Yì hosọ lẹ ji

Yì hosọ flinflin lẹ ji

Kunnudetọ Jehovah Tọn Lẹ

Gungbe

Gbedewema-Yíyí Klasi 137tọ Wehọmẹ Biblu Pinplọn Watchtower Giliadi Tọn

Gbedewema-Yíyí Klasi 137tọ Wehọmẹ Biblu Pinplọn Watchtower Giliadi Tọn

To 13 septembre 2014, wehọmẹvi klasi 137tọ Wehọmẹ Biblu Pinplọn Watchtower Giliadi tọn lẹ yí gbedewema yetọn lẹ to nọtẹn mẹpinplọn tọn Kunnudetọ Jehovah tọn lẹ tọn to Patterson, New York. Wehọmẹ ehe nọ plọnazọ́n Kunnudetọ Jehovah tọn he bikan to yẹwhehodidọ mẹ lẹ nado pegan dogọ nado hẹn agun po wekantẹn alahọ tọn he mẹ yé te lẹ po lodo. Gbẹtọ 12 333 wẹ pọ́n tito-to-whinnu lọ; mẹdelẹ pọ́n ẹn to Patterson tlọlọ, podọ mẹdevo lẹ pọ́n ẹn gbọn video ji to Canada, Jamaïque, Porto Rico po États-Unis po.

Samuel Herd he yin dopo to mẹmẹsunnu he to Hagbẹ Anademẹtọ Kunnudetọ Jehovah tọn lẹ tọn mẹ wẹ yin azinponọ na tito-to-whinnu lọ. To hodidọ bẹjẹeji tọn etọn lẹ mẹ, e zinnudeji dọ linlẹn Jehovah tọn lẹ yiaga tlala hú linlẹn mítọn lẹ. (Isaia 55:8, 9) E dọ dọ dile wehọmẹvi Giliadi tọn lẹ tlẹ yí osun atọ́n do plọn nususu gando linlẹn Jiwheyẹwhe tọn lẹ go, vude to linlẹn etọn lẹ mẹ wẹ yé plọn; ‘tónu aliho Jiwheyẹwhe tọn lẹ tọn’ poun wẹ yé yọnẹn. (Job 26:14) Mẹmẹsunnu Herd sọ dọ dọ whedepopenu he mí pli nado plọnnu gando linlẹn Jiwheyẹwhe tọn lẹ go, mí nọ mọaleyi podọ nudopolọ wẹ e na yin na tito-to-whinnu gbedewema-yíyí tọn ehe lọsu ga.

“Sinsẹ́n Gbigbọ Tọn Wẹ . . . Linsinsinyẹn.” (Galatianu lẹ 5:22) John Larson he yin dopo to hagbẹ Wedegbẹ́ Alahọ États-Unis tọn lẹ mẹ zinnudo aliho awe delẹ he mẹ mí sọgan do linsinsinyẹn he yin adà de to sinsẹ́n gbigbọ Jiwheyẹwhe tọn mẹ hia te ji. Tintan, mí dona sinyẹnlin hẹ Jehovah dile e to azọ́nplọn mí bosọ to alọgọna mí nado lodo to yise mẹ. (1 Pita 5:10) Ablaham yin apajlẹ dagbe de, na e do linsinsinyẹn hia dile Jehovah to azọ́nplọn ẹn podọ kakajẹ whenue Ewọ hẹn opagbe he e do na ẹn di.Heblu lẹ 6:15.

