàn lọ jẹ daglamẹ, e pọ́n mi bo ze alọ pẹvi etọn do akọ́nnu bo dọmọ: “Mama, eyin n’to video ehe pọ́n, e nọ hẹn mi jaya.’ ”