Accessibility setting

De ogbè dopo

Yì hosọ flinflin lẹ ji

Yì hosọ lẹ ji

Kunnudetọ Jehovah Tọn Lẹ

Gungbe

Alọgigọna Nukuntọ́nnọ lẹ to Aflika Gbéji

Alọgigọna Nukuntọ́nnọ lẹ to Aflika Gbéji

To otò wamọnọ tọn delẹ mẹ, nukuntọ́nnọ lẹ ma nọ saba tindo dotẹnmẹ hundote he nukuntọ́nnọ he to otò devo mẹ lẹ nọ tindo. To whedelẹnu, mẹde ma tlẹ nọ pọ́n yé dè, podọ yé ma nọ mọ alọgọ he jẹ yí nado duto nuhahun delẹ ji ehe mẹhe nọ mọnú lẹ sọgan nọma pọnhlan di nuhe vẹawu de. Di apajlẹ, nado yì họ̀ núdùdù to ahimẹ, nado yì do mọto, kavi nado yọ́n akuẹ de dovo na de sọgan yin nuhahun daho de na yé. Wehihia lọsu sọgan yin nuhahun. E ma yin yemẹpo wẹ nọ hia wekinkan nukuntọ́nnọ lẹ tọn. Podọ eyin yé tlẹ nọ hia ẹ, e sọgan vẹawu dọ yé ni mọ owe lẹ to ogbè yetọn mẹ.

Kunnudetọ Jehovah tọn lẹ ko to owe sinai do Biblu ji lẹ zinjẹgbonu na nukuntọ́nnọ lẹ sọn owhe 100 linlán die. To agọe, Kunnudetọ lẹ do maṣinu he nọ zín owe po dehe nọ blá owe lẹ po hlan Malawi gbọn bato mẹ sọn Pays-Bas nado sọgan zín owe lẹ jẹgbonu na nukuntọ́nnọ lẹ to Chichewa-gbè mẹ, yèdọ ogbè de he nọ yin dido to Malawi.

Leo, he yọ́n azọ́n ganji to owe nukuntọ́nnọ lẹ tọn zinzinjẹgbonu mẹ, basi gbejizọnlin sọn wekantẹn alahọ Kunnudetọ Jehovah tọn lẹ tọn to Brésil wá Malawi. E gọalọna omẹ atọ́n nado yọ́n lehe yè nọ zan maṣinu lọ lẹ do. E sọ plọn yé nado zan tito ọdinatẹẹ ji tọn de he Kunnudetọ lẹ wleawuna. Tito ọdinatẹẹ ji tọn ehe nọ lilẹ́ nukinkan paa lẹ do nukinkan nukuntọ́nnọ lẹ tọn mẹ to Chichewa-gbè mẹ. Mẹhe nọ zan tito ọdinatẹẹ tọn enẹ lẹ wleawuna apotin lẹdogbedevomẹ bibasi tọn de he bẹ nukinkan paa lẹ po nukinkan nukuntọ́nnọ lẹ tọn to Chichewa-gbè mẹ po hẹn. Gbọnvona dọ tito ọdinatẹẹ ji tọn lọ nọ lilẹ́ nukinkan paa lẹ do nukinkan nukuntọ́nnọ lẹ tọn mẹ, e sọ nọ tò owe lọ to aliho de mẹ bọ e na bọawuna nukuntọ́nnọ lẹ nado hia. Pọ́n nuhe nukuntọ́nnọ delẹ he nọ nọ̀ Malawi dọ gando owe he yin awuwlena na yé lọ lẹ go.

Munyaradzi yin awhli nukuntọ́nnọ de. Ewọ lọsu wẹ nọ deanana azọ́n hodidọ to ladio ji tọn he e nọ wà na azán kleun delẹ to sẹmẹsẹmẹ. To sunmẹsunmẹ, e sọ nọ yí gànhiho 70 do plọn Biblu hẹ mẹdevo lẹ. E dọmọ: “To dai, Glẹnsigbe mẹ wẹ n’nọ mọ owe nukuntọ́nnọ lẹ tọn yí te, amọ́ ayajẹ ṣie gọfla todin nado nọ mọ yé yí to ogbè ṣie titi mẹ. N’yọ́n pinpẹn etọn tlala dọ Kunnudetọ hatọ ṣie lẹ dovivẹnu taun bosọ zan akuẹ susu na mí nido tindo owe nukuntọ́nnọ lẹ tọn do ogbè mítọn mẹ. Ehe dohia mi dọ mí ma yin winwọn bosọ nọ yin pinpọnhlan di nuhọakuẹ.”

Francis yin Kunnudetọ bo nọ nọ̀ agewaji Malawi tọn. Na e yin nukuntọ́nnọ wutu, mẹdevo lẹ wẹ nọ hiawe na ẹn to ojlẹ de mẹ. Whla tintan he e mọ owe nukuntọ́nnọ lẹ tọn yí to ogbè Chichewa tọn mẹ, e paṣa ẹ taun bọ e dọmọ: “Odlọ kú n’te ya? Nujiawu wẹ!”

Loyce lọsu yin nukuntọ́nnọ bo nọ yí gànhiho 70 do dọyẹwheho to sunmẹsunmẹ. E ko gọalọna gbẹtọ 52 nado hẹn gbẹzan yetọn pọnte. Gbọnna? E nọ hẹn owe nukuntọ́nnọ lẹ tọn bọ mẹhe e to nuplọn lẹ nọ zan owe paa lẹ, ehe popolẹpo yetọn yin zinjẹgbonu gbọn Kunnudetọ Jehovah tọn lẹ dali.

Loyce to Biblu plọn hẹ nawe de

Leo, azọ́nplọnmẹtọ he tlọ́n Brésil lọ dọmọ: “Eyin n’yí owe sinai do Biblu ji he nukuntọ́nnọ lẹ nọ zan na yé bo mọ lehe homẹ yetọn hùn do nado mọdọ ogbè yetọn mẹ wẹ owe lọ lẹ te, ayajẹ daho de wẹ e nọ yin na mi. Susu to yé mẹ wẹ ko dọ dọ emi dopẹ́ taun na Jehovah bosọ dọ dọ e nọ vivi na emi taun dọ emi sọgan wleawuna opli Klistiani tọn lẹ po nuhe emi na dọ to azọ́n yẹwhehodidọ tọn mẹ po na emide. Todin, e masọ nọ biọ dọ mẹde ni hiawe na yé ba. Podọ yé sọ nọ basi oplọn mẹdetiti tọn nugbonugbo todin. Yé sọgan gọalọna whẹndo yetọn lẹ ganji to gbigbọ-liho. Owe ehelẹ nọ gọalọna yé nado vẹ́ po Jehovah po dogọ.”