Awetọ, mí dona sinyẹnlin hẹ mílọsu titi. Na azọ́nplọnmẹ Giliadi tọn he yé ko mọyi wutu, wehọmẹvi lẹ sọgan nọ donukun nuhe zẹ̀ huhlọn yetọn titi go sọn yelọsu si. Tlolo he yé na jẹ agun kavi alahọ he mẹ yè de yé do lẹ mẹ, yé sọgan nọ gblewhẹdo yede na nulẹ ma to pipà yé ganji wutu; yé sọgan nọ dọ dọ, ‘Etẹwẹ to wiwà mi taun?’ Mẹmẹsunnu Larson na yé apajlẹ etọn titi bo hẹn yé deji dọ yé sọgan duto ninọmẹ sinsinyẹn lẹ ji eyin yé nọ sinyẹnlin hẹ yelọsu titi bo to nukọnzindo to vivẹnudido yetọn lẹ mẹ kakajẹ whenue Jiwheyẹwhe na dotana azọ́nplọnmẹ yetọn.Heblu lẹ 6:11, 12.

‘Ayiha Mìtọn Ni Yin Whiwhẹnọ Zọnmii bo Nọgbẹ̀ Kakadoi!’ Anthony Morris he yin dopo to Hagbẹ Anademẹtọ lọ mẹ ze hosọ etọn sinai do adà awetọ Psalm 22:26 tọn ji he dọmọ: “ [Mì] gbọ ayiha mìtọn ni tin togbẹ̀ kakadoi.” Nado nọgbẹ̀ kakadoi, mí dona yin whiwhẹnọ. Mẹmẹsunnu Morris dohia hezeheze dọ eyin mí ma yin whiwhẹnọ, mí masọ nọ yọ́n-na-yizan na Jehovah ba. Mẹdepope to mí mẹ kakajẹ Klistiani he ko sẹ̀n Jiwheyẹwhe na owhe susu lẹ ji wẹ sọgan wọn dọ nujọnu taun wẹ e yin dọ mí ni nọ yinuwa taidi Klisti Jesu.2 Pita 1:9.

Owe-wiwe lẹ na apajlẹ gbẹtọ he do whiwhẹ hia po mẹhe ma do whiwhẹ hia lẹ po tọn. To whenue omẹ lẹ to Hẹlọdi Aglipa pà po oklọ po, goyiyi zọ́n bọ e kẹalọyi gigo he Jiwheyẹwhe kẹdẹ wẹ jẹna. Enẹwutu, angẹli Jiwheyẹwhe tọn linú in podọ ewọ “sọ jiwé.” (Owalọ lẹ 12:21-23) To vogbingbọn mẹ, e taidi dọ Pita ma hẹn Jesu do homẹ kavi gblehomẹ do e go to whenue e wọhẹ ẹ na nulẹnpọn etọn “ma sọgbe hẹ linlẹn Jiwheyẹwhe tọn lẹ . . . ṣigba dehe yin gbẹtọ tọn lẹ.” (Matiu 16:21-23) E kẹalọyi mẹplọnlọ lọ bo lẹzun apajlẹ whiwhẹ tọn de.1 Pita 5:5.

Delẹ to wehọmẹvi lọ lẹ mẹ na wazọ́n to Bẹtẹli to wekantẹn alahọ Kunnudetọ Jehovah tọn lẹ tọn mẹ. Mẹmẹsunnu Morris na yé avase dọ matin whiwhẹ, yé ma na tindo ayajẹ paali to azọ́ndenamẹ yetọn mẹ. Ṣigba, e sọgan vẹawu nado doayi e go to míde mẹ dọ mí ma tindo whiwhẹ. Nado gọalọna wehọmẹvi lẹ nado mọnukunnujẹ linlẹn ehe mẹ, e dọ dọ to owhe susu die wayi, ayinamẹ yin nina mẹho agun tọn de, na e ma tindo whiwhẹ wutu. Mẹho agun tọn lọ kanwehlan wekantẹn alahọ tọn dọmọ: “N’ma ko mọ whiwhẹnọ yẹn nkọ to fide.” Mẹmẹsunnu Morris na tuli wehọmẹvi lẹ nado dapana gbigbọ mọnkọtọn. Eyin yé tindo pọndohlan jlẹkaji tọn gando aṣẹpipa he yin zizedo alọmẹ na yé lọ go bo mọnukunnujẹemẹ dọ Jehovah Jiwheyẹwhe po Klisti Jesu po wẹ tindo aṣẹpipa daho hugan lọ, yé na to whiwhẹnọ yin zọnmii.

“E Ma Nọ Tẹalọpò Do Namẹ Gbigbọ Etọn.” (Johanu 3:34) Michael Burnett he yin mẹplọntọ de to wehọmẹ Giliadi tọn flinnu wehọmẹvi lẹ dọ gbigbọ wiwe Jiwheyẹwhe tọn na gọalọna yé nado duto nuhahun kavi nuhiha lẹ ji to azọ́ndenamẹ yetọn mẹ. Gbigbọ wiwe Jiwheyẹwhe tọn hẹn Bezalẹli penugo nado duto avùnnukundiọsọmẹnu he azọ́ndenamẹ etọn nado gbá gòhọtúntún lọ bẹhẹn lẹ ji. (Eksọdusi 35:30-35) Gbọnvona dọ gbigbọ wiwe hẹn nugopipe jọwamọ tọn he Bezalẹli ko tindo taidi anazọ́nwatọ jideji, e sọ gọalọna ẹn nado plọnnu mẹdevo lẹ. Gbigbọ wiwe sọgan wà nudopolọ na wehọmẹvi lọ lẹ to whenue yé na yí gbedewema yetọn godo, titengbe eyin yé plọn Owe-wiwe mẹdevo lẹ sọgbe hẹ aliho mẹpinplọn tọn he yin didohia yé to wehọ lọ mẹ.

To ojlẹ Bezalẹli tọn mẹ, yọnnu Islaelivi lẹ lọsu yí adà daho de wà to gòhọtúntún lọ gbigbá mẹ. (Eksọdusi 35:25, 26) Mọdopolọ, mẹmẹyọnnu wehọmẹ lọ tọn lẹ dohia dọ emi yin “yọnnu he yin ayiha nuyọnẹnnọ,” na yé nọ nọgodona asu yetọn lẹ. Mẹmẹsunnu Burnett dotana hodidọ etọn gbọn ayinamẹ nina wehọmẹvi lẹ dali dọmọ: “Mì nọ do whiwhẹ po gbigbọ tonusise tọn po hia dile mì to nugopipe jọwamọ tọn mìtọn lẹ zan. Eyin mì nọ wàmọ, Jehovah na na mì gbigbọ etọn to gigọ́ mẹ.”

“Be Hiẹ Na Dúwe hẹ Mi Ya?” Nado gbà hosọ ehe do flinflin, Mark Noumair he yin alọgọtọ de to Wedegbẹ́ Mẹpinplọn tọn mẹ yí apajlẹ de zan: apajlẹ Ahọlu Davidi tọn to whenue e hẹn aki alẹnu tọn wá Jelusalẹm. (2 Samuẹli 6:12-14) Whiwhẹ whàn Davidi nado yí ayajẹ do dúwe po “deviyọnnu devisunnu etọn lẹ tọn lẹ” po to whenue Aki lọ yin hinhẹnwa. (2 Samuẹli 6:20-22) Deviyọnnu enẹlẹ ma na wọn azán he gbè Ahọlu Davidi dúwe hẹ yé pọ́n gbede. Enẹwutu, Mẹmẹsunnu Noumair na tuli wehọmẹvi lọ lẹ nado ‘dúwe hẹ deviyọnnu lẹ.’ E kanse yé dọmọ: “Be mì na yin yinyọnẹn di mẹhe nọ doyẹyigona mẹhe ma tindo azọngban kaka de lẹ kavi mẹhe ma tindo azọngban depope lẹ ya? . . . Be mì na yiwanna gbẹtọ lẹ na jẹhẹnu gbigbọmẹ tọn yetọn lẹ wutu ya?”

Wehọmẹvi lẹ na hodo apajlẹ Jehovah tọn eyin yé zindonukọn nado nọ do owanyi nugbo hia to aliho enẹ mẹ. (Psalm 113:6, 7) Eyin delẹ to mẹhe lẹdo yé lẹ mẹ tlẹ nọ gboawupo nado do whiwhẹ hia, wehọmẹvi lọ lẹ ma dona dike enẹ ni glọnalina yé nado nọ do whiwhẹ hia. Mẹmẹsunnu Noumair dọna yé dọ: “Mì nọ pọ́n mìde hlan taidi mẹhe ma yin nude.” Podọ e yidogọ dọ, “Mì nọ yinuwa hẹ lẹngbọ Jehovah tọn lẹ dile Ewọ na yinuwa hẹ yé do.”

“Dotẹnmẹ Dagbe Lẹpo Yiyizan Nado Dọyẹwheho.” William Samuelson he nọ deanana Azọ́nwatẹn Wehọmẹ Yẹwhehọluduta Tọn lẹ Tọn donù apọsteli Paulu go taidi mẹde he nọ yí dotẹnmẹ hundote depope zan nado dọ yẹwheho wẹndagbe lọ tọn. (Owalọ lẹ 17:17) Enẹgodo, Mẹmẹsunnu Samuelson deanana delẹ to wehọmẹvi lọ lẹ mẹ nado vọ́ wadohia delẹ basi, yèdọ wadohia hodọdopọ dagbe he yé duvivi etọn to azọ́n yẹwhehodidọ tọn mẹ to ojlẹ he yé yizan to Giliadi lọ whenu lẹ tọn. Di apajlẹ, asu po asi po de dukosọna yọnnu de he nọ wazọ́n to núdùdù-satẹn de. Yé nọte kakajẹ whenue nusisà depò bo wá do video lọ Naegbọn Mí Dona Plọn Biblu? hia yọnnu lọ. Yé sọ do nọtẹn Intẹnẹt tọn mítọn jw.org hia ẹ, fie e sọgan mọ nudọnamẹ lẹ te to Laos-gbè mẹ, ehe yin ogbè etọn. Asu po asi po lọ sọ lẹkọyi dla nawe lọ pọ́n nado fọ́n ojlo etọn dote.

“Mì Zindonukọn Nado to Mìde Zejo Na Sinsẹ̀nzọn Ahọluduta lọ Tọn.” William Nonkes he tin to Azọ́nwatẹn Sinsẹ̀nzọn tọn to alahọ États-Unis tọn mẹ kanhose ẹnẹ to wehọmẹvi Giliadi tọn lẹ mẹ. Sọgbe hẹ Isaia 6:8, yé ko ze yede jo nado wà azọ́n he gando Ahọluduta lọ go, ṣigba wehọmẹ lọ plọnazọ́n yé nado sọgan jo yede do na azọ́n lọ dogọ. Mẹmẹyọnnu Snolia Maseko basi zẹẹmẹ dọ wehọmẹ lọ gọalọna emi nado doayi adà he mẹ emi sọgan wà dagbe dogọ te lẹ go. Adà titengbe dopo wẹ lehe e sọgan yí whenu etọn zan po nuyọnẹn po do to whèjai lẹ mahopọnna dọ e ko yí okle lọ blebu zan na sinsẹ̀nzọn lọ bọ nuṣikọna ẹn. E dọmọ, “Azọ́nplọnmẹ lọ gọalọna mi nado dovivẹnu zẹ̀ nue n’lẹndọ n’sọgan wà lẹ go.” Linlẹn he tin to Zẹfania 3:17 mẹ gọalọna Mẹmẹsunnu Dennis Nielsen nado plọn lehe e sọgan dapana gbigbọjọ to lizọnyizọn lọ mẹ do. Mẹmẹsunnu Nielsen dọmọ, “Eyin n’to yẹwhehodọ bọ azọ́n lọ ma to sinsẹ́n detọ́n sọmọ, n’dona flindọ Jehovah to ayajẹ na azọ́n he wà n’te wutu, podọ yẹnlọsu dona jaya.”

“Mì Pọ́n Ohẹ̀ Agahomẹ Tọn lẹ Tlintlin.” (Matiu 6:26) Stephen Lett he yin dopo to Hagbẹ Anademẹtọ lọ mẹ na hodidọ titengbe tito-to-whinnu lọ tọn. To kọndopọ mẹ hẹ nuhe Jesu plọnmẹ dọ mí dona nọ ‘pọ́n ohẹ̀ lẹ ... tlintlin,’ ehe biọ dọ mí ni yí sọwhiwhe do lẹnnupọndo yé ji, Mẹmẹsunnu Lett dọhodo onú voovo he yé sọgan plọn mí delẹ ji.Job 12:7.

Di apajlẹ, kẹdẹdile Jehovah nọ na núdùdù ohẹ̀ lẹ do, e na penukundo nuhudo mítọn lẹ go. Mí yin hagbẹ “whédo Jiwheyẹwhe tọn” lẹ tọn podọ ewọ na mí jide dọ emi na “wleawudaina mẹhe yin etọn titi lẹ.” (1 Timoti 3:15; 5:8) Etomọṣo, mí dona yí adà mítọn wà. Kẹdẹdile ohẹ̀ lẹ dona dín núdùdù he Jiwheyẹwhe nọ wleawuna do, mí dona zindonukọn “nado to ahọluduta lọ po dodowiwa etọn po dín whẹ́” nado mọ dona etọn.Matiu 6:33.

Mẹmẹsunnu Lett sọ zinnudeji dọ ohẹ̀ susu nọ dawhá nado na avase ohẹ̀ he pò lẹ eyin yé mọ owùnu de. Mọdopolọ, mí nọ na avase mẹdevo lẹ to whenue e jẹ dọ mí ni wàmọ, di apajlẹ, to whenue mẹmẹsunnu de “ṣì afọ ze whẹpo do wá yọ́n ẹn.” (Galatianu lẹ 6:1) Podọ gbọn yẹwhehodidọ mítọn dali, mí nọ na avase gbẹtọ lẹ gando “azán OKLUNỌ tọn” he to mizọnmizọn ji ja lọ go. (Zẹfania 1:14) To apajlẹ devo mẹ, Mẹmẹsunnu Lett basi zẹẹmẹ dọ kẹdẹdile ohẹ̀ he nọ to yìyì sọn otò de mẹ jẹ devo mẹ lẹ nọ zlọn gbọn osó he yiaga lẹ ji do, mílọsu nọ duto aliglọnnamẹnu he nọ taidi ninọmẹ he nkọ mí ma sọgan dù te lẹ ji po alọgọ Jehovah tọn po.Matiu 17:20.

Tadona. Wehọmẹvi lẹ yí gbedewema yetọn lẹ, podọ to enẹgodo dopo to yé mẹ hia wekanhlanmẹ de he wehọmẹvi klasi lọ tọn lẹ kàn nado do pinpẹn-nutọn-yinyọnẹn yetọn hia. To tadonahó Mẹmẹsunnu Herd tọn lẹ mẹ, e yí vivẹnudido mítọn nado do linlẹn Jehovah tọn lẹ do ahun mítọn mẹ jlẹdo azọ́n oṣó-whiwhè tọn go. Kẹdẹdile yè dona whè oṣó lẹ whlasusu nado hẹn ogàn he ji pinpán nọ gbọn lẹ hẹnai gbaun-gbaun do, mọ wẹ wehọmẹvi lẹ lọsu dona to nukọnzindo bo to nulẹnpọn do nuhe yé plọn to wehọmẹ Giliadi tọn lẹ ji do niyẹn. Mẹmẹsunnu Herd dọmọ: “Mì yí whenu nado whè nuhe mì plọn lọ lẹ do ahun mìtọn mẹ na yé nido doadọ̀do do e mẹ.” E sọ yidogọ dọmọ: “Mì nọ wanu sọgbe hẹ linlẹn Jiwheyẹwhe tọn lẹ, podọ mì na yin dona de.”